Ўзбекистон Республикаси Президентининг 2018 йил 16 мартдаги ПҚ-3610-сонли “Футболни янада ривожлантириш чора-тадбирлари тўғрисида”ги қарори бандларига асосан, республикамизда болалар ва ўсмирлар футбол академияларини ташкил этиш юзасидан Ўзбекистон футбол ассоциацияси томонидан бир қатор ишлар амалга оширилмоқда.
Бугун 14 май куни Ўзбекистон футбол ассоциациясида ҳудудий футбол академияларининг директорлик лавозимларига номзодлар билан суҳбатлар ўтказиш бошланди. Жумладан, бугун Жиззах, Самарқанд, Сирдарё, Тошкент вилоятлари ҳамда Тошкент шаҳридан келган номзодлар билан суҳбатлар ташкил қилинди.
Суҳбат давомида академияларнинг иш фаолиятини ташкил этиш бўйича режалар, профессионал футболчиларни етиштириш борасидаги амалга оширилиши кутилаётган янги чора-тадбирлар, футбол академияларида татбиқ қилинадиган янги ўқитиш тизимлари муҳокама қилиниб, номзодларга тегишли тавсиялар берилди.
Эртага Андижон, Сурхондарё, Навоий вилоятлари ҳамда Қорақалпоғистон Республикасидан ташриф буюрган номзодлар билан суҳбатлар ташкил қилинса, 16 май куни Наманган, Қашқадарё, Бухоро, Фарғона ва Хоразм вилоятлари вакиллари суҳбатда қатнашишади.
Матнда хатолик топсангиз, ўша хатони белгилаб, бизга жўнатинг (Ctrl + Enter).