"Эвертон" устози Рафаэль Бенитес истеъфога чиқарилди. Бу ҳақда клуб матбуот хизмати хабар қилди. "Жамоага 2021 йилнинг июнида келган Бенитес АПЛ доирасидаги "Норвич"га қарши ўйиндан сўнг (1:2) ишдан бўшатилди. Тез орада янги мураббий номи эълон қилинади", – дейилади расмий хабарда.
«Эвертон» сўнгги баҳсларда жуда ёмон таассурот қолдиряпти. Ливерпулнинг «кўк» жамоаси очколарни тўплашда жиддий қийинчиликларга дуч келмоқда. Ҳозирда «ирисчилар» турнир жадвалида 15-ўринга тушиб кетган.
Премьер-лиганинг 22-тури бошланишига қадар сўнгги ўринни эгаллаб турган «Норвич»дан учралган мағлубият мухлисларнинг чинакам ғазабига сабаб бўлди. «Норвич» 1 декабрдан бери Премьер-лигада гол ура олмаётган эди, кеча эса 18-дақиқага келиб 2:0 ҳисобида олдинга чиқиб олди - шунчаки даҳшат. Мавсум аввалида чемпионлик учун кураш олиб борган «Эвертон» учун бу шармандали ҳолат.
Аввалига Майкл Кин автогол эвазига ҳисобни очган бўлса, кўп ўтмай Адам Ида дублга эришди. Иккинчи бўлимда Ришарлисон фарқни биттага қисқартирди холос. Аммо шундан кейин жамоанинг қолганига кучи етмади, Бенитес камбек учун шогирдларига куч бера олмади. Дарҳақиқат, «Норвич» ҳақли ғалабани қўлга киритди, жамоа кўпроқ зарба берди (зарбалар бўйича 14:12) ва дарвоза ёнида кўпроқ хавфли вазият яратди.
Ҳозирда «Эвертон»га далда бериб турадиган биргина омил мавжуд. У ҳам бўлса жамоа захирасида 3 та қўшимча ўйин борлиги. Ушбу учрашувлар «Ньюкасл», «Бёрнли» ва «Лестер»га қарши бўлиб ўтади. Лекин «ирисчилар»нинг ҳозирги ҳолати шуни кўрсатиб турибдики, жамоа аутсайдерлардан ҳам очко олишда қийналмоқда. «Эвертон» октябрни кучли бешликда кутиб олди. Бироқ шундан сўнг клуб осмони остига «қора булутлар» тўплана бошлади. Бенитес шогирдлари 13 учрашувда 1 ғалаба, 3 дуранг ва нақ 9 марта мағлубиятга учрашди. Тўплар фарқи ҳам қўрқинчли даражада - 22:27. Бу давр ичида АПЛда «Эвертон»данда ёмонроқ натижа кўрсатган жамоа бўлмади. Ҳа, ҳатто «Уотфорд» ва «Ньюкасл» ҳам «ирисчилар»дан кўпроқ очко жамғаришган.
Бу ерда кўпроқ ким айбдор? Албатта, Рафаэл Бенитес. Айрим учрашувларда ҳам зийрак операторлар Рафага асосий камерани бурганида асосан, у жилмайган фонда кўриниб қоляпти. Бу эса мухлисларнинг ғазабини ўйнамоқда.
Ижтимоий тармоқлардаги мухлислар шу ишоралар учун ҳам Рафанинг истеъфосини талаб қилишди. Улар трибуналардаги меҳмонлар секторида «Бенитес, клубимиздан кет» деган баннерларни осиб қўйишган.
Мухлислардан бири ҳатто стадионга югуриб чиқишга қарор қилди: у майдонга отилди ва «Эвертон» мураббийлар ўриндиғига югурди. Уни стадион хавфсизлиги ходимлари тўхтатиб қолишган. Бенитес ҳақида турли мемлар тарқалгани ҳам фикримиз тасдиғидир.
Аммо бу фақат статистика билан боғлиқ тугал ечимлар эмас. Бенитес жамоа етакчиларидан бири Лука Динь (ўтган мавсумнинг энг яхши ассистенти) билан жанжаллашиб, уни «Астон Вилла»га сотиб юборди. Тасаввур қилинг, у ҳозир қандай формага эга? Бенитес клубда 2001 йилдан буён ишлаб келган тиббиёт хизмати раҳбари Денни Доначини ҳам ишдан бўшатди. Доначи футболчилар орасида жуда катта обрўга эга шахс эди.
Лекин Рафа янги клубига ўз одамларини олиб келди ва Денни бу мавсумдаги кўплаб жароҳатларда айбланди. 2000 йилларнинг иккинчи ярмида «Ливерпуль» билан ишлаган Бенитес «Эвертон»ни «кичик клуб» деб атагани эслатилди ва мухлислар мураббийга таҳдид қила бошлади.
«Норвич»дан учралган мағлубиятдан сўнг «Эвертон» раҳбарияти фавқулодда йиғилиш ўтказди ва унда мураббийга барчаси ётиғи билан тушунтирилди. Ўз ўрнида у ҳам барчасини тушуниб етди.
«Энди ҳеч нарса менга боғлиқ эмас», деб тан олди Бенитес. - Мени клубда 5-6 йилдан бери мавжуд муаммоларни ҳал қилиш учун таклиф қилишган эди. Ҳозирча хатоларни келажакда такрорламаслик учун таҳлил қилишим керак”, - дейди Рафа.
Бироқ бу гаплар унинг ўз лавозимида қолишига етрали бўлмади ва тажрибали мутахассисга бошқа имконият берилмайдиган бўлди.
Матнда хатолик топсангиз, ўша хатони белгилаб, бизга жўнатинг (Ctrl + Enter).