Ташқарида қор ва анчайин совуқ об-ҳавода кучли 5 лик чемпионатлари, футбол ишқибозларига юқори ҳарорат, ёқимли ҳордиқ ва кўтаринкилик бера олиши шубҳасиз. Терма жамоа йиғинларига ажратилган муддат ниҳоясига етиб, ўз клублари ихтиёрига етиб келган суюкли футболчилар иштирокидаги ўйинлар эса янада мароқли.
Бугун тунда, мана шундай клублар ва футболчилар иштирокида Испания ЛаЛигаси 10 турининг марказий баҳси, “Ванда Метрополитана“да, мезбон “Атлетико Мадрид“ ҳамда меҳмон “Барселона“ ўртасида кечади.
“Атлетико Мадрид“ йилдан йилга ўз даражасини ошириб бормоқда. Диего Симеоне услубида бироз ўзгариш сезилиши мумкин, аммо асл фалсафа ўша-ўшалигича қолмоқда. Буни, ортда қолган 10 тур мобайнида энг кам, 2 та гол ўтказилганлиги ҳам кўрсатиб турибди. Демакки, жамоа ҳимоявий ўйин борасида ҳозир ҳам ҳар қандай рақибга бош оғриқ бўла олади. Шунинг баробарида голлар ёмғирни ёғдириши ҳам эҳтимолдан ҳоли эмас. Рақобатчилардаги вазият, қолаверса Мадрид жамоасининг бу йилги шашти фонида “матрасчилар“нинг айнан ушбу мавсумда Испания чемпионлиги минбарига чиқиш имкониятига юқорироқ баҳо бериш мумкин. Қўшимча омил сифатида, асосий футболчилар ўз ўзидан етакчига айланаётганини ҳам келтириш ўринли. Ўтган мавсум ўзига ўхшамаган Жоау Фелишни жамоа мухлислари энди-энди танияпти, Маркос Льоренте ҳам олдинги чизиқда муҳим фигурага айланган, Каталониядан кўчиб келган Луис Суарес тезликда сермаҳсуллик намойиш этаётгани(бошқача бўлиши ҳам мумкинми?),Томас Партей трансферидан сўнг майдон марказидаги бўшлиқни тўлдириши учун олиб келинган Лукас Торрейранинг жамоага ижобий қўшилиб кета олиши қисқа қилиб айтганда, кўзга кўринарли яхлитлик юзага келган. Яна бир эьтиборга молик жиҳат, Симеоне шогирдлари Примерода ҳали маглубият аламини тотиб улгурмаган. Кўриниб турибдики, барқарорлик борасида бугун мезбон мақомидагилар етарлича хотиржам.
Рональд Куман ва унинг “Барселона“си ҳақида бугунгача жуда кўп ва хуп гапирилди. Бу ёғига жамоани кузатиш ва натижаларни таҳлил қилиш ўринли. Ўз ўйинини топиб бораётган каталонияликларда ижобий ўзгаришлар секин-асталик билан кўзга ташланмоқда. Мураббий ишонч билдираётган футболчилар бу ишончни максимум оқлашмоқда дейиш мумкин. Эскилари ҳам ўз даражасида. Бир масала бор, у ҳам бўлса, Куман "ЛаМасия" тарбияланувчиларига унчалик ҳам ҳозиржавоб эмас, ҳозирча. Аммо, доим натижа бирламчи эканлигини ҳисобга олсак, бу қанчалик хавотирли деган саволга ҳар қандай ротация унинг режасида бўлган мураббийгина жавоб бера олади.
Бугунгача, кўрсатгичлар тобида. Жамоа, нидерландиялик мутахассис қўл остида ўтказган жами 13 учрашувдан 9 тасида зафар қучган, қолганларида 2 дуранг ва 2 мағлубият қайд этган. Ушбу жамоадан кўплаб позитивларни излаб топиш мумкин, лекин Мессининг Каталониядаги кейинги фаолияти сўроқ остидалклиги ва бу ҳолат жамоанинг бошқа ёрқин вакилига таъсир кўрсатиши ягона ва кўлами катта негативни юзага келтириши аён. Ҳа, сўнгги вақтларда Лео Месси ҳамда Антуан Гризманн ўртасидаги муносабатлар самимий эмас, Месси, французнинг муваффақият эшикларини ёпиб турибди дегувчилар талайгина. Аммо бу фикрлар қанчалик асосли ёки йуқ буни 90 дақиқалик, майдондаги ҳаракатларда тулақонли асосланмаяпти. Фақатгина, футболчининг жамоа сафидаги қовушмаган ўйинига фақат ўзи сабабчи деган таҳминий хулоса мавжуд.
Дарвоқе, бугунги баҳс Антуан учун ҳам бўлакча аҳамиятли бўлса ажаб эмас. Футболчи, Атлетикога қарши жами 10 маротаба тўп суриб(шундан 2 таси Барселона таркибида), бирон марта гол урмаган.
Умуман олганда, ҳисоб-китобларга кўра бу ёғига ҳаммаси ижобий томонга бурилиши керак, аслида. Инқилобий ўзгаришларни эса янги, расмий раҳбарият сайланган кейин кутиш ҳақиқатга яқинроқ. Акс ҳолда, бир неча йилдан бери такрорланиб келаётган хатоларни жамоа мухлислари ортиқ ҳазм қила олишмаса керак.
Томонлар бугунга қадар умумий 235 бора тўқнаш келишган бўлиб, шундан 105 ўйинда “Барселона“устунлик қилган бўлса, 75 маротаба “Атлетико Мадрид“нинг қўли баланд келган. 55 ўйинда жамоалар дуранга имзо чекишган. Бугун оқшомда, “кўканорранглилар“сафида 800 чи расмий баҳсини ўтказиши кутилаётган Месси, Мадрид жамоасига қарши кечган 41 ўйинда 32 бор рақиблари дарвозасини ишғол этган. Айнан
“Ванда Метрополитано“да кечган сўнгги 3 та қарама-қаршиликда мезбонлар зафар қуча олишмаган. 2 дуранг, 1 мағлубият.
Мураббийлар фикрлари
Рональд Куман(Барселона) Эртага муҳим учрашув ва биз яхши натижага эришишимиз керак. Бу турнир ва психологик нуқтаи назардан ҳам муҳим.
“Атлетико“ ҳар мавсумда совринлар учун курашадиган кучли рақобат таклиф этадиган жамоа. Биз эса ғалаба қозониш учун ўз футболимизни ўйнашимиз керак. Мессининг кетиши? Йўқ, мен Мессини “Барcелона“дан ташқарида тасаввур қила олмайман.
Гриезманн жуда яхши ҳаракат қилмоқда. У ҳақиқатан ҳам янада яхшиланишга ҳаракат қилмоқда.”
Диего Симеоне(Атлетико Мадрид) “Ҳар бир ўйинда ғалаба қозониш учун имконият бор. Биз ўз футболимизни ўйнашга ҳаракат қиламиз ва бу уларга муаммо туғдиради деб ўйлайман. Ҳозирда ушбу жамоа янгиланмоқда дейиш мумкин. Бу ўйин биз учун қийин бўлади, лекин биз узоқ вақтгача кўзланган натижага эришишга ҳаракат қиламиз.
“Барcелона”нинг энг яхши сифати бу-клубнинг мақсади бор. Улар атрофдагиларнинг гапларига аҳамият бермайдилар.”
Дуэль
Бугунги баҳсда нафақат дунёнинг энг кучли клублари балки, энг кучли дарвозабонлари Ян Облак ва Тер Штеген ўртасида ҳам қарама-қаршилик юзага келади.
"Барселона"нинг германиялик посбони ўтган мавсум барча мусобақаларда, 46 ўйинда майдонда ҳаракат қилиб, шундан 17 бора ўз дарвозаси даҳлсизлиги сақлаб қолган.
"Атлетико"нинг Словениялик дарвозабони эса, жами 49 ўйиндан майдонга тушиб, шудан 22 тасида “қуруқ ўйин“ қайд этишга муваффақ бўлган.
Таҳминий таркиблар
“Атлетико Мадрид“: 13 Ян Облак Ян, 2 Хосе Хименес, 15 Стефан Савич,
23 Киран Триппьер, 22 Марио Эрмосо, 21 Янник Карраско,
14 Маркос Льоренте, 6 Коке ,
8 Саул Ньигес, 10 Анхель Корреа,7 Жоау Фелиш
“Барселона“: 1 Тер Штеген, 3 Херард Пике, 15 Клеман Ленгле, 18 Хорди Альба, 20 Серхи Роберто,
21 Френки де Йонг, 8 Миралем Пьянич , 16 Педри,
10 Лионель Месси, 11 Усман Дембеле, 7 Антуан Гризманн
Йўқотишлар.
Диего Симеоне, Лукас Торрейра ва Луис Суареслардан ковид-19 туфайли фойдалана олмайди. Суареснинг асосий таркибдаги ўрни муҳимлигини ҳисобга олиб, “Эл пистолеро“ни жиддий йуқотиш дейиш мумкин. Аслида, ҳамюртлар, терма жамо йиғинида ўшбу касалликни юқтириб олишган. Ҳимоячи Шими Врсалько узоқ муддатлик жароҳатидан тикланганича йуқ. Бундан ташқари яримҳимоячи Эктор Эррейра ҳам жамоасига ёрдам бера олмайди.
Рональд Куман эса, таянч ҳудудда Серхио Бускетснинг ёрдамидан мосуво бўлган. Футболчи, Испания термасида жароҳатга йулиққан. Шунингдек, ҳимоячилар Самуэль Умтити ва Рональд Араухо, ҳамда жиддий йуқотиш ҳужумчи Ансу Фати жароҳат сабаб ўйин учун қайдномага киришмаган. “Голден Бой” совринида иккинчи ўринни эгаллаган Фати, Барса ҳужум чизиғи ва Куман режаларининг муҳим бўлаги ҳисобланиши турган гап.
Дадажон Фозилжонов тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бухоро
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
