Бразилиянинг Рио-де-Жанейро шаҳрида ўтган XXXI ёзги Олимпия ўйинлари ўз ниҳоясига етди.
Унда муваффақиятли иштирок этган спортчиларимиз 4 олтин, 2 кумуш, 7 бронза медални қўлга киритиб, Ватанимизга ёруғ юз билан қайтиб келди.
23 август куни Тошкент аэропортида ушбу нуфузли мусобақа ғолиблари, совриндорлари ва иштирокчиларини тантанали кутиб олиш маросими бўлиб ўтди.
...Спортчиларимиз ўтирган самолётнинг қўнишига ҳали вақт бор. Даста-даста гул кўтарган юртдошларимиз ҳаяжонда, қувончларининг чеки йўқ. Айниқса, Олимпия ўйинларида ғолиб ва совриндор бўлиб, Ватанимиз довруғини оламга кенг таратган спортчиларимизнинг ота-оналари, яқинларидан бахтиёр инсон йўқ.
Нидоси Риога етиб борган она
— Бугун дунёдаги энг бахтли онаман, — деди оғир атлетика бўйича Олимпиада чемпиони ва рекордчиси Руслан Нуриддиновнинг онаси Гулчеҳра Нуриддинова. — Ўғлимнинг иштирокидаги баҳслар тунги соат учда бўлганига қарамай, уни мен билан бирга бутун халқимиз кузатди. Русланим 237 килограммни бўйсундириб, Олимпия рекордини янгилаганида, овозим Бразилияга етиб борган бўлса керак. Ҳалигача ўзимга келганим йўқ.
Халқимиз ишончини оқлади
— Тўғриси, финал жангида роса ҳайиққандим, — деди бокс бўйича Рио олимпиадаси ғолиби Ҳасанбой Дўстматовнинг отаси Маъруфжон Ҳайитбоев. — У билан қўнғироқлашдим. Ўғлим «Дада, илтимос, хавотирланманг, дуо қилиб турсаларингиз бас», деди. Шукрки, фарзандим халқимизнинг, Президентимиз ва менинг ишончимизни оқлади. Мана, ҳозир ҳаяжондан этим жимирлаб кетяпти. Ахир ўғлим Олимпиада чемпиони. Агар истиқлол бўлмаганида, ўғлим Ширмонбулоқдаги томошалардан нари ўтолмасди.
«Бронзаси — олтинга тенг»
— Аслида укам Бразилияга олтин медални ният қилиб кетганди, — деди дзюдо бўйича ХХХI ёзги олимпия ўйинлари бронза медали соҳиби Ришод Собировнинг опаси Дилнора Собирова. — Якунда бронза бўлди. Аммо мен учун бу олтиндан кам эмас. Чунки кетма-кет уч Олимпиадада совриндор бўлиш сайёрамиздаги беш спортчига насиб қилган, холос. Ишонаманки, кун келиб укамнинг шогирдлари, албатта, Олимпиада олтин медалини олади.
...Мана, орзиқиб кутилган лаҳзалар етиб келди. Бутун дунё нигоҳи қадалган Рио майдонларида Ўзбекистон номини шарафларга буркаган спортчиларимиз давлатимиз байроғини баланд кўтарган ҳолда она Ватан заминига қадам қўйди. Карнай-сурнай садолари атрофни тутди. Гулдурос қарсаклар, «Ўзбекистон» деган ҳайқириқлар бир зум ҳам тингани йўқ.
Тантанали маросимда сўзга чиққан Олий Мажлис Сенати раиси Н.Йўлдошев, Ўзбекистон халқ артистлари Э.Комилов, О.Назарбеков, Зулфия номидаги Давлат мукофоти совриндори, таэквондо бўйича жаҳон чемпиони Д.Холжигитова, Олимпиада чемпиони Ҳасанбой Дўстматовнинг онаси Д.Ҳайитбоева ва бошқалар Президентимиз раҳбарлигида ёш авлоднинг жисмонан ва маънан етук инсонлар бўлиб улғайиши, спорт билан мунтазам шуғулланиши, ўз истеъдод ва салоҳиятини намоён этиши учун яратилган кенг шароитлар юксак самаралар бераётганини алоҳида таъкидлади. Ўзбекистон спорт оламида янги саҳифа очган олимпиадачиларимизни ушбу юксак ғалаба билан табриклади. Ўзбекистон халқ шоири С.Саййид олимпиадачиларимиз ғалабасига бағишланган шеърини ўқиди.
Шундан сўнг ғолиб ва совриндор спортчиларимиз номидан Ҳасанбой Дўстматов, Руслан Нуриддинов, Шаҳобиддин Зоиров, Фазлиддин Ғойибназаров, Бектемир Мелиқўзиев сўзга чиқди. Улар бундай юксак эътибор ва ғамхўрлик учун Президентимизга самимий миннатдорлик билдирди. Келгусида бундан-да юксак ғалабаларни қўлга киритишга ваъда берди.
Ҳеч кимдан кам эмасмиз
Асли спортчиларимиз Олимпиададан ҳеч қачон медалсиз қайтмаган. 1996 йили Атлантада ўтган ёзги Олимпия ўйинларида юртдошларимиз биттадан кумуш ва бронза медалини қўлга киритган. 2000 йили Сидней шаҳри мезбонлик қилган баҳсларда бир олтин, бир кумуш ва икки бронза. 2004 йили Афина беллашувларида спортчиларимиздан икки нафари шоҳсупанинг биринчи, яна шунчаси учинчи ва бир нафари иккинчи поғонасини банд этган. 2008 йилги Пекин Олимпиадасида 6 медаль қўлга киритилган: 1 олтин, 2 кумуш, 3 бронза. Олимпиядачиларимиз 2012 йили Лондондан битта олтин, иккита бронза билан қайтиб келганди.
«Рио — 2016»да эса Ватанимиз ва халқимиз ҳаётидаги тарихий ғалаба қўлга киритилди: спортчиларимиз 13 медаль билан Ватанимиз мустақиллигининг 25 йиллигига катта совға, муносиб тўёна туҳфа қилишди. Боксчиларимиз 3 олтин, 2 кумуш ва 2 бронза медални қўлга киритиб, Куба, АҚШ, Буюк Британия ва Россия каби бокс энг ривожланган давлат спортчиларини ҳам ортда қолдириб, дунёда биринчи ўринни эгаллади.
Чарм қўлқоп усталаримиз Ҳасанбой Дўстматов, Шаҳобиддин Зоиров, Фазлиддин Ғойибназаров, оғир атлетикачимиз Руслан Нуриддинов ғалабаси шарафига ХХХI ёзги Олимпия ўйинларида Ўзбекистон байроғи кўтарилиб, давлатимиз мадҳияси янгради. Янада қувонарлиси, Ҳасанбой Олимпия ўйинларида энг ёрқин жангларни олиб боргани учун «Рио — 2016» олимпиадасининг энг яхши боксчиси сифатида Вэл Баркер кубоги билан тақдирланди.
Боксчиларимиздан Шаҳрам Ғиёсов, Бектемир Мелиқўзиев кумуш, Рустам Тўлаганов, Муроджон Аҳмадалиев, дзюдочилар Ришод Собиров, Диёрбек Ўрозбоев, эркин кураш бўйича Элмурод Тасмуродов, Ихтиёр Наврўзов, Магомед Ибрагимов Ўзбекистон спорт делегацияси ҳисобига биттадан бронза медаль қўшди.
Рағбат
Спортчиларимиз Ватанимизга қайтиб келган кунининг ўзидаёқ — 23 август куни Президентимиз «Рио-де-Жанейро шаҳрида (Бразилия) бўлиб ўтган XXXI ёзги Олимпиада ўйинлари ғолибларини пул мукофотлари билан тақдирлаш тўғрисида»ги фармойишни имзолади. Фармойишга кўра, олтин медаль олганларнинг ҳар бири 200 минг, кумуш медаль соҳиблари 100 минг, бронза медални қўлга киритганлар эса 75 минг АҚШ доллари билан мукофотланади. Пул мукофотларини тўлашни Ташқи иқтисодий фаолият миллий банки хорижий валютада — АҚШ долларида, банкда жисмоний шахслар учун белгиланган тартибда очиладиган депозит ҳисоб рақамларидан, солиқ ундирилмасдан амалга оширади.
Фазлиддин ҒОЙИБНАЗАРОВ,
бокс бўйича Рио олимпиадаси ғолиби:
— Мусобақада конголик Дивал Малонган, ҳиндистонлик Манож Кумар, АҚШ вакили Гари Рассел, россиялик Виталий Дунайцев, финалда Озарбайжон шарафини ҳимоя қилган Лорензо Коллазо Сотомайорни енгиб, олтин медалга сазовор бўлдим. Менда финалдаги баҳс, айниқса, катта таассурот қолдирди. Рингга чиққанимда дастлаб юртдошларимиз қўллаб-қувватлаган бўлса, иккинчи ва учинчи раундда залдаги томошабинларнинг «Uz-be-kis-tan!», «Uz-be-kis-tan!» деган ҳайқириқлари қулоғимга чалина бошлади. Ғалаба қозонишимни наинки ватандошларимиз, дунё аҳли ҳам истаётганини англадим. Ҳакам қўлимни кўтарганида кўзимдан ёш отилиб чиқди. Ўша лаҳзада туйган ҳисларимни сўз билан ифодалаб беролмайман. Муҳими, ишончни оқладим.
Шаҳобиддин ЗОИРОВ,
Олимпия ўйинлари олтин медаль соҳиби:
— Риодаги иштирокимни саралаш босқичидан бошлаганимда вақти келиб, Ҳасанбой Дўстматов, Шаҳрам Ғиёсов, Бектемир Мелиқўзиев ва Фазлиддин Ғойибназаров қаторида бокс беллашувларининг финалига йўлланма олишим хаёлимга ҳам келмаган эди. Рақибларимни мағлуб этганим сари Президентимиз, юртдошларимиз билдирган ишонч масъулияти ортди. Финал жангига киришишдан аввал устозим «Сен бу ерга нафақат ўзбекистонлик боксчи, балки Ўзбекистоннинг юзи ҳам бўлиб келгансан. Юзинг ерга қарамасин», — деди. Бу менга янада улкан масъулият юклади.
Шаҳобиддин РАСУЛОВ,
«Оила даврасида» мухбири
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ал-Ғарафа
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
