Бугун қувончли хабар тарқалди. Охирги пайтларда ҳам “Ростов”да, ҳам терма жамоа сафида рақибларини аямай савалаётган Элдор Шомуродовга даъвогарлар сони ортибди.
Қувонарлиси, бу сафаргиси аниқ фактлар: “Штутгарт” Элдор Шомуродов учун 10 млн евро беришга тайёр. Хўш, Элдор Бундеслиганинг айнан шу жамоасига ўтиши керакми?
Йўқ. Биринчидан, “Штутгарт” айни дамда қуйи лигада. Бундеслигада эмас. Элдор Шомуродов эса агар Германияга кўчиб ўтадиган бўлмаса, ҳеч бўлмаганда Европа лигаси учун курашадиган ва бу турнирда қатнашадиган клубига ўтиши керак. Масалан, “Лейпциг”. Агар ана шу клубдан таклиф тушса, Элдор ҳеч иккиланмасдан ўтса бўлади. Ҳамюртимиз ушбу клубда бемалол ўйнаб кета олади. Германиянинг қуйи лигасидаги жамоасига ўтиш Элдорнинг ҳозирги ҳолатида кўтарилиш эмас, шўнғиш бўлади.
“ЦСКА” варианти-чи? Йўқ. Бу шунчаки тўртинчи зинадан учинчи зинага кўтарилишдек гап. Ва шу зинада камида 1-2 йил қолиб кетиши мумкин. Бу эса вақтни йўқотишдан бошқа нарса эмас. Тўғри, “ЦСКА” халқаро турнирларда қатнашиб юрган жамоа, лекин Элдор ҳозирдан Европага интилмаса, кейин Европа футболи учун қарилик қилиб қолиши мумкин. Европа суперлига эмаски, 28-29 ёшли футболчиларни нормал қабул қиладиган. Режага кўра, Элдор ҳозирданоқ Европага интилиши лозим.
Яна қандай вариантлар бор? Италия чемпионатида ҳам Элдор ўйнаб кета оладиган жамоалар топилади. Масалан, “Лацио”, “Фиорентина” ёки майли “Рома”ниям қўшайлик. “Интер”, “Наполи” ва “Ювентус”да қийинроқ. Ҳозир Элдорга рақобатда ютқазиб, захирага михланадиган эмас, кураша олиб, кўпроқ майдонга тушадиган жамоа керак. Шунинг учун биз таъкидлаган учта жамоадан бирига ўтса ҳам ёмон бўлмайди.
Францияда Элдор учун мос келадиган вариант камроқ. “Лион”ни айтиш мумкин, нисбатан барқарор ўйнайди. Қолган клубларга эса ишонч йўқ. “ПСЖ”да-ку Элдорга жой йўқ.
Испанияда ҳам худди Италиядаги каби ҳамюртимиз учун муқобил вариантларни келтириш мумкин. “Севилья”, “Валенсия”, “Вильярреал” ва ҳоказо...
Англияда вариантлар кўп, лекин инглиз футболи бошқа чемпионатларникидан мушкулроқ, тезкорроқ. АПЛда босим жуда катта. АПЛда тажрибали футболчилар бошқа чемпионатларникига қараганда кўпроқ. Шундай бўлса-да, Элдор учун муносиб клублар топилади — “Эвертон”, “Лестер”, “Вест Хэм”. АПЛ шундай чемпионатки, гарчи халқаро турнирларда қатнашмасаям бу чемпионатда ўйнашнинг ўзи Элдор учун етарли бўлиши мумкин, АПЛ Элдорга кўп нарса ўргата олади. Фақат ўша гап — имкониятига қараб қадам ташлаши лозим.
Элдор бир жиҳатни унутмаслиги керак, у айни дамда Европагача бошқа бир клубни кўприк қиладиган ёшда эмас. Шунинг учун Европадан қулайроқ таклиф бўлса, иккиланмаслик керак. Бордию агар “ЦСКА”ни охирги вариант сифатида танлаш мумкин.
Шуни алоҳида таъкидлаш керакки, Элдорнинг ҳозирги имконияти Одил Аҳмедовнинг имкониятидан ҳам яхшироқ. Бир пайтлар “Ювентус”да тузук-қуруқ ўйнамаган бўлса ҳам ўша клубга борган Илёс Зейтуллаев билан фахрланардик, ҳозир ҳам фахрланиб қўямиз. Ажаб эмас, Элдор Шомуродов бу зиналарни ҳам босиб ўтса ва биз кучли бешликда Элдорнинг жамоасига мухлислик қилсак. Худо хоҳласа, шу кунлар келади.
Юқоридаги биз келтирган вариантлар баландпарвозроқ туюлиши мумкин. Майлида, Аллоҳ тоғ сўрасанг, қир беради, дейишади ота-боболаримиз. Биз ҳам катта ният қиляпмиз. Ниятни бутун қиляпмиз. Илоҳим амалга ошсин. Элдорга эса абадий камтарлик, самимият ва омад тилаб қоламиз.
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
