«Реал» ярим ҳимоячиси Лукас Васкес жорий мавсумда энг кўп майдонга тушган футболчилардан бўлди. Жорий мавсумда Зайниддин Зидан жамоаси совринлар борасида «дубль» қайд этишга эришди.
25 ёшли Васкес «Реал»нинг 60та ўйинининг 50тасида майдонга тушди. Аммо ЕЧЛ финалида таркибга киритилмади. Шунга қарамай, Лукас бундан хафа эмас.
Яқинда Marca нашри Васкес билан суҳбат уюштирди.
- Тўртта соврин, 1958 йилдан буён илк маротаба «дубль» (Испания чемпионати, ЕЧЛ). «Реал»нинг якунланган мавсумдаги фаолиятига қандай баҳо берасиз?
- Бу ажойиб мавсум бўлди. Жамоа бошидан охиригача яхши ўйнади. Ла лигада деярли бутун мавсум давомида пешқадамлик қилдик ва якунда ҳақли равишда чемпион бўлдик. Чемпионлар Лигасидаги ғалаба эса алоҳида таҳсинга лойиқ. Биз бу мусобақада қаторасига икки марта зафар қучдик. Олдинлари ҳеч қайси клуб бу ишни уддалай олмаганди.
- Сиз мавсум давомида 50та учрашувда майдонга тушдингиз. Бу жамоадаги энг яхши натижадир. Бироқ ҳар доим ҳам асосий таркибга киритилмадингиз.
- Умуман олганда, 50та ўйин ўтказганимдан хурсанд бўлишим керак. Бундай натижага эришишимда мураббийнинг ҳиссаси катта. 50 марта майдонга тушибманми, демак мураббий шунча ишонч билдирган.
- Зидан сиз билан ҳамиша очиқ гаплашдими? Жамоадаги ролингиз қандай бўлишини бошиданоқ тушунтирганмиди?
- Ҳа. У мавсум бошидаёқ барчамизга ўз ғояларини тушунтирди ва ҳар бир футболчининг роли қандай бўлишини айтди. Якунда у ўз ваъдасининг устидан чиқиб, барчамизга ўзимизни кўрсатишимиз учун имкон яратиб берди. Зидан ҳамиша машғулотларда чин кўнгилдан тер тўкишимизни сўрайди. Шунга қараб, қайси ўйинда ким майдонга тушишини ҳал қилади.
- Зидан сиздан шахсан нималарни талаб қилади? Ярим ҳимояда кўпрооқ ишлашними ёки ҳужумдаги креативликними?
- Унисини ҳам, бунисини ҳам. У кўпроқ ҳимояда ёрдам беришимни сўрайди. Яъни марказга ўтиб, марказий ярим ҳимоячиларга ёрдам беришимни. Ҳужум ҳақида гапирадиган бўлсам, бу зонада барчамизга эркинлик яратиб беришни истайди.
- Мавсумда 50та учрашув ўтказганингизга қарамай, Испания терма жамоаси бош мураббийи Хулен Лопетеги сизни чақирмади. Бу борадаги фикрингиз қандай?
- Менимча, терма жамоага чақирув олмаганидан ажабланганлар жуда кўп. Ҳар бир футболчи ўз миллий терма жамоаси учун ўйнашни истайди. Бу катта шараф. Шу боис ҳам таркибга кирмай қолсангиз, ажабланишингиз турган гап. Шунга қарамай, мураббийнинг кейинги рўйхатидан жой олиш учун қаттиқ меҳнат қилишда давом этишимиз керак. Келаётган жаҳон чемпионати олдидан бу жуда муҳим.
- Демак, мақсадингиз 2018 йили Россияда бўлиб ўтадиган жаҳон чемпионатига бориш. Шундайми?
- Албатта, бу менинг асосий мақсадим. Жаҳон чемпионатида ўйнаб, унинг ҳавосидан баҳра олиш ҳар бир футболчи учун юқори чўққи. Умид қиламанки, буни ҳис қиламан. Ҳар қандай ҳолатда ҳам бунинг учун тинимсиз меҳнат қилиш керак. Европа чемпионатида ўйнаганман. Кўпчилик бу мусобақани жаҳон чемпионатининг «қариндоши» дейди. Лекин истагим ҳар икки мусобақа ҳавосидан нафас олиш.
- Орадан 59 йил ўтиб «Реал» Ла лигада зафар қучди ва қаторасига икки бор ЕЧЛда ғолиб чиқди. Бу нимани англатади?
- Тўғриси, икки ҳафтада икки марта Сибелесга йўл олиб, мухлислар билан ғалабани баҳам кўриш - буни сўз билан тушунтириб бўлмайди. Бу натижалар туфайли ўзимизни омадли ва бахтли ҳис қиляпмиз.
- Нима учун «Реал»дек клуб узоқ вақт бундай натижани қайд эта олмади?
- Чунки совринларни қўлга киритиш ҳамиша қийин.
- Келинг, Ла лига ҳақида гаплашамиз: «Эль Класико»да сўнгги дақиқаларда имконият бой берилгач, жамоада тушкунлик пайдо бўлдими?
- Агар ўз майдонингизда чемпионлик учун рақобатчи жамоага имкониятни бой берсангиз, айрим нарсаларни ўйлашингизга тўғри келади. Бироқ биз яхши холатда эдик, яъни «Сельта»га қарши захира ўйинимиз бор эди. Шу боис ҳам барчаси ўз қўлимизда эканини яхши билардик. Ҳаммаси ўзингизга боғлиқ бўлса, ўзингизга ишонишингиз керак. Биз айнан шундай қилдик. Хайриятки, барчаси яхши якунланди.
- Чемпионатда беш йил зафар қучилмади. Шу жиҳатни инобатга олсак, Ла лигадаги ғалаба ЕЧЛдаги ютуқдан муҳимроқмиди?
- Танлаш қийин. Ҳамиша ҳар икки мусобақада ҳам ғолиб чиқишни истаймиз.
- «Сельта»га имкониятни бой бериб, Қирол кубогидан чиқиб кетдинглар. Натижада «требл» қилишнинг имкони қолмади. Бу ўйинни неча марта муҳокама қилдинглар?
- Ҳақиқатан ҳам Испания кубогида зафар қучишни мақсад қилгандик. Келгуси мавсумда бу турнирда ғалаба қозониш учун бор имкониятимизни ишга соламиз.
- Бир йил олдин «Сан-Сиро»да бўлиб ўтган ЕЧЛ финалида пенальтини аниқ амалга оширгандингиз. Кардиффда эса майдонга тушмадингиз. Бунга муносабатингиз қандай?
- Футбол ўзи шунақа. Иккита бир-бирига ўхшаган ўйин бўлмайди. Жумладан, ЕЧЛ финаллари ҳам.
- «Ювентус»га қарши учрашувнинг танаффусида Зидан нима деди? Жамоада қандай ўзгариш бўлди?
- У бизга барча ўз кучига ишониши лозимлигини уқтирди. Агар шундай қила олсак, албатта, ғалаба қозонишимизни айтди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
