Хабар бериб ўтганимиздек куни кеча “Олимпия шон-шуҳрати” музейида Рио-де-Жанейрода якунига етган XV Паралимпия ўйинларида иштирок этиб юксак натижаларга эришган ҳамюртларимизга Ўзбекистон Республикаси Президентининг Фармойишига асосан пул мукофотлари ва Миллий олимпия қўмитаси қошидаги “Олимпиячиларни қўллаб қувватлаш жамоат фонди” томонидан Малибу автомашиналари тантанали вазиятда совға қилинганди.
22-сентябрь куни Республикамиз Президенти энди фармонга имзо чекдилар. Унга кўра XV ёзги Паралимпия ўйинларида юқори натижаларга эришган спортчи ва мураббийлардан бир гуруҳини мукофотлаш белгилаб қўйилганди. Бугун Ўзбекистон Миллий олимпия қўмитаси мажлислар залида мукофотларни топшириш маросими бўлиб ўтди. Президент девони масъул ҳодими Р. Хотамов фармонни ўқиб эшиттирди. Шундан сўнг Ўзбекистон Республикаси Бош вазир ўринбосари А.Икрамов ҳамда Миллий олимпия қўмитаси раиси М.Усмоновлар давлат мукофотларини ўз эгаларига топширдилар.
Фармонга кўра Рио Паралимпиадасида олтин медалларга сазовор бўлган юртдошларимиз Фотимахон Амилова, Нозимахон Қаюмова, Фирдавсбек Мусабеков, Шерзод Намозов, Ўткиржон Ниғматов, Ҳусниддин Норбеков, Александр Свечников ва Одилжон Тулендибоевлар “Ўзбекистон ифтихори” фахрий унвонига сазовор бўлдилар.
Халқаро майдонда байроғимизни сарбаланд кўтариб, юртимизни дунёга танитган чемпионларни тарбиялаган мураббийлар Нодирбек Абдуллаев, Сардор Абдухолиқов, Равшанбек Амилов, Расул Саидов, Елена Свечникова, Шуҳрат Тўраев, Илхом Халиков ва Игорь Шишковлар “Ўзбекистон Республикасида хизмат кўрсатган спорт устози” фахрий унвони билан тақдирландилар.
XV Паралимпия ўйинларининг кумуш медали совриндорлари Ҳайитжон Алимова, Сафия Бурханова, Муслима Одилова ва Кирилл Паньковлар “Ўзбекистон Республикасида хизмат кўрсатган спортчи” фахрий унвонига лойиқ кўрилдилар.
Шунингдек, сузиш бўйича Ўзбекистон терма жамоаси мураббийлари Рустамжон Амилов ва Дмитрий Паньков, дзюдо бўйича терма жамоа устозлари Олег Бучинцев ва Қахрамон Нуруллаев, енгил атлетика бўйича Ўзбекистон терма жамоаси бош мураббийи Людмила Лисовская, Ўзбекистон Паралимпия ассоциацияси раисининг ўринбосари Умид Ахмаджонов ва Ўзбекистон давлат жисмоний тарбия институти ректори, Ўзбекистон терма жамоасининг комплекс илмий гуруҳ раҳбари Шоакром Исроиловлар “Дўстлик” ордени билан тақдирланишди.
XV Паралимпия ўйинларида муносиб иштирок этган спортчиларимиздан яна бир гуруҳининг кўксиларига “Жасорат” медали тақилди. Булар: Мансур Абдирашидов, Шуҳрат Бобоев, Аҳрор Бозоров, Сервер Ибрагимов, Турсунпошша Нурметова, Гулрух Раҳимова, Феруз Сайидов, Севинч Салаева, Дониёр Солиев, Миран Сахатов, Шоҳсанам Тошпўлатова, Музаффар Турсунхўжаев, Фахриддин Хамраев, Дмитрий Хорлин ва Ширин Шарипов.
Енгил атлетика бўйича Ўзбекистон терма жамоаси мураббийлари Замира Амирова, Анна Казакова, Ирина Пак, дзюдо бўйича терма жамоа устозлари Барно Жўраев, Альфия Ибрагимова, Шамсиддин Сайидов ва Тохир Файзиев, сузиш бўйича Ўзбекистон терма жамоаси бош мураббийи Лутфуллоҳ хожи ўғли Саъдуллахон, спортнинг ушбу тури бўйича терма жамоа мураббийи Сергей Хорлин, ўқ отиш бўйича Ўзбекистон терма жамоаси бош мураббийи Наталья Ефимова ва пауэрлифтинг бўйича Ўзбекистон терма жамоаси бош мураббийи Фазлиддин Умирзоқов, шунингдек Ўзбекистон Паралимпия ассоциациясининг бош котиби Омон Гафуровлар “Шуҳрат” медалига сазовор бўлдилар.
Шунингдек, Фармонга кўра Ўзбекистон Миллий олимпия қўмитаси раиси Мираброр Усмонов “Ўзбекистон Республикасида хизмат кўрсатган ёшлар мураббийси” фахрий унвони билан тақдирланган.
Тадбир давомида спортчилар номидан сўзга чиққан ядро улоқтириш бўйича XV Паралимпия ўйинларининг кумуш медали совриндори Сафия Бурхонова, ўйинларнинг олтин медаль соҳиби ва жаҳон рекордчиси Ҳусниддин Норбеков, сузиш бўйича икки карра бронза медали эгаси Шоҳсанам Тошпўлатова ва енгил атлетика бўйича Ўзбекистон терма жамоаси бош мураббийи Сардор Абдухолиқовлар кўрсатилган бундай юксак эҳтиром учун давлатимиз раҳбарларига миннатдорчилик изҳор этишди ва 2020-йилда Токио мезбонлик қиладиган XVI Паралимпия ўйинларида бунданда яхшироқ натижаларга эришиб, жонажон диёримиз байроғини янада баландроққа кўтаришга ваъда беришди.
Чиндан ҳам, биздаги каби спортчиларини, мураббийларини эъзозлайдиган, қадрлайдиган юрт қайда бор? Даставвал олимпиячиларимиз кейин эса паралимпиячиларимизга кўрсатилган эътибор ва ғамҳўрликка бошқа мамлакатлар спортчилари хавас билан қарашлари турган гап. Ўз навбатида бундай юксак рағбатдан руҳланган спортчиларимиз энг йирик спорт мусобақаларида янада яхшироқ натижаларга эришишларига, маррани бунданда баландроқ олишларига шубҳа йўқ.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
