Ҳа, фантастика! Драматик кечган ўйинда "Барселона" "ПСЖ"ни ўта йирик ҳисобда мағлуб этди ва чорак финалга чиқди!!!
Ўйин Луис Энрике шогирдларининг режаси асосида бошланди. Мезбонлар 3-дақиқадаёқ ҳисобни очишга муваффақ бўлишди. Рафиньянинг узатмасидан кейин тўп ҳимоячининг бошидан дарвозабон майдончаси олдида турган Суаресга келиб тушди ва у бош билан тўпни посбоннинг устидан ошириб қўйди. Ҳимоячи тўпни дарвоза ичида қайтарди, аммо тўп чизиқни кесиб ўтганини ҳакамлар қайд этишди.
Бу гол парижликларни хавотирга солиб қўйди шекилли, улар тўлиқ ҳимояга ётиб олишди. "Кўк-анорранглилар" рақибнинг зич ҳимоясига қарши олис масофадан зарбалар бериб туришди. Хусусан, баҳснинг 17-дақиқасида Неймарнинг айланмас зарбасидан кейин тўп олис устун ёнгинасидан ўтиб кетди.
Биринчи бўлимга тугашига 5 дақиқа қолганида "Барселона" иккинчи голни уришга муваффақ бўлди. Суарес жарима майдончасига узатма берди. Иньеста рақиб ҳимоячиси билан тўп учун кураш олиб борди ва чизиқ устида тўпни товони билан қайтариб қолди. Буни кутмган Курзава ўз дарвозасини ишғол қилиб қўйди.
Иккинчи бўлим боши "Барса" учун яна омадли келди ва жамоа пенальти ишлашга муваффақ бўлди. Иньестанинг узатмасидан кейин Неймар чап қанотдан жарима майдончасига кирди, аммо Рабьо уни йиқитди. Ҳакам дарвоза ортидаги ҳакам билан маслаҳатлашгандан кейин нуқтани кўрсатди. Месси кучли зарба билан ҳисобни 3:0 кўринишига келтириб қўйди.
"Барселона" яна битта гол урса, умумий ҳисобни тенглаштириб, ўйинни камида қўшимча бўлимларга кўчира оларди. Ўтказиб юборилган учинчи голдан кейин "ПСЖ" уйғонди. Орадан 2 дақиқа ўтиб улар битта жавоб тўпини киритишлари мумкин эди. Менье ўнг қанотда Умтитини алдаб ўтди ва жарима майдончаси узатма берди. Каванининг яқин масофадан берган зарбасидан кейин тўп устунга тегиб, майдонни тарк этди!
Баҳснинг 62-дақиқасида парижликлар барибир рақиб дарвозасини ишғол қилишди. Меҳмонлар майдон марказида жарима тўпини ўйинга киритаётганида каталонияликлар суст ўйнашди. Етказиб берилган узатмани Курзава бош билан Каванига қолдириб берди. Эдинсон 7-8 метрлардан дарвозани ишғол қилди!
Ушбу гол ўйин тақдирини ҳал қилиб қўйганди. Деярли! Боиси, "Барса" кейинги босқичга чиқиш учун қолган ярим соат ичида 3та гол уриши талаб қилинарди. Агар Кавани 64-дақиқада ўз имкониятидан фойдалана олганида ўйин тақдири бутунлай ҳал бўларди. Аммо ҳужумчи бирга-бир вазиятга чиқиб, Тер Штегенни доғда қолдира олмади. Дарвозабон оёғи билан тўпни қайтарди.
"Кўк-анорранглилар"нинг ҳужумлари аввалгидек хавфли тус олмаётганди, мухлислар ҳам қизғин қўллаб-қувватлай олишмаётганди. Учрашувнинг 74-дақиқасида Мессида яхши имконият юзага келди. У бир ҳимоячини алдаб, жарима майдончасига кирди ва чап оёқда зарба берди, аммо тўп олис устун ёнидан ўтиб кетди.
Ўйин тугашига 5 дақиқа қолганида Анхель ди Мария ўта қулай имкониятдан фойдалана олмади. У "Барса" посбони билан яккама-якка вазиятга чиқиб кетди ва дарвоза томон аниқ зарба бера олмади! Тўп устун ёнидан ўтиб кетди.
Ўйин якунланиб бораётган пайтда Неймар катта саҳнага чиқди. У рақиб дарвозаси томон белгиланган жарима зарбасидан тўпни "тўққизлик"га "михлаб" қўйди ва "Барселона"ни ўйинга қайтарди, 4:1.
Орадан 2 дақиқа ўтиб Мессининг узатмасидан кейин Луис Суарес бирга бир вазиятга чиқаётганида йиқилди. Белгиланган пенальтини Неймар самарали амалга оширди ва ўз ваъдасининг устидан чиқиб, "ПСЖ" дарвозасига 2та гол урди.
Ҳакам иккинчи бўлимга 5 дақиқа қўшиб берди. Бу пайтда Марк-Андре тер Штеген ҳам ҳужумга ўтиб кетди. Ушбу дақиқалар тугашига 20 сония қолганида Неймар жарима майдончасига "юмшоқ" узатма берди ва Сержи Роберто яқин масофадан тўпни дарвозага буриб қўйди. 6:1! Даҳшат! Бунақаси ҳали бўлмаган. Шубҳасиз, бу ўйин футбол тарихи зарварақларига олтин ҳарфлар билан ёзиб қўйилади.
"Барсалона" мутлақо иложсиз ишни амалга оширди ва чорак финалга чиқди.
ЕЧЛ, нимчорак финал, жавоб ўйини, 00:45
"БАРСЕЛОНА" - "ПСЖ" 6:1
Голлар: 1:0 – 3 Суарес, 2:0 – 40, автогол Курзава, 3:0 – 50, пенальти Месси, 3:1 – 62 Кавани, 4:1 – 88 Неймар, 5:1 – 90, пенальти Неймар, 6:1 – 90 Серджи Роберто.
Барселона – тер Штеген, Маскерано, Пике, Умтити, Бускетс, Рафинья (Серджи Роберто, 76), Неймар, Ракитич (Андре Гомеш, 84), Иньеста (Туран, 65), Месси, Суарес.
ПСЖ – Трапп, Менье (Крыховяк, 90), Маркиньос, Тиаго Силва, Курзава, Лукас Моура (Ди Мария, 55), Верратти, Рабьо, Матюиди, Дракслер (Орье, 75), Кавани.
Огоҳлантиришлар: Матюиди (5), Дракслер (14), Пике (23), Бускетс (36), Кавани (42), Ракитич (61), Неймар (64), Суарес (67), Маркиньос (90), Верратти (90).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Қорабоғ
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
