Бугун Европа чемпионлар лигасининг 1/4 финалининг дастлабки ўйинида "Манчестер Юнайтед" ўз майдонида "Барселона"ни қабул қилади, "Ювентус" эса Амстердамнинг "Аякс" билан куч синашади.
Сульшер - янги Зиданми?
«Манчестер Юнайтед» - «Барселона»
10 апрель. Манчестер. «Олд Траффорд» стадиони. 00:00
«Барселона» ва «МЮ» ўртасидаги қарама-қаршилик ёрқин тарихга эга: Кубок эгалари кубогидаги бир финал, Чемпионлар лигасидаги икки финал ва бир ярим финал, 1998-99 йилги мавсумда гуруҳ босқичдаги иккита ўйинда ҳам бир хилда - 3:3 ҳисобидаги дуранглар - Ўша мавсумда «МЮ» финалга чиқиб бориб, «Бавария»ни қўшимча дақиқаларда урилган голлар эвазига енгиб, тарихий чемпионликка эришганди.
Ҳозирда ўша финал ўйинида гол урган Оле Гуннар Сульшер - «МЮ»да бош мураббий. Ўтган ой охирида жамоа раҳбарияти ундан «вақтинчалик бош мураббий» тамғасини олиб ташлаб, доимий асосда бош мураббий этиб тайинлади ва у билан янги шартнома имзолади. Шундай экан, кейинги мавсумда «Олд Траффорд»да кучли жамоа бўлиши кафолатланган. Лекин суперклуб бош мураббийи бўлиш бошқа, ЕЧЛ ғолибининг бош мураббийи бўлиш бошқа. 1/8 финалда Сульшер жамоаси мўъжиза эвазига кейинги босқичга ўтди. Аммо «Барселона»га қарши ўйинда VAR ёрдам бера олмаслиги мумкин. «Тоғлар забт этиш учун йўлдан чиқади», дея Сульшернинг «ПСЖ»га қарши жавоб ўйинидан олдин айтган сўзларини такрорлади «МЮ» яримҳимоячиси Хуан Мата.
Шанба куни Сульшер ва унинг таниқли ёрдамчиси Майк Феллан Каталонияга келиб, бўлажак рақиб қандай қилиб «Атлетико»ни «ер тишлатгани»га ўз кўзлари билан гувоҳ бўлишди. Кўк-анорранглилар Испанияда чемпионлик масаласини амалда ҳал қилиб бўлишди ва энди бор эътиборларини Чемпионлар лигасига қаратишлари мумкин. «Барселона» 2015 йилдан буён ЕЧЛ кубогини кўрганлари йўқ, энди эса кубокни Каталонияга олиб келиш учун барча шароитлар муҳайё - қаторасига 3 йил давомида «қулоқли кубок»ка эгалик қилган «Реал» аллақачон турнирни тарк этган ва тахт бўш қолган. Бошқа томондан эса, Сульшернинг мураббийлик фаолияти «Реал» билан қаторасига Чемпионлар лигаси ғолиби бўлган, 2,5 йил ичида 9та соврин қўлга киритган Зиданнинг мураббийлик фаолияти бошланишига ўхшайди. Шундай экан, «Барселона» эҳтиёткор бўлиши талаб этилади.
Роналду «Реал» учун қасос оладими?
«Аякс» - «Ювентус»
10 апрель. Амстердам. «Йохан Кройф Арена» стадиони. 00:00
«Реал» - «Ювентус» жуфтлиги «Барселона» - «МЮ» қарама-қаршилигини ҳам сояда қолдирган бўларди, аммо «Аякс» Криштиану Роналду «Сантьяго Бернабеу»га қайтишига йўл қўймади ва португалиялик футболчига ўзи пешвоз чиқди.
Балки, Амстердам Роналдунинг ўйинларига гувоҳ бўла олмас. Роналду март ойи охирида Португалия терма жамоаси сафида орттириб олган жароҳати туфайли қарийб икки ҳафтадан буён футбол ўйнамаяпти. Матбуот ҳам, «Ювентус» бош мураббийи Массимилиано Аллегри бот-бот унинг «Аякс»га қарши ўйинга тайёр бўлиши ҳақида айтаётган бўлсада, бу масала узил-кесил ҳал бўлмаган. ОАВнинг охирги хабарларида Роналду биринчи ўйинда бошланғич таркибда тушмаса ҳам, охирги 20-30 дақиқаликда майдонда бўлиши ҳақида айтилмоқда.
«Биз «Реал»га қарши ўйнагандек ўйнаб, натижага эришмоқчимиз. Энди бутун Европа биз исталган рақибни енга олишимиз мумкинлигини билади. Биз ҳеч кимдан қўрқмаймиз», деди ўйиндан олдин «Аякс» ҳимоячиси Николас Тальяфико.
Лекин унутмаслик керакки, бу мавсумдаги «Ювентус» бу мавсумдаги «Реал»дан кучлироқ. Қолаверса, аргентиналик футболчининг бу олифталиги унинг бир неча кун олдин Нидерландия чемпионати доирасида «Эммен»га қарши ўйин вақтида ҳисоб «Аякс» фойдасига 5:0 ҳисобида ҳал бўлиб турганида урган автоголи фонида бироз кулгили кўринади.
«Ювентус»га қарши ўйинда ҳар бир хато қимматга тушиши мумкин. Бу ўйинда Роналду майдонга тушиш-тушмаслигидан қатъи назар хато қилмаслик керак. Роналду бўлмаса, бошқа ҳужумчилар бор. Агар Роналду бўлса янада яхши, чиройли голлар ва «Реал» учун қасос. Бир йил муқаддам Роналду Чемпионлар лигаси чорак финалида айнан «Ювентус»га қарши Туринда кечган ўйинда қайчи услубидаги зарбаси билан мезбон мухлисларнинг ҳам олқишларига сазовор бўлганди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
