Мундиал кундалиги: ким нима учун ғалаба қозонади?
Французлар мундиалнинг қолган қисмида фаворит сифатида кўриляпти. Қизиқ. Нега?
Боиси уларнинг ҳужум чизиғи бошқа термаларникига нисбатан кучлироқ. Бу битта сабаб. Ярим ҳимоя ҳам исталган жамоанинг марказий қисмидан яхши. Бу иккинчи сабаб. Хўш, ҳимоячи? Мана шу қисмида озроқ муаммо бор. Аргентина билан баҳсда бу яққол сезилиб қолди. Агар Уругвай билан бўлган учрашувда Кавани майдонга тушганда, ҳимоячиларга қийин бўлиши аниқ эди. Тўғри, қанотлар яхши ишлаяпти аммо марказда камчилик мавжуд. Варан ҳамда Умтити жуфтлиги тўлақонли равишда бир-бирига мослашиб олишганича йўқ. Айнан шу жиҳат рақибга қўл келиши мумкин.
Бельгияда эса вазият сал бошқачароқ. Марказ кучли бўлсада, қанотлардаги футболчилар позицион ҳужум давомида олдинга интилаверишмайди. Бу яхши албатта. Бироқ французларга нисбатан қанотларни бой бериб қўйишлик муқаррар мағлубият дегани. Боиси уларнинг ўнг ва чап қанотлардаги ҳужумчилари жуда ҳам тезкор. Ва буни деярли ҳамма ўйинда кўриб келмоқдамиз.
Агар Бельгия худди Бразилияга қарши ўйиндагидек ҳаракат қилса, Францияга осон кечмаслиги мумкин. Чунки улар битта тўп ошириш билан ҳужумга чиқиб кетиш услубини қўллашмоқда. Аммо “учрангли”ларнинг қанот ҳимоячилари Титенинг жамоаси сингари ҳужумда узоқ ушланиб қолмайди. Ва бу Бельгиянинг қарши ҳужумларини бартараф этишда қулай усул саналади.
Чорак финалда Куртуанинг ҳаракатлари барчани ҳайратга солди. У ҳақиқий қаҳрамон бўлди. Бутун ўйин давомида у 9 та сейв амалга оширди. Даҳшат. У термани ярим финалга чиқишида асосий бўғин бўлди. Мана шу ўйинини французларга қарши ҳам кўрсата олса, жамоа финалга чиқади.
Льорис ҳам чорак финалда жуда яхши ҳаракат қилди. Бу жамоа учун муҳим. Аммо марказий ҳимоячилар шу зайлда ўйнашда давом этса, у ёрдам бера олмайди. Албатта, мураббий шу жиҳатга кўпроқ эътибор бериши лозим.
Мураббийларга келадиган бўлсак, бири тактика ҳисобига жамоасини шу босқичга олиб келди, бошқаси маҳорат эвазига. Роберто Мартинес Бельгияни бир бутун жамоага айлантира олди. Илгарилар таркиб иккига бўлиниб олганди. Тушлик ва кечки овқатланиш маҳалларида футболчилар ажралиши кузатиларди - валлониялик футболчилар алоҳида, фландрияликлар алоҳида ўтиришарди. Аммо бу сафарги жаҳон чемпионатида улар бир тану бир жон бўлишган, улар фландрияча ёки валлонча эмас, бир тилда - инглиз тилида сўзлашишмоқда. Бу эса жамоа руҳиятига жуда ҳам яхши таъсир қилади. Ишонмасангиз Анридан сўранг.
Дешам қўл остида тажрибасизроқ бўлса ҳам янгича қарашга эга бўлган, креатив ҳаракатларга ўч футболчилар бисёр. Замонавий футболда бу айни муддао. Ва яна финалга йўлланма дегани ҳам. Дидиенинг мундиалдан аввал кўпчилик танқид қилганди, бироқ унинг танлаган таркиби ҳозирча панд бергани йўқ. Демак, унинг қарорлари тўғри.
Хўш, термалар шу кунгача неча маротаба майдонга тушишган? Умумий ҳисобда 73 марта. Адашмадингиз. Нотўғри маълумот эмас. Уларнинг 24 тасида Франция, 30 баҳсда эса Бельгия зафар қучган. 19 учрашув дуранг билан якунланган. Ўйинларнинг олтитаси жаҳон чемпионатларига тўғри келади. Унинг 4 тасида французлар, бир учрашувда бельгияликлар ғолиб бўлишган. Бир ўйин ҳисоб очилмаган ҳолатда тугаган. Мундиалларда “учрангли”лар олдинда. Бу факторни ҳам ҳисобдан чиқармаслик лозим. Бельгия чорак финалда кимни мусобақадан чиқариб юборганлигини ҳам унутманг!
Франция – Бельгия
“Санкт-Петербург” стадиони, Санкт-Петербург
Ўйин Тошкент вақти билан 23:00да бошланади.
Бош ҳакам: Андрес Кунья (Уругвай)
Манба: www.uza.uz
Киритилди: 15:53, 10.07.2018. Ўқилди: 3362 марта. Фикрлар: 1 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
