Ҳисоб-китобларга кўра, «кўҳна қитъа»нинг энг серхаражат клублари рўйхатини «Манчестер Сити» бошқариб турибди. Умуман, энг кучли лигаларда иштирок этувчи жамоалар қандай пул топяптию, уларни нималарга сарфлаяпти?
Бу саволнинг иккинчи бўғини ортиқча. Ахир клублар бюджетининг катта қисми харидлар ва маош тўловларига кетиши ҳаммага аён.
Спортни ўрганиш халқаро марказининг футбол лабораторияси (CIES Football Observatory) 2010-2018 йиллар оралиғидаги трансферлар масаласида тадқиқот олиб бориб, бир қатор эътиборли фактларга дуч келди.
Таҳлилда клубларнинг расмий ҳисоботлари ва медиа маълумотларига асос сифатида қаралган. Хуллас, Европанинг кучли 5та чемпионати (Англия, Испания, Германия, Италия ва Франция) элит дивизионлари клублари томонидан охирги 9 йилда амалга оширилган барча трансферлар ҳисобга олинган.
Алоҳида айтиш жоиз, трансфер суммаларидан ташқари, қўшимча тўловлар (бонуслар) ва ижара келишувлари учун сарфланган маблағ ҳам назардан четда қолган эмас.
ЙИЛДАН ЙИЛГА...
2018 йили Европанинг етакчи чемпионатлари клублари трансферлар учун жами 5,82 миллиард евро сарфлашди. Бунда қиш ва ёз бозоридаги харидлар қўшиб ҳисобланган. Ушбу сумма 2017 йилги кўрсаткичга нисбатан 2,4 фоиз камдир. Чунончи аввалги йили футболчилар харидига йўналтирилган маблағ 5,96 миллиард еврони ташкил этганди.
Лекин 2016 йилги харажат миқдори билан солиштирсак, бу сафаргиси сезиларли даражада кўп. Ўшанда трансферларнинг жами суммаси 4,23 миллиард еврога етганди. Демак, ўша кўрсаткичга нисбатан олсак, харажат нақ 37,6 фоиз ошди.
ЛИГАЛАР УЛУШИ
Тушунарлики, Европа футбол бозоридаги асосий харидор - бу АПЛ. Диққат қилинг, 2010-2018 йиллар оралиғида Европанинг 5та етакчи биринчилиги чекига тушган жами харажатнинг 37,4 фоизи Англия элит дивизиони иштирокчилари ҳиссасига тўғри келмоқда. Умуман, АПЛ клублари 2010 йилдан буён қолган 4та лига вакилларига нисбатан анча кўп сарфлади:
«А» серияси жамоаларига нисбатан 1,6 баравар кўп
Ла-лига жамоаларига нисбатан 2,1 баравар кўп
Бундеслига жамоаларига нисбатан 2,8 баравар кўп
Лига 1 жамоаларига нисбатан 3,1 баравар кўп.
ХАРАЖАТ ЭВОЛЮЦИЯСИ
2018 йили 2та чемпионат харажатлари ошди: АПЛ (+2,1 фоиз) ва Ла-лига (+80,4 фоиз). Испания жамоаларидаги катта ўсиш телевизион ҳуқуқлар сотуви яхши йўлга қўйилгани билан боғлиқ. Ҳар ҳолда, Испания Примероси ўйинлари эндиликда бутун дунёда кўрсатилмоқда ва трансляциялар ортидан яхшигина пул «оқиб» келмоқда.
Қолаверса, маҳаллий жамоаларнинг халқаро аренадаги ютуқлари таъсири ҳам бор, албатта. Биласиз, ўтган мавсум ЧЛда «Реал» (кетма-кет 3-марта) ва ЕЛда «Атлетико» ғалаба қозонди.
СЕРХАРАЖАТ КЛУБЛАР РЕЙТИНГИ
Энг серхаражат клублар рейтингини «Манчестер Сити» бошқариб турибди. «Шаҳарликлар» 2010-2018 йиллар оралиғида янги футболчилар харидига жами 1,47 миллиард евро сарфлашди. АПЛнинг яна бир вакили - «Челси»да умумий харажат миқдори бирозгина камроқ - 1,31 миллиард евро. Таҳлил учун олинган даврда трансферларга 1,25 миллиард евро ажратган «Барселона» эса 3-ўринда.
ЖОРИЙ ЙИЛ МАНЗАРАСИ
Фақат 2018 йилги харажатларни ҳисобга олсак, «Барселона» 1-ўринни эгаллади. Каталонияликлар трансферлар бозорида жами 321 миллион евро сарфлашди. Жорий йил «Ливерпуль» раҳбарияти ҳам харидларга бинойидек пул ажратди - 298 миллион евро. «Ҳотамтой» клублар рейтингининг 3-қаторидан 257 миллион еврога тенг харажат билан «Ювентус» бормоқда.
2018 йили энг кўп сарфлаган 20та клуб рўйхатига Франция ва Германиядан атиги 1тадан вакил (тегишлича «Монако» ва «Боруссия» Д.) кирганини алоҳида таъкидлаш ўринли. Қолган 18та жамоа Англия, Испания ва Италияники. Бу етакчи лигалардаги молиявий ҳолат турлича эканлигидан далолат. Дейлик, энг серхаражат 20та жамоадан 10таси АПЛ вакилидир.
СЕРДАРОМАД КЛУБЛАР РЕЙТИНГИ
Етакчи чемпионатлар клублари нафақат асосий харидор, балки бозорга маҳоратли футболчилар етказиб беришда ҳам илғордир. Рақамларда айтсак, 2010-2018 йиллар оралиғида сотув ҳажмининг 66,6 фоизи айнан 5та лига иштирокчилари ҳиссасига тўғри келди. 2018 йили эса бу кўрсаткич 69,9 фоизга етди.
Энг сердаромад клублар рейтингини «Монако» бошқариб турибди. Монегаскликлар охирги 9 йилда футболчиларни сотиш орқали деярли 1 миллиард евро топишди. Бу рўйхатда 5та етакчи лига вакиллари орасига Португалиянинг 2та жамоаси - «Бенфика» ва «Порту»нинг суқилиб киргани диққатга сазовор.
ТОТАЛ КАМОМАД
Агар клубларнинг трансферлар балансига қарасак, Европанинг кучли чемпионатлари клубларида тотал камомад борлигини кўрамиз. Эътибор беринг, 2010-2018 йиллар давомида жами камомад миқдори 7,29 миллиард еврони ташкил қилди. Бундай аянчли манзарининг бош сабабчиси - Англия Премьер-лигаси.
Ҳар ҳолда, камомаднинг нақ 78,3 фоизи айнан инглизлар зиммасида. «ПСЖ» гарчи охирги 9 йил ичида катта-катта харажатларга қўл урган бўлсада (клубнинг жами камомади - 874 миллион евро), Франция элит лигаси ижобий балансга эга: +199 миллион евро. Умуман, Лига 1 бу борада кучли чемпионатлар орасида ягонадир.
Алоҳида клубларда трансферлар баланси қандай? Ижобий фарққа эга жамоалар рейтинги юқориси табиийки, «Монако»га тегишли. Охирги 9 йилда жамоанинг харажат ва даромади ўртасидаги баланс +289 миллион еврони ташкил этди.
Фақат 2018 йилги кўрсаткич эса +66 миллион еврога тенг. Умуман, бу борадаги рейтингнинг юқори 10талигида Франция чемпионатидан нақ 5та клуб бор. Қолган 5та жамоа «А» серияси (3та) ва Ла-лига (2та) вакилидир. Қисқаси, АПЛ клубларига бу рўйхатда жой йўқ.
ГРАНДЛАР ЮҚОРИДА
Салбий балансга эга жамоалар рейтингини эса «Манчестер Сити» бошқариб бормоқда: -1,03 миллиард евро. 2-ўриндаги «ПСЖ»да камомад миқдори 874 миллионни ташкил қилмоқда. «МЮ» ҳам бу масалада асло мақтанолмайди: -772 миллион евро. 10та энг салбий баланс соҳибига қарасак, АПЛдан 5та вакил бор.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
