Криштиану Роналду ЕЧЛ чорак финали доирасида «Аякс»га қарши кечган илк ўйинда турнирнинг тўпурарликка дахлдор бир неча рекордини янгилаганди, лекин унинг 700та гол маррасига етишига ҳали бор.
Аниқроқ айтсак, португалиялик юлдуз бутун фаолияти давомида ҳозирга қадар жами 682та голга муаллифлик қилган. Гап шундаки, «Аякс» билан Амстердамдаги учрашувдан сўнг айрим ОАВда Роналду фаолиятидаги 700-голини нишонлагани ҳақида маълумот берилди. Албатта, бу феноменал натижа ҳисобланади. Ахир бутун футбол тарихида расмий ўйинларда 700та гол маррасига етиш атиги 5 нафар буюк тўпурарга насиб этган - Герд Мюллер (735та), Ференц Пушкаш (746та), Пеле (767та), Ромарио (772та) ва Йозеф Бицан (805та). Демак, Криштиану яқин орада суперюбилейни нишонлаб, беназир бешликни олтиликка айлантириши мумкин.
Нега шошилишди?
Савол туғилади: Роналдунинг 700та гол маррасига етгани ҳақидаги маълумот қаердан олинди? Ахир ахборот-коммуникация соҳаси ривожланган замонда яшаяпмиз ва мегаюлдуз статистикаси масаласида хато қилиш ақлга сиғмайди. Маълум бўлишича, 700та гол марраси ҳақида бонг урган ОАВ вакиллари Роналдунинг «катта» ва «кичик» голларини қўшиб ҳисоблашган. Аниқроқ айтсак, улар «Ювентус» етакчиси томонидан вақтида Португалия ёшлар ва олимпия термалари сафида урилган голларни ҳам умумий ҳисобга қўшишган. Шу тариқа ахборот оламида англашилмовчилик юзага келди. ФИФА тамойилига кўра эса, футболчининг шахсий статистикасига унинг клублар миқёсидаги расмий турнирлар ва терма жамоаси (расмий ва ФИФА рўйхатига олинган ўртоқлик ўйинлари) сафида урган голлари киритилади.
Мессидан «Қочиб» кетиш
Аслида португалиялик ҳисобида «атиги» 682та гол мавжуд. Тушунарлики, шунинг ўзи ҳам кўп, жуда кўп. Ҳар ҳолда, амалдаги футболчиларга қарасак, ҳеч ким Роналдучалик кўп гол қувончини туйган эмас. Таққослаш учун албатта, Криштианунинг бош рақобатчиси Лионель Месси статистикасига қараймиз. Аргентиналик футболчи шу кунга қадар 662та голдан хирмон ясади. Лео сешанба оқшоми «МЮ»га қарши кечган ЧЛ баҳсида «дубл»га эришди. Натижада Роналду - Месси қарама-қаршилигида фарқ бирозгина қисқарди: португал шоввози энди 20та гол кўринишида олдинда. Криштианунинг «Аякс» билан баҳсларда ЧЛга дахлдор қандай юқори кўрсаткичларни забт этганига келсак, улар 3та:
- ЧЛда 126-голини урди (рекорд);
- ЧЛ «плей-офф» раундларида 65-голини урди (рекорд);
- ЧЛ чорак финал раундида 25-голини урди (рекорд).
Хуллас, «Ювентус» ҳужумчиси ўзига тегишли 3та рекордни янгилади. Лекин у хотиржам бўлолмайди, барибир. Бинобарин, пойгада бош таъқибчиси - Лео Мессининг нафасини шундоқ ҳис қилиб турибди. Мисол учун, «Барса» етакчиси жорий ЧЛда рақиблар дарвозасини 10 марта нишонга олган бўлса, Криш энди 6-голини расмийлаштирдию, курашдан четга чиқди. Қизиқ, Роналдуга тегишли 3та рекорд кўрсаткич бўйича аргентиналикнинг натижаси қандай? У ҳозирча рекорддан анча орқада:
- ЧЛдаги умумий голлари сони - 110та;
- ЧЛ «плей-офф» раундларидаги голлари сони - 44та;
- ЧЛ чорак финал раундидаги голлари сони - 12та.
КУБОК ФАКТОРИ
Роналду «Аякс» билан ўйинларда айнан кубок (олимпия) тизимидаги босқичларда самарани ошира олишга қодирлигини яна бир бора исботлади. Бунга унинг жорий ЧЛдаги статистикаси яққол мисол: 6та голидан атиги 1тасини гуруҳ раундида урган «Юве» юлдузи 1|8 ва 1|4 финаллар доирасидаги 4та ўйинда рақиб жамоаларни 5 бора жазолади. Яна бир томони, Турин клубининг «плей-офф»-2019даги барча голлари айнан Роналду номига ёзилди. Қизиқ маълумот: Криштиану ЧЛдаги дебют голини «Аякс» билан ўйин вақтидан роппа-роса 12 йил муқаддам айнан чорак финал учрашувида нишонлаган эди. Аниқроқ айтсак, у 2007 йилнинг 10 апрель куни «Рома» дарвозасига тўп киритган. Умуман олганда, Роналду мавсум-2003|2004дан буён ўз жамоалари - «МЮ», «Реал» ва «Ювентус»нинг ЧЛ «плей-офф» босқичларида урган жами голларидан нақ 43,9 фоизига муаллифлик қилгани билан мақтанишга ҳақли. Ҳа, у «ҳаёт-мамот» олишувларига мослашган чинакам жангчи!
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
