«Jenoa» yozda «Zenit» vakili Domeniko Krishitoni Italiya chempionatiga qaytarib, ko‘pchilik e’tiboriga tushgandi.
Lekin «A» seriyasi boshlandiki, Genuya shahri klubi uchun Krishitoning transferi emas, boshqasi muhimroq bo‘lgani oydinlashdi. Diqqat qiling, jamoa polshalik iqtidor Kshishtof Pentekni atigi 4,5 million yevroga sotib olgandi.
O‘sha payt notanish yigitcha uchun shuncha pul olganidan rosa quvongan «Krakoviya» klubi endi ancha shoshilganiyu, katta xatoga yo‘l qo‘yganini tushunib, afsuslanayotgan bo‘lsa, ajabmas.
Chunonchi, 23 yoshli hujumchining transfer narxi hozirning o‘zida bir necha marta oshdi va keyingi yozgacha qanchaga yetishini eng zukko ekspertlar ham taxmin qilishga cho‘chimoqdalar.
Xo‘sh, Kshishtof qaysi karomatlari bilan bir urinishda «A» seriyasining yangi yulduziga aylandi? Bombardir.ru sayti shu savolga javoban bir necha faktlar keltirdi.
Pentek yangi chempionat startidagi 6ta o‘yinda 8ta gol urdi. «Jenoa» bu davrda 11ta gol hosil qildi. Demakki, klubining ilk 6ta turda to‘plagan gollaridan naq 73 foizi polyak yigiti nomiga yozildi.
Muhimi, «Jenoa»ning turnir jadvalidagi mavqesi chakki emas - jamoa shu ketishda bemalol yevrokuboklar yo‘llanmasi uchun kurashadi.
Kshishtof Italiyadagi mavsumni «poker» bilan boshlagandi. Aniqrog‘i, polyak «Lechche»ga qarshi kubok bahsida naq 4ta golga mualliflik qildi. Taxminlarga ko‘ra, Pentek shu ketishda Gonsalo Iguain rekordini yangilashi hech gap emas.
Argentinalik to‘purar 2015|2016 yillar mavsumida raqiblar darvozasini 36 marta nishonga olib, «A» seriyasi rekordchisiga aylangan edi. Hisob-kitoblarga qaraganda, Pentek startdagi tezligini pasaytirmasa, finishga qadar gollari sonini chamasi 45taga yetkazib qo‘yishi mumkin.
Umuman, Pentekning goleadorlik effekti «Jenoa» uchun naqadar katta ahamiyatga egaligini tushunish uchun avvalgi ko‘rsatkichlarga qarash kerak. Deylik, o‘tgan mavsum 28ta o‘yinda atigi 6ta gol urgan Janluka Lapadula jamoaning eng yaxshi to‘purari maqomini olgandi.
Qarang, Pentek uning natijasini mavsumning ilk qismidayoq takrorladi, qolaversa, klub tarixiga ham kirishga ulgurdi. Xullas, polshalik iqtidor chempionatning ilk 3ta o‘yinida 4ta gol urib, uzoq 1948|1949 yillar mavsumida Verdal tomonidan qayd etilgan ko‘rsatkichni takrorladi.
Pentek - «Jenoa» tarixida mavsum startidagi 6ta o‘yinda ham gol urishga erishgan birinchi futbolchidir. Yana bir tomoni, Kshishtof mavsumoldi nazorat o‘yinlarida 10ta golga mualliflik qilgandi. Umuman, Polsha futbolining yangi umidi sentyabr oyi yakuni bo‘yicha Yevropaning kuchli 5ta chempionatida o‘ynayotgan hujumchilar orasida eng sermahsuli bo‘ldi. Ya’ni u barcha turnirlar hisobidan 10ta gol marrasiga yetgan birinchi o‘yinchi bo‘ldi.
Tushunarliki, Pentekning kuchli starti Yevropadagi eng sara klublarni sira befarq qoldirmayapti. Xususan, «Bavariya» vakillari «Jenoa»ning oxirgi o‘yinlarini diqqat bilan kuzatishmoqda, shuningdek, «Borussiya» D. va «Tottenxem» vakillari futbolchining atrofidagi voqealardan kelib chiqib, transfer imkoniyatini baholashmoqda. Hattoki, «Barselona» tomonidan ham qiziqish bor, har holda, kataloniyaliklar mavsum startida yetarlicha ochko yo‘qotishdi va bu holat rahbariyatni qo‘shimcha «resurs»lar qidirishga undamoqda. Lekin eng real variant sifatida «Bavariya» tilga olinmoqda, baribir. Myunxenliklar Kshishtofni kimsan Robert Levandovski o‘rniga mo‘ljallashmoqda.
«Frozinone»ga qarshi kechgan o‘yinda Pentek va jamoaning boshqa yangi futbolchilari o‘rtasida ajo-yib bog‘lam yuzaga kelayotgani yaqqol ko‘zga tashlandi. Deylik, «Jenoa» yozda Kot-d~ivuarlik 20 yoshli Kristian Kuame bilan shartnoma tuzgandi. Avvalgi mavsum «V» seriyasida «Chitadella»ning eng yaxshi to‘purari bo‘lgan afrikalik futbolchi o‘sha o‘yinda Pentekning 2ta goliga assistentlik qildi. Darvoqe, klub Kuame transferiga Kshishtofnikiga nisbatan 500 ming yevro ko‘proq to‘lagandi. Ayni payt Pentekni hattoki, Krishtianu Ronaldu bilan taqqoslamoqdalar. Chunonchi, portugaliyalik yulduz mavsumni uncha yaxshi boshlamadi. Polshalik yigit esa ayniqsa, o‘ng oyoq bilan beradigan zarbalari bilan hammani hayratga solmoqda. Uning texnik qobiliyati ham chakki emas.
E’tiborlisi, Pentek «Krakoviya»dagi oxirgi mavsumga qadar umuman ko‘zga tashlanmagandi. To‘g‘ri, «Jenoa» safiga yo‘l olishidan avval Polsha milliy chempionatida 36 marta maydonga tushib, 21ta gol urdi. Shundan 9tasi - penalti samarasi. «A» seriyasidagi ilk 8ta golini esa faqat o‘yin holatidan yuzaga keltirdi. Pentek yana golni chiroyli nishonlashi bilan ham ajralib turibdi.
Kshishtof Pentek 1995 yilning 1 iyul kuni tug‘ilgan (23 yosh). Amplua bo‘yicha - hujumchi. Polsha fuqarosi. Dzerjonyuv (futbolchi ulg‘aygan shaharcha)ning «Lexiya» klubi tarbiyalanuvchisi. Jamoadagi debyutini 2012 yili nishonlagan. Kshishtof keyingi yili Polsha oliy divizioni - Ekstra-klassda ishtirok etuvchi «Zaglembe» jamoasi safiga qo‘shilgan. Biroq yangi klubi o‘sha mavsum elitadan tushib ketadi. Shu tariqa Pentek birinchi divizionda o‘ynab, 8ta gol urish asnosida «Zaglembe»ning yana yuqori ligaga qaytishiga yordam beradi. Umuman, Kshishtof bu klub libosida jami 73 marta maydonga tushib, o‘z nomiga 15ta gol yozib qo‘yadi. 2016 yilga kelib, yosh iqtidorni Polsha futbolida o‘z o‘rniga ega klub - «Krakoviya»ga chaqirishadi. Qahramonimiz 2 yil davomida jamoaning 63ta o‘yinida ishtirok etib, jami 32ta gol urdi. Xususan, oxirgi mavsumdagi mahsuldorligi evaziga Yevropa klublari nazariga tushdi. Yakunda «Jenoa» Pentek uchun 4,5 mln. yevro to‘ladi. E’tiborlisi, Kshishtof Italiya klubidagi rasmiy debyutini «poker» bilan bezadi, yanada diqqatga sazovor jihati, uning Italiya kubogi bahsida «Lechche» darvozasini 4 bora ishg‘ol etishiga atigi 37 daqiqalik o‘yin vaqti kifoya qildi.
«Jenoa» mavsum startidagi ilk 7ta rasmiy o‘yin (1tasi kubok bahsi)da 15ta gol urdi va ulardan 80 foizi (12ta) aynan Kshishtof Pentek nomiga yozildi.
Polshalik futbolchi «A» seriyasining dastlabki 4ta turida 5ta gol urib, yorqin debyut masalasida Andrey Shevchenkoning 1999 yilgi ko‘rsatkichini takrorladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
