Тан олиш керак, мавсум аввалида доимгидек, катта шов-шув кўтариб, «Навбаҳор»ни «чемпион»га айлантириб қўйдик. Ҳар сафарги ҳолат - катта трансферлар, хорижий йиғинлар... Тақдимот маросимини айтмайсизми, вой-бў... Қисқаси, барчамиз осмоннинг еттинчи қаватига чиқиб олгандик. Гўёки, Суперлига-2021да совринли ўринларни нақд қилгандек...
Хуллас, «Навбаҳор» мавсум бошланиши билан яна қўйнимизни пуч ёнғоққа тўлдиришни бошлади. Ҳа, «Жўжани кузда санаймиз» мақоли бежиз айтилмаган. Катта маблағ сарфланган, бинойидек маош олаётган футболчилар минглаб мухлислар ҳафсаласини пир қилишдан нарига ўтишмаяпти. Жамоа раҳбариятида ҳам тутириқ йўқдек. Аслида шунча маблағни қаердаги савияси паст легионерларни жалб қилиш йўлида бемаврид сарфлашдан кўра, маҳаллий ёш йигитларга таянилса, яхши бўлмасмиди? Менимча, ўз футболчиларимиз билан ҳам бемалол ҳозиргидан яхшироқ натижа кўрсатиш имкони бор. Зотан, «нафақа»даги Виктор Жалилов (ёки вақтинчалик Георгий Колосовский) ўрнига Анвар Солиев, Хайрулло Каримов, Рашид Ғофуров каби маҳаллий ёш мутахассислардан бирига имконият берилса ҳам, жамоа бугунгидан яхшироқ ҳолатда турармиди?
Ўз-ўзидан савол туғилади: ўша Нўъмон Ҳасанов танлаган легионерлар билан кўр-кўрона шартнома тузилаётган пайт клуб раҳбарияти қаерга қараб турганди? Бир неча йиллардан буён футбол ичида юрган кишилар наҳотки, бугунгидек ачинарли ҳолга тушиш мумкинлигини тасаввур қилишган бўлсалар? Қаранг, бутун бошли вилоятнинг асосий жамоаси Яйпан туманида тузилган хусусий клуб, боз устига, дебютант билан ўз майдонида тенгма-тенг, ҳаттоки, ундан «хафа»роқ кўринишда ўйнаб турса. Бу кимга алам қилмайди? Бошқача айтганда, лиганинг янги иштирокчиси ва ҳозирча аутсайдери мавсумдаги 2-очкосини Намангандан олиб кетишига унча-мунча ҳақиқий мухлис ҳам чидолмаса керак. Тошкент вилояти Олмалиқ шаҳрининг АГМК жамоаси нафақат Саудия Арабистони, балки Осиёнинг энг кучли жамоаларидан бири билан дуранг ўйнасаю, ҳамиша чемпионликни кўзлашга ваъда берадиган «Навбаҳор» ўз майдонидаги 3та учрашувда ғалаба қозонолмаса... Энг босиқ мухлис ҳам бундан ёниб кетмайдими? Айтганча, ЎФА томонидан қўлланилган 2та ўйинни мухлисларсиз ўтказиш чораси камида 300 миллион сўм (15 минг мухлисХ20 минг сўм)дан жами 600 миллионга тушади. Клуб ғазнасига шунча зарар. Ўша ўйин ҳакамлари қарорини оқламаган ҳолда, айтиш мумкинки, «Навбаҳор» раҳбарияти ва мураббийлари мухлисларга қўшилиб, «гап» талашиш ўрнига уларни жойида тинчлантиришганида эди, жамоа «Турон»ни трибуналар тўла стадионда енгиб, бюджетга камида 300 миллион сўм кирим қилиб қўярди. Эвоҳ, аламдан, асаблар чарчаганидан футбол ҳам кўнгилга сиғмай қолмоқда...
Менимча, тезлик билан чора кўриш керак. Хусусан, бутун бошли раҳбариятда ислоҳотга қўл уриб, виждонан ишлайдиган, ёш, ташкилотчи, ҳаракатчан раҳбар ва менежерларни ёллаш лозим. Шунингдек, истиқболи баланд мураббийлар билан узоқ муддатли шартнома тузиб, аниқ стратегия асосида фақат маҳаллий ёш футболчиларга таянишни йўлга қўйиш вақти келди. Бунда клубдан 3 йилгача натижа талаб қилмай, келажак учун замин ҳозирлашни қатъий белгилаш керак. Шундагина «Навбаҳор» худди «Насаф»дек мустаҳкам «фундамент»га эга, қолаверса, трансферлардан катта маблағ топадиган клубга айланади. Ана, Остон Ўрунов ва Азиз Турғунбоев трансферидан маълум миқдорда фойда кўрилди-ку...
Бир сўз билан айтганда, тезлик билан жиддий ислоҳотларни амалга ошириб, «Навбаҳор»ни қайта тирилтирмас эканмиз, «лочинлар» ҳам бошқа жамоаларимиз каби мухлисларни йўқотиб бораверишади. Келинглар, футболсевар Наманган аҳлини бу ажойиб ўйиндан бездирмайлик...
Дарвоқе...
«Навбаҳор» МТРК автомобилини таъмирлаб берди. «Навбаҳор» - «Пахтакор» ўйинидан кейинги тартибсизликлар натижасида Ўзбекистон МТРКга тегишли кўчма телевизион станциянинг махсус автомобилига шикаст етганди. Тартибсизликлар уюштирган мухлислар жазога тортилишди, МТРК автомобили эса клуб томонидан таъмирлаб берилди.
Юнус МИРЗАЕВ (Тўрақўрғон тумани)
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
