«Ҳоким кубоги-2021» мусобақасининг «С» гуруҳи 2-туридан «Бунёдкор» — «Турон» (3:2) учрашувидан сўнг жамоамиз бош мураббийи Исломбек Исмоиловнинг фикрлари билан қизиқдик.
— Ислом ака, бугунги учрашув ҳақида фикрларингиз…
— Бугунги рақибимиз «Бунёдкор» ўз услубига эга, сифатли футбол намойиш этадиган жамоалардан бири саналади. Шуни инобатга олган холда бугун таркибимизга бир оз ўзгартиришлар киритдик. Хусусан кечаги учрашувда заҳирадан ўйинга қўшилган ва бир бўлим давомида ҳаракат қилган футболчиларни майдонга туширдик.
Бугунги баҳснинг биринчи бўлимида «Бунёдкор» жамоасида ҳам имкониятлар юзага келган бўлса ҳам, ҳисоб бизнинг фойдамизга ҳал бўлди. Иккинчи бўлимда жамоа консентрацияни йўқотиши ҳисобига иккита тўп ўтказиб юбордик. Лекин иккинчи бўлимда вакилларимиз биз истаган ўйин услубини намойиш этди деб айта оламан. Шу ўринда айтиш мумкин, бугун таркибимизда бир қатор ёш футболчилар ҳам ҳаракат қилишди.
Жамоамиз таркиби янгидан шакллантирилмоқда, футболчилар тўла бир-бирларини тушуниб олишлари учун бир оз вақт керак. Умуман олганда бугунги учрашувда йигитларни ҳаракатидан қониқдим, бу ўйин ҳар икки жамоа учун фойдали бўлди.
— Рақиб дарвозасига иккита гол киритилганидан сўнг ҳам жамоа футболчиларида ортга чекиниш ҳолатлари кузатилди. Буни қандай изоҳлайсиз?
— Тўғри, жамоа футболчиларида мавсумлар оралиғидаги чарчоқ бор. Бундан ташқари айрим футболчилар кечаги учрашувда ҳам майдонга тушишган эди. Шу каби холатларда барибир жисмоний жиҳатдан толиқиш кўзга ташланади. Бу холатга айни шу омиллар таъсир қилди деб ўйлайман. Лекин учрашувнинг иккинчи бўлимида бутунлай бошқача ўйин намойиш этдик.
— Сербиялик легионер Синиша Бабич қачондан сафга қўшилади?
— Жамоамизнинг янги легионери Синиша Бабич билан бугун келишувга эришдик. Насиб бўлса ҳужумкор ярим ҳимоячи эртадан бошлаб биз билан машғулотларга киришади.
— Жамоа таркибида бир қатор футболчилар майдонга тушмаяпти. Жумладан легионер футболчи Умаржон Шарипов, тўпурар футболчилардан бири Дониёр Исмоиловлар…
— Тўғри ҳозир айрим футболчиларимизда жароҳат бор. Хусусан Тожикистон чемпионатидан жамоамиз таркибига жалб этилган Умаржон Шарипов, шунингдек, Абдуқаҳҳор Ҳожиакбаров, Жасур Хакимов, Фозил Мусаев, Ғиёс Комиловлар кичик жароҳатлар туфайли майдонга туша олишмаяпти. Тўпурар футболчиларимиздан бири Дониёр Исмоилов куни кеча фарзандли бўлган, шу сабабдан унга маълум бир муддат уйга жавоб берганмиз, у эртадан жамоамиз йиғинига келиб қўшилади. Фурсатдан фойдаланиб Дониёр Исмоиловни жамоамиз аъзолари ва мухлислари номидан табриклаймиз.
Бекзод Толибов ёзиб олди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
