Футбол оламида авлодлар алмашинуви муҳим ўрин тутади. Негаки, ҳар бир замоннинг ўз қаҳрамони бўлиши керак. Бир пайтлар яшил майдонда ўз номини муҳрлаган Пеле ва Марадона изидан қатор юлдузлар етишиб чиқди. Улар орасида эса Роналду ва Месси билан бир даврда тўп сураётган бўлса-да, бу футболчиларнинг соясида қолиб кетмасдан, ўзига хос иқтидори билан мухлислар қалбидан жой олаётган ёш футболчилар ҳам талайгина. Ана шундай чарм тўп усталаридан бири болалигида кўплаб қийинчиликларга дуч келган бўлса-да, онасининг ёрдамида олға интилган ва бугунги кунда дунё футболида ўз ўрнига эга бўлиб бораётган ўйинчи, «Манчестер Сити» футболчиси Раҳим Стерлингдир.
«МЕНИ ДЕБ КЎП АЗОБ ЧЕККАНСИЗ»
Стерлинг онасини жуда яхши кўради. Шунинг учун бир гапни такрорлашни ёқтиради: «Онажон, мени бағрингизда тўққиз ой кўтариб юрганингиз учун катта раҳмат, ахир сиз мени деб жуда кўп азоб чеккансиз».
Раҳим онаси у учун кўп иш қилганини таъкидлашдан чарчамайди. «Онам — ҳаётимнинг ажралмас бўлаги, чунки у ҳозирги муваффақиятга эришишим учун кўп ҳаракат қилган. Мен унинг маслаҳатларини доим эшитаман ва амал қиламан, чунки онам менга ҳеч қачон нотўғри маслаҳат бермаган. Онам футболни тушунади ва янада яхшироқ тушунишни хоҳлайди. У ҳатто ўзини Жозе Моуриньодан кам эмас, деб ўйлайди. Мен қачон ниманидир хато қилаётган бўлсам, дарҳол тўғри йўл кўрсатади. Кўп ҳолларда «Гапларимга қулоқ солмайсан», деб койиб қўяди. Баъзи-баъзида тортишиб ҳам қоламиз».
Футболчининг онаси 5 ёшли ўғлининг келажаги учун Ямайкадан Англияга кўчиб ўтишга қарор қилади ва шу ердан иш топади. Стерлинг мактабда ўзининг ғалати хатти-ҳаракатлари, хулқидаги нуқсонлари билан ажралиб турарди. Ҳатто «VernonHouse» махсус мактабида таҳсил олган кезларида ўқитувчиси унга «Агар хулқинг ўзгармаса, ё қамоққа тушасан, ёки инглиз футболчиси бўласан», деган экан. Ўқитувчининг башорати кейинчалик амалга ошди, Раҳим Стерлинг ёш бўлишига қарамай, аввал «Ливерпуль», ҳозир эса «Манчестер Сити» ва Англия терма жамоасининг иқтидорли ўйинчисига айланди. Стерлинг 11 ёшида «Куэнс Парк Ренжерс»да ўйнай бошлайди ва тезда тенгдошлари унга янги лақаб топишди — футболчи «Раҳим Парк Ренжерс»га айланди.
«РОЖЕРС МЕНГА КАТТА ЁРДАМ БЕРГАН»
Футболчи Англия терма жамоасининг собиқ бош мураббийси Рой Хожсонни жуда ҳурмат қилади. «Хожсон нималарга қодирлигимни олдиндан кўра олади. Мен эса ўйиним унга маъқул келишини истардим. У ёш бўлишимга қарамай, менга имкон бериб келган. Бунинг учун терма жамоа бош мураббийидан беҳад миннатдорман. Рой Хожсон ўйинчиларни менинг атрофимга жойлаштирарди, у кўпинча шу тактикани маъқул кўрарди. Мен эса майдонда кўз илғамас жиҳатларга ҳам эътибор қиламан, мен янада яхшироқ бўлишни хоҳлайман».
Раҳим Стерлинг «Ливерпуль» устози Брендан Роджерс ҳақида ҳам илиқ фикрлар билдиради. Брендан унга жуда катта ёрдам берганини такрорлашдан чарчамайди.
«Роджерс нафақат майдонда, балки майдондан ташқарида ҳам мендан қимматли маслаҳатларини, беминнат ёрдаминини аямаган, — дейди ўйинчи. — У ҳатто баъзи муаммоларимни битириш учун моддий жиҳатдан кўмак ҳам бериб турган ва бунинг учун унга катта раҳмат айтаман».
«ЛИВЕРПУЛЬ» — ЭНГ ЗЎРИ
Раҳим Стерлинг ўз вақтида «Ливерпуль»ни дунёнинг энг кучли клуби деб баҳолаган ва бу фикрини қуйидагича изоҳлаган: «Ливерпуль» мен учун энг зўр клуб. Йўқ, мен куч борасида айтмаяпман. «Ливерпуль»да ғурур, шаън, қадр-қиммат биринчи ўринда. «Қизиллар» сафида ўз манфаатини жамоа шаънидан устун қўядиган футболчиларга жой йўқ. Мен фидойи футболчилар билан бирга ўйнаяпман, деб айта оламан. «Ливерпул»дан кетишни истамайман, чунки мен шу клубда танилдим. Қолаверса, биз премьер-лигада ғолиб бўлишни ният қилганмиз. Биз бунга ишонамиз ва биргаликда ҳаракат қиламиз. Олдимизга қўйган мақсадимизга эришишни ният қилганмиз ва эришамиз ҳам». Аммо бугун унинг гаплари исботини топмади. «Ливерпуль»дан кетишни истамайман деган футболчи бироз муддатдан кейин «Манчестер Сити»га кўчиб ўтди.
Унинг бошқа бир орзуси — Бразилияда яшаш. Унинг татиуровкаларида «Уэмбли» стадиони ва ўтмишини эслатувчи кўплаб нарсалар тасвирланган. Стерлинг 5 мартда Дания терма жамоасига қарши ўйиндан сўнг хаёлот оламида эмас, орзулари амалга ошадиган реал оламда яшаётганлигини ҳис қилганини кўп бора такрорлайди.
Раҳим Стерлинг. Бу футболчи айни дамда юлдузлик чўққисига интилмоқда. Айни дамда терма жамоа сафида ҳам, клуб сафида ҳам муҳим голларга муаллифлик қиляпти. Ишонамизки, Раҳим ана шундай мўъжизалар кўрсатишда давом этади.
Низомжон ИСЛОМОВ тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
