O‘zbekiston Respublikasi Prezidentining 2018 yil 16 martdagi PQ-3610-sonli “Futbolni yanada rivojlantirish chora-tadbirlari to‘g‘risida”gi qarori bandlariga asosan, respublikamizda bolalar va o‘smirlar futbol akademiyalarini tashkil etish yuzasidan O‘zbekiston futbol assosiasiyasi tomonidan bir qator ishlar amalga oshirilmoqda.
Bugun 14 may kuni O‘zbekiston futbol assosiasiyasida hududiy futbol akademiyalarining direktorlik lavozimlariga nomzodlar bilan suhbatlar o‘tkazish boshlandi. Jumladan, bugun Jizzax, Samarqand, Sirdaryo, Toshkent viloyatlari hamda Toshkent shahridan kelgan nomzodlar bilan suhbatlar tashkil qilindi.
Suhbat davomida akademiyalarning ish faoliyatini tashkil etish bo‘yicha rejalar, professional futbolchilarni yetishtirish borasidagi amalga oshirilishi kutilayotgan yangi chora-tadbirlar, futbol akademiyalarida tatbiq qilinadigan yangi o‘qitish tizimlari muhokama qilinib, nomzodlarga tegishli tavsiyalar berildi.
Ertaga Andijon, Surxondaryo, Navoiy viloyatlari hamda Qoraqalpog‘iston Respublikasidan tashrif buyurgan nomzodlar bilan suhbatlar tashkil qilinsa, 16 may kuni Namangan, Qashqadaryo, Buxoro, Farg‘ona va Xorazm viloyatlari vakillari suhbatda qatnashishadi.