Европанинг топ-клублари кимни сотиб олмоқчи?
Европа қишки трансфер ойнаси тугашига икки ҳафтадан камроқ вақт қолди. Топ-клублар таркибни кучайтириш учун турли вариантларни қидирмоқда. Биз трансфер бозоридаги вазият ҳақида бироз маълумот беришга қарор қилдик.
“Манчестер Сити” ҳужум чизиғини кучайтириш учун ҳаракат бошлади
“Манчестер Сити” янги ҳужумчи қидирмоқда. Аввалига инглиз клуби Эрлинг Холандни сотиб олишга қизиқаётгани хабар қилинганди, аммо ҳозир вазият бироз ўзгарган. Миш-мишларга кўра, “Боруссия Д” ҳужумчиси “Реал”га ўтишни ўйламоқда. “The Athletic” нашри хабарига кўра, “шаҳарликлар” бош мураббийи Хосеп Гвардиола аллақачон норвегияликка муқобил вариант топиб қўйган. Унга “Реал”нинг ёш ҳужумчиси Винисиус керак.
Бу миш-мишларнинг аксарияти Килиан Мбаппе билан боғлиқ. Агар, “Реал Мадрид” уни келаси ёзда қўлга киритса, маош ва шартнома имзолаш учун жиддий пул сарфлашади. Бундай вазиятда Мадрид клуби ҳам Холанд учун ҳам кураш олиб боришини тасаввур қилиш қийин. Шундай экан, “Реал” Винисиусни сотишига ҳожат қолмайди. Бошқа томондан, агар “Сити” футболчи учун яхши пул таклиф қилса, бу Мадридга Мбаппенинг нархини қоплаш имконини беради ва клуб президенти Флорентино Переснинг фикрини ўзгартириши мумкин.
А серияни “ёндираётган” футболчи Англияга кетадими?
“Фиорентина” ҳужумчиси Душан Влаҳович сўнгги кунларда энг кўп тилга олинган футболчилардан бири. Унинг хизматларига бир қанча клублар қизиқиш билдираётгани ажабланарли эмас. Футболчи учун асосий даъвогар “Арсенал” ҳисобланади ва Лондон клуби яқин кунларда сербияликни ўз сафига қўшиб олиши мумкин, дея хабар беради “La Nazione”. Манбанинг хабарига кўра, инглиз клуби ҳужумчи учун 70 миллион евро тўлашга тайёр. Айтганча, “Transfermarkt” портали ҳам серб футболчисини шу суммага баҳолаган.
“Арсенал” Пьер-Эмерик Обамеянг билан муаммога дуч келди. Аввалига ҳужумчи тартиб-интизомни бузгани учун сардорлик боғичидан маҳрум бўлган, кейин эса у коронавирус билан касалланган. Габонлик футболчи Африка кубогида қатнашаётган терма жамоаси лагерини тарк этди. Кеча чиққан хабарларга кўра, Пьер-Эмерикка Саудия Арабистони “Ан-Насср” клуби қизиқиш билдирмоқда ва футболчини ижарага олишга тайёрлигини билдирган. Кўрамиз, футболчи терма жамоамиз аъзоси Жалолиддин Машарипов билан бирга ўйнар?! Влаховични африкалик учун яхши ўринбосар деб ҳисоблаш мумкин. Сабаби, Душан жорий мавсум А сериянинг 21 ўйинида 17 та гол урди.
“Ювентус” Дибалани қўйиб юборадими?
Пауло Дибаланинг “Ювентус” билан янги шартнома борасидаги музокаралари ҳозирча муваффақиятсизликка учради. Клуб раҳбарияти футболчининг маоши камайтирилишини талаб қилмоқда, дея хабар беради “Sky Sport”. Агар, Дибала рад жавобини берса, у жамоани эркин агент сифатида тарк этади. Унинг шартномаси жорий мавсум охирида якунига етади. “Ювентус” аргентиналик ўрнига “Рома” яримҳимоячиси Николо Заньолони ўринбосар сифатида кўрмоқда. Римликлар ўз футболчиси билан шартномани узайтириш борасида ишламоқда, бироқ футболчининг ўзи “Юве”нинг қизиқишини инобатга олиб, музокараларда кейинроққа қолдириши мумкин.
Суарес ва Жеррард яна бир жамоада ишлайдими?
Мадриднинг “Атлетико” клуби ҳужумчиси Луис Суарес Бразилиянинг учта клуби таклифини рад этди. Қолаверса, Саудия Арабистонининг “Ал-Хилол” жамоасига ўтишдан ҳам бош тортди. Журналист Жерар Ромеро хабарига кўра, 34 ёшли футболчи “Астон Вилла”га ўтишни истамоқда. Ҳозирда бу клубни Суареснинг “Ливерпуль”даги собиқ жамоадоши Стивен Жеррард бошқармоқда. Мураббий ҳужумчини ўз жамоасига таклиф қилди ва Луис ҳам бунга қисман розилигини билдиргани айтилган. Бу трансфер қишда амалга ошиши қийин, аммо мавсум охирида Суарес Премьер-лигага қайтиши мумкин. Қолаверса, бу вақтга келиб уругвайлик эркин агентга айланади.
Погба Месси билан ПСЖда ўйнаш учун рекорд даражадаги шартномадан воз кечди
Бир вақтнинг ўзида бир нечта манбалар, жумладан “The Times” ва “Le Parisien” нашрлари, яримҳимоячи Поль Погба ёзда “Манчестер Юнайтед”ни тарк этиши ҳақида хабар тарқатди. Франциялик футболчи учун ПСЖга ўтиш энг устувор вариант ҳисобланади. Олдинроқ, “Манчестер Юнайтед” Погбани АПЛнинг энг кўп маош олувчи футболчисига айлантиришга тайёрлиги ҳақида хабар берилганди. “The Sun” нашри Полнинг маоши ҳафтасига 600 000 евро бўлиши мумкинлиги ҳақида хабар тарқатди. Аммо, Погба рекорд даражадаги шартномани рад этган.
“Ювентус” ва “Манчестер Юнайтед” Марсьялнинг трансфери борасида келиша олишмаяпти
Икки клуб ўртасидаги музокаралар тўхтаб қолди. “Ювентус” мавсум охиригача Антонини ижара олмоқчи эди. Бироқ, МЮ Марсьялни фақат бир шарт эвазига қўйиб юборишини айтди. Бунинг учун Италия клуби Марсьялнинг шартномасидаги барча харажатларни ўз зиммасига олиши керак. Аввалроқ, “Юве” бош директори Маурисио Арривабене бундай шартлар уларга мос келмаслигини айтганди. Инсайдер Фабрицио Романонинг хабар беришича, “Манчестер Юнайтед” ўз шартларини ўзгартирмайди. Шу билан бирга, Марсьялнинг ўзи ҳам клубини ўзгаришига қарши эмас.
Эриксен Премьер-лигага қайтадими?
Даниялик футболчи Қатардаги жаҳон чемпионатига боришни интиқлик билан кутмоқда. Табиийки, бунинг учун унга ўйин амалиёти керак, яримҳимоячи эса Евро-2020 мусобақасидаги мудҳиш воқеадан сўнг, тузукроқ машғулот ўтказгани йўқ. Ҳозирча, Эриксен клубисиз, чунки у “Интер” билан шартномасини бекор қилди.
“The Athletic” нашри хабарига кўра, даниялик футболчига “Брентфорд” (Премьер-лигада 14-ўрин) шартнома таклиф қилган. Клуб Эриксенга яна бир мавсумга узайтириш имконияти билан олти ойлик шартнома таклиф қилган. “Брентфорд” бош мураббийи Томас Франк Дания ёшлар терма жамоасини бошқарганида Кристиан билан бирга ишлаган. Журналист Николо Скира ўзининг твиттер саҳифасида “Аякс” ҳам футболчига даъвогарлик қилаётганини ёзди. Қолаверса, унинг яна бир собиқ клуби – “Тоттенхэм” футболчига даъво қилмоқда.
“Барса” Дембеле ўрнига потенциал футболчи топди
“Барса” ўз шогирдига Усмон Дембеле ўрнига потенциал ўринбосар қидирмоқда. Клуб ва француз ўртасидаги вазият жидди. Каталонияликлар Усмонга шартнома имзоламаса, захирага михлаб қўйишини айтган. Катта эҳтимол билан футболчи мавсум тугаганидан кейин клубни тарк этиши мумкин. “Diario Sport” нашри хабарига кўра, 25 ёшли Адама Траоре “Барселона”га қайтишни хоҳламоқда. Каталония клуби футболчининг агенти Хорхе Мендес ва “Вулверхэмптон” билан ҳам яхши муносабатларга эга. “Барса” шартномага ҳужумчи Франсиско Тринкаони (ҳозирда “бўрилар” сафида ижарада ўйнамоқда) қўшиб бермоқчи.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
