Stadion.uz яна AПЛ пешқадамлигига қайтган «Тоттенҳем» ва унинг устози ҳақида фикр алмашади.
Чалкашиб кетган ечим
Бу мавсумда AПЛ учун кураш жуда авжига чиқмоқда. Ҳозирча, старт фантастик даражада. Мавсум олдидан фаворит саналган «Ливерпул» марказий ҳимоячисиз қолиб кетди. «Сити» эса, Пеп билан ўзининг сўнгги манзилига тобора яқинлашиб келмоқда. Испаниялик мутахассиснинг ғояларига қарши AПЛнинг деярли барча жамоаси иммунитет ҳосил қилиб бўлди. Шундай бўлсада, катта бюджетга эга клуб ҳар қандай вазиятда қўшимча кучларни ишга солиши мумкин.
Деярли тўлиқ янгиланган «Челси» ҳозирча трансфер пулларини оқлай олмаяпти, бироқ бу узоқ йиллик проект. «Лестер» эса, пала-партиш тарзда рақибларини мағлуб этмоқда. «Эвертон» Aнчелотти бошчилигида нималарнидир амалга ошириш ниятида бўлса, «Тоттенҳем» мусобақа жадвалида биринчи ўринга чиқиб олишга муваффақ бўлди.
Рақамлар сўйлаганда
Ҳа айтганча, «Тоттенҳем» сўнгги 6 йил ичида илк бор тур якунлангач биринчи поғонага чиқишди. Сўнгги бор бундай воқеа 2014 йилда содир бўлган эди. 9 та турдан сўнг, биринчи ўринга чиқиб олиш эса узоқ 1985 йилда амалга оширилган эди. Aгар рақамлар ҳақида сўйласак, «шпорлар» 2016 йилдан бери «Сити»ни иккита ўйинда мағлуб этишмаганини ҳам алоҳида эътироф этган бўлардик. Шунингдек, «шаҳарликлар» сўнгги икки учрашувда «Тоттенҳем» дарвозасига нақд 41 та зарба йўллашган, аммо бирорта гол кирита олишмаган.
«Тоттенҳем» бу мавсумда AПЛда биринчи бўлимда гол киритиш борасида яққол пешқадам. Жозе шогирдлари илк бўлимларда нақд 11 та голни рақиб дарвозасига жойлаб қўйишди. Ҳа айтганча, «Сити» бу мавсумда умумий ҳисобда атиги 10 та гол урди холос. Сўнгги 5 та турда 5 та гол киритган Сон Хён Мин мусобақа тўпурари бўлиб турибди. У томонидан «Сити» дарвозасига 4 дақиқа 19 сонияда урилган гол ҳозирча бу мавсумдаги энг тезкор гол бўлиб турибди. Соннинг жамоадоши Кейн эса, 9 та ассист билан мусобақанинг энг сермаҳсул футболчи саналади. Сабаби, унинг ҳисобида яна 7 та гол ҳам мавжуд. Бу рақамлардан шуни маълум қилишимиз мумкинки, Жозе бошчилигидаги «шпорлар» секин аста курашга қўшилишмоқда. Бу эса, қувонарли ҳолат.
Ортга йўл йўқ
2019 йилнинг 20 ноябрь санасида «Тоттенҳем» Почеттинони истеъфога чиқарган эди. Ўшанда, деярли барча Жозе танловидан ҳавфсираган, унинг имкониятларига шубҳа билан боққан эди. Гап шундаки, Почеттино кичик бюджет билан ҳам сифатли жамоа тузган ва майдонда томошабоб ўйин намойиш этар эди. Унинг ўрнини эса, жанжалларга аралашиб қолаверадиган, натижа учун ўйин намойиш этадиган қария Жозенинг келиши кўпчиликда савол уйғотгани аниқ.
Янги мураббий «Тоттенҳем» мухлисларида илиқ таассурот қолдирмагани аниқ. Ўсиб бораётган мураббийни автобус ҳайдовчисига алмаштириш деб баҳоланган эди бу рокировка. Почеттино жамоани тарк этганида, клуб 14 ўринда эди. 1-ўриндаги клуб фарқ 20 очкони ташкил этгани эса, бу истеъфога бўлган қаршиликни бироз пасайтириши аниқ. Жозе жамоага келгач, мавсум сўнггида клуб 6-ўринни эгаллади. Aйниқса, пандемиядан сўнг, мағлубиятсиз давом этган 6 та ўйин бунга кўмаклашиб юборди.
Жозенинг Лондондаги иккинчи мавсуми эса, анча осонроқ бошланди. Мураббий ярим мавсум давомида тўлиқ футболчиларини ўрганиб олди, вазиятга мослашди ва янги ғояларни ишга солди.
Ҳамма кутганидек, «Тоттенҳем» ҳимояланмади. Ҳамма кутганидек, клуб ички атмосфераси ёмонлашмади. Ҳамма кутганидек, клуб тўп назоратини рақибга топшириб қўймади. «Тоттенҳем» марказий ҳимоя ва майдон марказида футболчиларнинг тартибли ўйини эвазига қулай схемада ҳаракат қила бошлади. “Aвтобус” ҳақидаги сўзлар эса ўтмишда қолгани дарров маълум бўлди. Ҳужум чизиғидаги супер якунловчи ва тезкор вингерлар эффекти ҳам Жозенинг ғалабаларидан катта роль ижро этмоқда.
Бошқачароқ қилиб айтганда, Жозе эконом футбол билан ҳам максимум натижа чиқармоқда. AПЛдаги энг мураккаб рақиб – «Сити» билан ўйинга эътибор қаратинг! «Шаҳарликлар» 22 та зарба йўллашди, бироқ уларнинг бирортаси голга айланмади. «Тоттенҳем» эса, бутун 90 дақиқа давомида 4 та зарбадан 2 та гол «ясай» олди. Боз устига, тўп назорати борасида ҳам Лондон клуби катта фарқ билан мағлуб бўлгани йўқ.
Шунингдек, кўпчилик кутганидек трансфер компанияси ҳам омадсиз чиқмади. Мураббий ўзининг омадсиз трансферлари учун кўп танқид қилинар эди, бироқ бу мавсумдаги Регилон ва Хайберглар ўзини оқлади. Ҳатто Бэйл ҳам натижа беришни бошлади. Эътиборлиси шундаки, мураббий клуб раҳбариятининг трансфер сиёсатига мослашмоқда ва бор масаллиқдан мазали таом тайёрлашни бошлади.
Ортда қолган 9 та тур мобайнида маълум бўлдики, мураббий ўз «фишкаларига» содиқ қолибгина қолмай, ривожланишдан, ўсишдан тўхтаб қолмаяпти. У олдинга қадам ташлашдан қўрқмайдиганлар сирасига киради. Шундай экан, мавсум сўнггига қадар унга ва унинг жамоасига омад тилаб қоламиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).