Жаҳон чемпионатини яна бир фаворит тарк этди. Бельгия терма жамоаси чорак финалда Бразилияни мағлуб этишга муваффақ бўлди. Бу жамоалар мухлисларга Мундиалдаги энг ёрқин ўйинни намойиш қилиб беришди.
Учрашувнинг 5-дақиқасидаёқ ҳисоб очилиши мумкин эди. Марсело бурчак зарбасини амалга оширганидан кейин тўп шундоққина дарвоза олдида турган Тиаго Силванинг оёғидан тўппа-тўғри устунга тегди. Орадан 4 дақиқа ўтиб Бразилия иккинчи бурчак тўпини ўйинга киритди. Бу сафар Паулиньо яқин масофадан муваффақиятли зарба бера олмади. Агар мана шу иккита вазиятлардан бири гол билан якунланганида, ўйиннинг тақдири бутунлай бошқача кечиши мумкин эди.
Учрашувнинг 13-дақиқасида бельгияликлар бурчак тўпини ўйинга киритишдию, Фернандиньо ўз дарвозасини ишғол қилиб қўйди. Ўйиннинг 31-дақиқасига келиб Бельгия қарши ҳужумни самарали якунлади. Кевин де Брюйне 18 метрлардан аниқ зарба билан ҳисобни 0:2га етказди.
Шундан сўнг Тибо Куртуанинг юлдузли онлари бошланиб кетди. У "сариқ девлар" томонидан яратилган вазиятларни бирин-кетин йўққа чиқара бошлади. Айниқса, иккинчи бўлимнинг дастлабки 30 дақиқасида Тите шогирдлари шу қадар кўп вазият яратишдики, "қизил иблислар" мудофаа чизиғи ва посбони катта қийинчилик эвазига уларни бартараф этишди.
Дарвоқе, учрашувни бошқариб борган Милорад Мажич икки марта Бельгия дарвозаси томон пенальти белгилаши мумкин эди. Дастлаб Феллайни ўз жарима майдончаси ичида Неймарни йиқитган пайтда ҳакам бразилиялик футболчи симуляция ишлатди деб ҳисобладию, VAR бўйича мутахассисларга мурожаат қилиб ўтирмади. Кейинчалик эса Жезус-Компани тўқнашувида рефери видеотакрордагилар билан маслаҳатлашиб, пенальти бергиламасликка қарор қилди.
Ўйин тугашига 15 дақиқа қолганида Бразилия битта жавоб тўпини киритди. Коутиньонинг заргарона узатмасини Ренато Аугусто бош билан дарвозага жойлаб қўйди. Орадан бир неча дақиқа ўтиб ушбу футболчининг ўзи ҳисобни тенглаштириши мумкин эди, аммо унинг 16 метрдан йўллаган зарбасига бироз аниқлик етишмади.
Қўшиб берилган дақиқаларнинг учинчиси ўтиб бораётган пайтда Неймар ҳисобни тенглаштириши мумкин эди. У 20 метрлардан жуда мураккаб зарба берди, бироқ Куртуа бу зарбани ҳам қайтаришга муваффақ бўлди.
Шу тариқа, Бельгия терма жамоаси 32 йиллик танаффусдан кейин ярим финалга йўл олди. Роберто Мартинес шогирдлари финал йўлланмаси учун Францияга қарши майдонга чиқади.
ЖЧ-2018, чорак финал
Бразилия – Бельгия 1:2 (0:2)
Голлар: 0:1 – 13, автогол Фернандиньо, 0:2 – 31 де Брюйне, 1:2 – 76 Ренато Аугусто.
Бразилия – Алиссон, Тиаго Силва, Марсело, Фагнер, Миранда, Паулиньо (Ренато Аугусто, 73), Фернандиньо, Коутиньо, Виллиан (Фирмино, 46), Неймар, Габриэл Жезус (Дуглас Коста, 58).
Бельгия – Куртуа, Компани, Вертонген, Менье, Алдервейрелд, Феллайни, Шадли (Вермален, 83), де Брюйне, Витцель, Азар, Лукаку (Тилеманс, 87).
Огоҳлантиришлар: Алдервейрелд (47), Менье (71), Фернандиньо (85), Фагнер (90).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
