«Женоа» ёзда «Зенит» вакили Доменико Кришитони Италия чемпионатига қайтариб, кўпчилик эътиборига тушганди.
Лекин «А» серияси бошландики, Генуя шаҳри клуби учун Кришитонинг трансфери эмас, бошқаси муҳимроқ бўлгани ойдинлашди. Диққат қилинг, жамоа польшалик иқтидор Кшиштоф Пентекни атиги 4,5 миллион еврога сотиб олганди.
Ўша пайт нотаниш йигитча учун шунча пул олганидан роса қувонган «Краковия» клуби энди анча шошилганию, катта хатога йўл қўйганини тушуниб, афсусланаётган бўлса, ажабмас.
Чунончи, 23 ёшли ҳужумчининг трансфер нархи ҳозирнинг ўзида бир неча марта ошди ва кейинги ёзгача қанчага етишини энг зукко экспертлар ҳам тахмин қилишга чўчимоқдалар.
Хўш, Кшиштоф қайси кароматлари билан бир уринишда «А» сериясининг янги юлдузига айланди? Bombardir.ru сайти шу саволга жавобан бир неча фактлар келтирди.
Пентек янги чемпионат стартидаги 6та ўйинда 8та гол урди. «Женоа» бу даврда 11та гол ҳосил қилди. Демакки, клубининг илк 6та турда тўплаган голларидан нақ 73 фоизи поляк йигити номига ёзилди.
Муҳими, «Женоа»нинг турнир жадвалидаги мавқеси чакки эмас - жамоа шу кетишда бемалол еврокубоклар йўлланмаси учун курашади.
Кшиштоф Италиядаги мавсумни «покер» билан бошлаганди. Аниқроғи, поляк «Лечче»га қарши кубок баҳсида нақ 4та голга муаллифлик қилди. Тахминларга кўра, Пентек шу кетишда Гонсало Игуаин рекордини янгилаши ҳеч гап эмас.
Аргентиналик тўпурар 2015|2016 йиллар мавсумида рақиблар дарвозасини 36 марта нишонга олиб, «А» серияси рекордчисига айланган эди. Ҳисоб-китобларга қараганда, Пентек стартдаги тезлигини пасайтирмаса, финишга қадар голлари сонини чамаси 45тага етказиб қўйиши мумкин.
Умуман, Пентекнинг голеадорлик эффекти «Женоа» учун нақадар катта аҳамиятга эгалигини тушуниш учун аввалги кўрсаткичларга қараш керак. Дейлик, ўтган мавсум 28та ўйинда атиги 6та гол урган Жанлука Лападула жамоанинг энг яхши тўпурари мақомини олганди.
Қаранг, Пентек унинг натижасини мавсумнинг илк қисмидаёқ такрорлади, қолаверса, клуб тарихига ҳам киришга улгурди. Хуллас, польшалик иқтидор чемпионатнинг илк 3та ўйинида 4та гол уриб, узоқ 1948|1949 йиллар мавсумида Вердаль томонидан қайд этилган кўрсаткични такрорлади.
Пентек - «Женоа» тарихида мавсум стартидаги 6та ўйинда ҳам гол уришга эришган биринчи футболчидир. Яна бир томони, Кшиштоф мавсумолди назорат ўйинларида 10та голга муаллифлик қилганди. Умуман, Польша футболининг янги умиди сентябрь ойи якуни бўйича Европанинг кучли 5та чемпионатида ўйнаётган ҳужумчилар орасида энг сермаҳсули бўлди. Яъни у барча турнирлар ҳисобидан 10та гол маррасига етган биринчи ўйинчи бўлди.
Тушунарлики, Пентекнинг кучли старти Европадаги энг сара клубларни сира бефарқ қолдирмаяпти. Хусусан, «Бавария» вакиллари «Женоа»нинг охирги ўйинларини диққат билан кузатишмоқда, шунингдек, «Боруссия» Д. ва «Тоттенхэм» вакиллари футболчининг атрофидаги воқеалардан келиб чиқиб, трансфер имкониятини баҳолашмоқда. Ҳаттоки, «Барселона» томонидан ҳам қизиқиш бор, ҳар ҳолда, каталонияликлар мавсум стартида етарлича очко йўқотишди ва бу ҳолат раҳбариятни қўшимча «ресурс»лар қидиришга ундамоқда. Лекин энг реал вариант сифатида «Бавария» тилга олинмоқда, барибир. Мюнхенликлар Кшиштофни кимсан Роберт Левандовски ўрнига мўлжаллашмоқда.
«Фрозиноне»га қарши кечган ўйинда Пентек ва жамоанинг бошқа янги футболчилари ўртасида ажо-йиб боғлам юзага келаётгани яққол кўзга ташланди. Дейлик, «Женоа» ёзда Кот-д~ивуарлик 20 ёшли Кристиан Куаме билан шартнома тузганди. Аввалги мавсум «В» сериясида «Читаделла»нинг энг яхши тўпурари бўлган африкалик футболчи ўша ўйинда Пентекнинг 2та голига ассистентлик қилди. Дарвоқе, клуб Куаме трансферига Кшиштофникига нисбатан 500 минг евро кўпроқ тўлаганди. Айни пайт Пентекни ҳаттоки, Криштиану Роналду билан таққосламоқдалар. Чунончи, португалиялик юлдуз мавсумни унча яхши бошламади. Польшалик йигит эса айниқса, ўнг оёқ билан берадиган зарбалари билан ҳаммани ҳайратга солмоқда. Унинг техник қобилияти ҳам чакки эмас.
Эътиборлиси, Пентек «Краковия»даги охирги мавсумга қадар умуман кўзга ташланмаганди. Тўғри, «Женоа» сафига йўл олишидан аввал Польша миллий чемпионатида 36 марта майдонга тушиб, 21та гол урди. Шундан 9таси - пенальти самараси. «А» сериясидаги илк 8та голини эса фақат ўйин ҳолатидан юзага келтирди. Пентек яна голни чиройли нишонлаши билан ҳам ажралиб турибди.
Кшиштоф Пентек 1995 йилнинг 1 июль куни туғилган (23 ёш). Амплуа бўйича - ҳужумчи. Польша фуқароси. Дзержонюв (футболчи улғайган шаҳарча)нинг «Лехия» клуби тарбияланувчиси. Жамоадаги дебютини 2012 йили нишонлаган. Кшиштоф кейинги йили Польша олий дивизиони - Экстра-классда иштирок этувчи «Заглембе» жамоаси сафига қўшилган. Бироқ янги клуби ўша мавсум элитадан тушиб кетади. Шу тариқа Пентек биринчи дивизионда ўйнаб, 8та гол уриш асносида «Заглембе»нинг яна юқори лигага қайтишига ёрдам беради. Умуман, Кшиштоф бу клуб либосида жами 73 марта майдонга тушиб, ўз номига 15та гол ёзиб қўяди. 2016 йилга келиб, ёш иқтидорни Польша футболида ўз ўрнига эга клуб - «Краковия»га чақиришади. Қаҳрамонимиз 2 йил давомида жамоанинг 63та ўйинида иштирок этиб, жами 32та гол урди. Хусусан, охирги мавсумдаги маҳсулдорлиги эвазига Европа клублари назарига тушди. Якунда «Женоа» Пентек учун 4,5 млн. евро тўлади. Эътиборлиси, Кшиштоф Италия клубидаги расмий дебютини «покер» билан безади, янада диққатга сазовор жиҳати, унинг Италия кубоги баҳсида «Лечче» дарвозасини 4 бора ишғол этишига атиги 37 дақиқалик ўйин вақти кифоя қилди.
«Женоа» мавсум стартидаги илк 7та расмий ўйин (1таси кубок баҳси)да 15та гол урди ва улардан 80 фоизи (12та) айнан Кшиштоф Пентек номига ёзилди.
Польшалик футболчи «А» сериясининг дастлабки 4та турида 5та гол уриб, ёрқин дебют масаласида Андрей Шевченконинг 1999 йилги кўрсаткичини такрорлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
