2014 йилги жаҳон чемпионатида учинчи ўринни олган Голландия терма жамоаси ЖЧ-2018нинг саралашидан ўта олмади.
Саралаш баҳслари давомида жамоа уч нафар мураббийни алмаштиришга улгурди. Тўғри, ЖЧ-2014дан сўнг жамоанинг Арьен Роббен, Уэсли Снейдер ва Робин ван Перси каби юлдузлари термадаги фаолиятларини якунлашди.
Уларнинг ўрнини тўлдириш эса осон кечмади. Хуллас, мундиалдан сўнг Голландия терма жамоасини Роналд Куман қабул қилиб олди. Унинг олдида катта тўсиқ бор эди. Яъни, голландлар Миллатлар Лигасида жаҳоннинг охирги иккита чемпиони - Германия ва Франция билан бир гуруҳдан жой олишганди. Ушбу рақибларга қарши кечган учрашувда Голландия терма жамоаси биз ўрганиб қолган ўйинни кўрсатди. Евро-2020 саралаш баҳслари бошланишидан олдин Куман FIFA.com сайтига интервью берди.
- Жамоани қабул қилиб олганингизга бир йилдан бироз ошди. Ўша пайтдаги жамоа билан ҳозиргисининг орасидаги фарқ қандай?
- Айни пайт жамоага бўлган талаб бироз ошган. Бу яхши ҳолат. Энди биздан Европа чемпионатининг саралаш баҳсларида яхшироқ натижа кутишади. Бундан олдинги саралаш ўйинларида мухлислар терма жамоага «тишларини қайрашганди». Хайриятки, натижаларимиз яхшиланиб бормоқда. Терма жамоадан худди олдингидек натижалар кутишмоқда. Шунингдек, ПСВ ва «Аякс» каби клубларимиз ҳам Чемпионлар Лигасида яхши иштирок этишмоқда.
- Сиз қаторасига иккита омадсиз саралашдан кейин жамоани қабул қилиб олдингиз. Сиздан олдинги мураббийларнинг иккиси катта тажрибага эга эди. Шунга қарамай, вазиятни ўзгартира олишмади. Термани қабул қилишдан олдин қандайдир иккиланишлар бўлдими?
- Умуман бундай бўлмади. Тўғри, ўз вақтида ўйин савияси тушиб кетди. Лекин вазиятни ўзгартира олишимга ишонгандим. Энди терма жамоа ўйнаганда стадионлар тўлмоқда. Охирги йилларда бундай ҳолат кузатилмаётганди.
- Ўзингиз айтганингиздек, терма жамоанинг муваффақиятидан сўнг «Аякс» ЕЧЛдаги мазмунли ўйинлари билан мухлислар қалбидан жой олди. Бу ҳолат терма жамоага қандайдир ижобий таъсир ўтказдими?
- Албатта, ёрдам берди. Бизнинг муаммоларимиздан бири Эредивизия эди. Маълумки, Голландия чемпионати савия борасида Англия, Германия ёки Испания лигаларига тенг кела олмайди. Лекин «Аякс» ва ПСВ клублари футболчиларининг ЕЧЛда олган тажрибалари терма жамоада қўл келмоқда.
- Терма жамоани қабул қилиб олганингизда «Бизда иқтидорлар етарли, лекин айрим жиҳатларни ўзгартиришимиз керак», дегандингиз. Бу қандай жиҳатлар эди ва уларни ўзгартириш осон кечдими?
- Биринчи ўринда ўйин услубини ўзгартирдик. Беш ҳимоячи билан ўйнай бошладик. Аммо ёзга келиб бу усулимиз ҳам ўзгариб, тўрт ҳимоячи билан ҳаракат қиляпмиз. Чунки футболчиларга шу услуб маъқулроқ экан. Боз устига, «Аякс» ва ПСВ ҳам шундай тактикада ўйнайди. Шу боис, ушбу клубларнинг футболчилари терма жамоада муаммога дуч келишмайди. Ўйинчиларнинг тизимни тушунишлари муҳим. Ўшанда ўзларини эркин ҳис қилишади. Қолаверса, терма жамоа мураббийлари йирик турнирлар олдидан футболчилар билан кўп вақт бирга бўла олишмайди. Бошқача усулда ўйнаш ҳар доим ҳам ўз самарасини беравермайди.
- Терма жамоа мураббийлигига қандай мослашдингиз?
- Энг аввало, миллий жамоани бошқариш ажойиб. Ватан термасини бошқаришдан фахрланиш керак. Клуб футболидаги кўп йиллик фаолиятимдан сўнг бу иш мен учун жуда муҳим эди. Албатта, клуб билан терма жамоада ишлашнинг фарқи бор. Хорижда ўйнаётган футболчилар билан кўришиш учун кўп саёҳат қиламан. Ўтган йилнинг сентябрь-октябрь ойларида ўйинлар кўп бўлди. Аммо ноябрдан мартга қадар тўрт ой ичида бирорта ҳам ўйин ўтказмадик.
- Миллатлар Лигасида охирги иккита жаҳон чемпионлари билан бир гуруҳдан жой олдинглар. Шунга қарамай, гуруҳда биринчи ўринни эгаллашнинг уддасидан чиқдинглар. Бу қандай юз берди?
- Бу - фантастика. Чунки гуруҳда Франция ва Германияни ортда қолдиришимизга ҳеч ким ишонмаганди. Гарчи мағлубиятга учраган бўлсакда, биринчи ўйин муҳим бўлганди. Гарчи натижа биз кутгандек бўлмасада, жуда яхши ўйнагандик.
- ЖЧ-2018 пайтида бўлажак рақибларнинг ўйинларини ўргандингизми?
- Шубҳасиз. Жаҳон чемпионатини диққат билан кузатиб, Франция каби бўлажак рақибларимиз ўйинларини ўргандик. Шунингдек, Англия ва Бельгия каби терма жамоаларнинг қандай тактикадан фойдаланишларига эътибор қаратдик. Ундан олган сабоқларимизни футболчиларимиз онгига сингдиришга ҳаракат қилдик.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
