4-11-сентябр кунлари Россия Федерациясининг Қозон шаҳрида биринчи МДҲ ўйинлари бўлиб ўтди. Минтақа спортини бирлаштирган мазкур тадбирда Ўзбекистон делегацияси умумжамоа ҳисобида мезбонлардан сўнг иккинчи ўринни қўлга киритди.
Мусобақада спортчиларимиз 23 та олтин, 32 та кумуш ва 36 та бронза, жами 91 та медаль қўлга киритишга муваффақ бўлди. Келинг, ушбу мусобақа ҳақида бир қатор қизиқарли фактларни эътиборингизга ҳавола қиламиз.
Ушбу спорт ўйинлари МДҲга аъзо 9 та мамлакат (Озарбайжон, Арманистон, Беларус, Қозоғистон, Қирғизистон, Молдова, Россия, Тожикистон ва Ўзбекистон) халқлари ўртасида дўстона алоқаларни мустаҳкамлаш ҳамда жисмоний тарбия ва спорт соҳасида эришилган ҳамкорлик тўғрисидаги битим шартларини амалга ошириш мақсадида илк бор ташкил этилди.
Унда Ўзбекистон спорт делегацияси жами 166 нафар спортчи (шу жумладан, 56 нафар қизлар) билан 15 та спорт тури бўйича қатнашди. Делегациямиз аъзолари бокс, эркин кураш ва юнон-рум кураши, белбоғли кураш, кореш, ўқ отиш, баскетбол, муай-тай, самбо, дзюдо, каратэ, бадиий гимнастика, футзал, бадминтон спорт турларида шоҳсупага кўтарилишди.
Улар орасида ёшларимизнинг баскетбол, футзал каби турларда медаль қўлга киритгани жамоавий спорт турларида иқтидорли авлод етишиб чиқаётганидан далолат бермоқда. Қайд этиш жоиз, регламентга кўра, мусобақада 14-23 ёш оралиғидаги спортчилар иштирок этишган.
Спорт турлари кесимига назар ташлайдиган бўлсак, белбоғли кураш спортида умумжамоа ҳисобида биринчи ўринни қўлга киритганимизни алоҳида айтиб ўтиш ўринли. Шунингдек, бокс ва дзюдо баҳсларида иккинчи, самбо, баскетбол, кореш, бадиий гимнастика, футзал дастурларида учинчи бўлдик.
Делегациямиз эртага соат 21:10 да Ислом Каримов номидаги Тошкент халқаро аэропортига қайтиб келади.
Матнда хатолик топсангиз, ўша хатони белгилаб, бизга жўнатинг (Ctrl + Enter).