Ўзбекистон Паралимпия миллий қўмитасида “Junior” футбол мактаби томонидан “Чемпионлар лигаси” мусобақаси ўтказилди. Мусобақада ёш болакайлар шартли равишда “Бавария”, “Барселона”, “Реал Мадрид”, “Ливерпуль”, “ПСЖ” каби жамоаларга бўлиниб, ўзаро баҳс олиб боришди.
Мусобақа ғолибларини тақдирлаш маросимида Ўзбекистон миллий олимпия қўмитаси президенти ва ЎФА биринчи вице-президенти Умид Аҳмаджонов, Жисмоний тарбия ва спорт вазири Шоакром Исроилов ҳамда мусобақа ҳомийлари ва ташкилотчилари қатнашишди.
Умид Аҳмаджонов тадбирда сўз олар экан, ушбу болакайлар келажакда Европанинг кучли бешлик жамоаларида тўп суриб, миллий терма жамоамиз сафида тўп суришларига ҳамда терма жамоамизни Жаҳон чемпионатига олиб чиқишга ўз ҳиссаларини қўшишларига ишончи комил эканини айтиб ўтди.
Шундан сўнг “Чемпионлар лигаси” мусобақасида ғолиб чиққан жамоа аъзоларига ЎФА томонидан эсдалик совғалари ва медаллар топширилди. Мусобақа ғолибига эса бош соврин – Чемпионлар лигаси Кубоги тақдим қилинди.
Шунингдек, ушбу мусобақада юртимизда меҳмон бўлиб турган “Реал Мадрид” академияси менежерлари ҳам қатнашишди. Улар ҳам ғолибларга ўзларининг эсдалик совғаларини топширишди.
Матнда хатолик топсангиз, ўша хатони белгилаб, бизга жўнатинг (Ctrl + Enter).