Бундан аввал Озарбайжоннинг "Нефтчи", Эроннинг "Падидех", Тошкентнинг "Бунёдкор", Жанубий Кореянинг "Ансан Гриннерс", Бухоронинг "Бухоро" жамоаларида фаолият олиб борган Баҳодир насимов айни дамда Озарбайжоннинг "Кешля" клубида тўп тепмоқда. Биз Насимов билан боғланиб фаолияти борасида суҳбатлашдик.
- “Кешля” клуби ҳозирги кунда қандай натижалар қайд этмоқда?
- Ҳозирги пайтда “Кешля” жамоаси яхши натижалар қайд этмаяпти. Сабаби, ҳозирги кунга қадар 7та тур учрашувлари ўтказилган бўлса, шулардан 4тасида мағлуб бўлдик, 2та баҳсда дуранг натижа қайд этдик ва 1та ўйинда ғалабани қўлга киритдик. Мен учун бу жуда ҳам ёмон натижа. Мен ғалаба қозонишни ёқтираман.
- Клуб олдига қандай вазифа қўйилган?
- Чемпионат аввалида раҳбарият томонидан кучли учликка кириш вазифаси қўйилган эди. Лекин, олдимизга вазифа қўйилган бўлса ҳам чемпионат баҳсларида ёмон натижа қайд этиб келяпмиз. Озарбайжон чемпионати келаси йилнинг май ойининг охирида якунига етади. Унгача олдимизда кўплаб учрашувлар бор. Олдимизда турган ўйинларда кўпроқ ғалаба қозониб очколаримизни кўпайтириб олишга ҳаракат қиламиз. Чемпионат сўнгида нечанчи ўринни эганлаганимизни билиб оламиз.
- Биламизки олдин ҳам Озарбайжон клубида фаолият олиб боргансиз. Аввалги чемпионат билан ҳозирги чемпионат савияси қай даражада?
- Бундан аввал Озарбайжон чемпионатининг савияси анча яхши эди. Бакунинг “Нефтчи” жамоасида фаолият олиб борган кезларим тўрт, беш нафар жамоалар чемпионлик учун кураш олиб борарди. Ҳозир эса биргина “Қорабоғ” жамоаси ўз олдига жиддий мақсадларни қўйган. Ушбу жамоа Европа лигаси ва чемпионлар лигасида иштирок этган. Ушбу жамоа билан рақобатлашаоладиган жамоа топилмаяпти. Шунинг учун ҳам тўрт ёки беш йилдан буён “Қорабоғ” чемпионликни қўлга киритмоқда.
- Аввал Бакунинг "Нефтчи" жамоасида тўпурар бўлгансиз. Кешля жамоасида бундай натижани такрорлашга нима тўсқинлик қилмоқда?
- Тўғри айтдингиз, Бакунинг “Нефтчи” жамоасида тўпурар бўлганман. “Нефтчи” жамоасида сафида деярли барча учрашувларда майдонда 90 дақиқа ҳаракат қилардим. Шунинг учун ҳам тўпурар бўлганман. “Кешля” жамоасида эса вазият умуман бошқача. Хоҳласа майдонга туширади хоҳламаса туширмайди. Захирада кўпроқ қолиб кетаётганлигим сабабли гол ура олмаяпман. Тўпурар бўлишимга мана шу нарса тўсқинлик қилмоқда.
- Клуб сафида жуда ҳам кам майдонга тушаяпсиз. Бунга сабаб нима?
- Тўғрисини айтсам, бунинг сабанини ўзим ҳам билмайман. Билганимда сизга айтган бўлардим. Энг алам қилаётгани, менинг позициямда ўйнаётган футбочлилар мендан кучли бўлмаса ҳам уларни майдонга туширмоқда. Мен “Кешля” жамоасидаги ҳужумчиларнинг бирортасидан ҳам кучсиз эмасман. Балким кучлидирман, лекин улардан кучсиз эмасман. Бош мураббий менинг ўйинимни ёқтирмайди. Шунга ўзим ҳам тушунмаяпман.
- Жамоада сиздан бошқа легионгерлар ҳам бор экан. Уларнинг савияси қай даражада?
- Жамоада жами 11 нафар легионернлар бор. Уларни ёмон дея олмайман. Улардан 6 нафари яхши жамоада фаолият олиб борган. Легионерларнинг барчасини зўр дея олмайман.
- Легионерларга қандай муносабатда бўлишади?
- Қайси клубда бўлишингиздан қатъий назар легионерлар маҳаллий футболчилардан икки, уч бош баланд бўлиши керак. Жамоадаги мураббийлар штаби легионерлардан шуни талаб қилади. Маҳаллий футболчиларга қараганда кўпроқ тер тўкиш кераклигини таъкидлашади.
- Сизлардан кўпроқ нарса талаб қилишадими?
- Мисол учун мендан кўпроқ гол уришимни талаб қилади. Гол уриш учун ҳам майдонга тушиб ўйнаш керак. Майдонга тушмасангиз қандай гол уришингиз мумкин? Ҳужумчининг иши рақиб жамоа дарвозасини ишғол қилиш, захирада ўтириш эмас.
- Биламизки сиз Жанубий Кореянинг Ансан Гриннерс клубида ҳам фаолият олиб боргансиз. Ушбу клубдан кетишингизга сабаб нима бўлди? Боиси Кореяда мунтазам равишда майдонга тушиб голлар ураётган эдингиз?
- Тўғри, Жанубий Корея чемпионатида мунтазам равишда майдонга тушардим. Лекин у ерда ўз позициямда ўйнамасдим. Ўнг қанот ярим ҳимоя чизиғида ҳаракат қилардим. Охирги пайтларда ушбу позицияда унча яхши ўйнай олмадим. Мени ҳужум чизиғига қўй, деб мураббийга айтардим. У бўлса мени ҳужумга қўймасди. Кейинчалик жамоа билан келишган ҳолда Ўзбекистонга қайтиб келдим.
- Ўзбекистон чемпионатида яна фаолият юритишни истайсизми?
- “Кешля” жамоаси билан май ойига қадар шартнома имзолаганман. Декабрда бу ерда биринчи давра якунига етади. Ўйин амалиётига эга бўлмасам, жамоа билан келишган ҳолда шартномамни бекор қиламан ва Ўзбекистонга қайтишим мумкин. Таклиф бўлса ватанимга қайтаман. Ҳозирча сабр қилиб туришим керак. Барчаси декабрда ҳал бўлиши мумкин.
- Озарбайжон чемпионатида легионерлар лимити қандай?
- Бир вақтнинг ўзида олти нафар легионер майдонда ҳаракат қилиши мумкин. Беш нафари эса маҳаллий футболчилар бўлиши шарт.
- Ўзбекистон миллий терма жамоасининг ўйинлари ҳақида нима дея оласиз? Эктор Купер бизни Жаҳон чемпионатига олиб чиқа оладими? Купер биз кутган мураббийми?
- Бошида кўпчилик терма жамоа яхши ўйин кўрсатмаяпти, ҳимоявий ўйин кўрсатмоқда дея Эктор Куперни танқид қилаётган эди. Ҳеч қачон барчаси дарров бирданига содир бўлмайди. Сўнги иккита Қатар ва Шимолий Корея терма жамоаларига қарши учрашувда Ўзбекистон миллий терма жамоаси яхши ўйин кўрсатди. Барча чизиқларда футболчилар ажойиб ўйин кўрсатишди. Энг асосийси ҳимоядан ўтказиб юбормасак ҳужумда гол уришимиз мумкин. Мисол учун, Эрон терма жамоаси шундай ўйин кўрсатиб ҳар йили Жаҳон чемпионатида иштирок этмоқда. Осиё чемпионатларида ҳам муносиб қатнашмоқда. Эктор Купер ўз ишини яхши биладиган мутахассис. Ушбу мураббий Ўзбекистон терма жамоасини Жаҳон чемпионатига олиб чиқади, деб ўйлайман. Энг аввало Осиё чемпионатида яхши натижа қайд этади, деб ўйлайман.
Абдуллоҳ суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ал-Ғарафа
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
