2014 yilgi jahon chempionatida uchinchi o‘rinni olgan Gollandiya terma jamoasi JCH-2018ning saralashidan o‘ta olmadi.
Saralash bahslari davomida jamoa uch nafar murabbiyni almashtirishga ulgurdi. To‘g‘ri, JCH-2014dan so‘ng jamoaning Aryen Robben, Uesli Sneyder va Robin van Persi kabi yulduzlari termadagi faoliyatlarini yakunlashdi.
Ularning o‘rnini to‘ldirish esa oson kechmadi. Xullas, mundialdan so‘ng Gollandiya terma jamoasini Ronald Kuman qabul qilib oldi. Uning oldida katta to‘siq bor edi. Ya’ni, gollandlar Millatlar Ligasida jahonning oxirgi ikkita chempioni - Germaniya va Fransiya bilan bir guruhdan joy olishgandi. Ushbu raqiblarga qarshi kechgan uchrashuvda Gollandiya terma jamoasi biz o‘rganib qolgan o‘yinni ko‘rsatdi. Yevro-2020 saralash bahslari boshlanishidan oldin Kuman FIFA.com saytiga intervyu berdi.
- Jamoani qabul qilib olganingizga bir yildan biroz oshdi. O‘sha paytdagi jamoa bilan hozirgisining orasidagi farq qanday?
- Ayni payt jamoaga bo‘lgan talab biroz oshgan. Bu yaxshi holat. Endi bizdan Yevropa chempionatining saralash bahslarida yaxshiroq natija kutishadi. Bundan oldingi saralash o‘yinlarida muxlislar terma jamoaga «tishlarini qayrashgandi». Xayriyatki, natijalarimiz yaxshilanib bormoqda. Terma jamoadan xuddi oldingidek natijalar kutishmoqda. Shuningdek, PSV va «Ayaks» kabi klublarimiz ham Chempionlar Ligasida yaxshi ishtirok etishmoqda.
- Siz qatorasiga ikkita omadsiz saralashdan keyin jamoani qabul qilib oldingiz. Sizdan oldingi murabbiylarning ikkisi katta tajribaga ega edi. Shunga qaramay, vaziyatni o‘zgartira olishmadi. Termani qabul qilishdan oldin qandaydir ikkilanishlar bo‘ldimi?
- Umuman bunday bo‘lmadi. To‘g‘ri, o‘z vaqtida o‘yin saviyasi tushib ketdi. Lekin vaziyatni o‘zgartira olishimga ishongandim. Endi terma jamoa o‘ynaganda stadionlar to‘lmoqda. Oxirgi yillarda bunday holat kuzatilmayotgandi.
- O‘zingiz aytganingizdek, terma jamoaning muvaffaqiyatidan so‘ng «Ayaks» YECHLdagi mazmunli o‘yinlari bilan muxlislar qalbidan joy oldi. Bu holat terma jamoaga qandaydir ijobiy ta’sir o‘tkazdimi?
- Albatta, yordam berdi. Bizning muammolarimizdan biri Erediviziya edi. Ma’lumki, Gollandiya chempionati saviya borasida Angliya, Germaniya yoki Ispaniya ligalariga teng kela olmaydi. Lekin «Ayaks» va PSV klublari futbolchilarining YECHLda olgan tajribalari terma jamoada qo‘l kelmoqda.
- Terma jamoani qabul qilib olganingizda «Bizda iqtidorlar yetarli, lekin ayrim jihatlarni o‘zgartirishimiz kerak», degandingiz. Bu qanday jihatlar edi va ularni o‘zgartirish oson kechdimi?
- Birinchi o‘rinda o‘yin uslubini o‘zgartirdik. Besh himoyachi bilan o‘ynay boshladik. Ammo yozga kelib bu usulimiz ham o‘zgarib, to‘rt himoyachi bilan harakat qilyapmiz. Chunki futbolchilarga shu uslub ma’qulroq ekan. Boz ustiga, «Ayaks» va PSV ham shunday taktikada o‘ynaydi. Shu bois, ushbu klublarning futbolchilari terma jamoada muammoga duch kelishmaydi. O‘yinchilarning tizimni tushunishlari muhim. O‘shanda o‘zlarini erkin his qilishadi. Qolaversa, terma jamoa murabbiylari yirik turnirlar oldidan futbolchilar bilan ko‘p vaqt birga bo‘la olishmaydi. Boshqacha usulda o‘ynash har doim ham o‘z samarasini beravermaydi.
- Terma jamoa murabbiyligiga qanday moslashdingiz?
- Eng avvalo, milliy jamoani boshqarish ajoyib. Vatan termasini boshqarishdan faxrlanish kerak. Klub futbolidagi ko‘p yillik faoliyatimdan so‘ng bu ish men uchun juda muhim edi. Albatta, klub bilan terma jamoada ishlashning farqi bor. Xorijda o‘ynayotgan futbolchilar bilan ko‘rishish uchun ko‘p sayohat qilaman. O‘tgan yilning sentyabr-oktyabr oylarida o‘yinlar ko‘p bo‘ldi. Ammo noyabrdan martga qadar to‘rt oy ichida birorta ham o‘yin o‘tkazmadik.
- Millatlar Ligasida oxirgi ikkita jahon chempionlari bilan bir guruhdan joy oldinglar. Shunga qaramay, guruhda birinchi o‘rinni egallashning uddasidan chiqdinglar. Bu qanday yuz berdi?
- Bu - fantastika. Chunki guruhda Fransiya va Germaniyani ortda qoldirishimizga hech kim ishonmagandi. Garchi mag‘lubiyatga uchragan bo‘lsakda, birinchi o‘yin muhim bo‘lgandi. Garchi natija biz kutgandek bo‘lmasada, juda yaxshi o‘ynagandik.
- JCH-2018 paytida bo‘lajak raqiblarning o‘yinlarini o‘rgandingizmi?
- Shubhasiz. Jahon chempionatini diqqat bilan kuzatib, Fransiya kabi bo‘lajak raqiblarimiz o‘yinlarini o‘rgandik. Shuningdek, Angliya va Belgiya kabi terma jamoalarning qanday taktikadan foydalanishlariga e’tibor qaratdik. Undan olgan saboqlarimizni futbolchilarimiz ongiga singdirishga harakat qildik.
Paxtakor
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
