Сенегал миллий жамоаси тарихда биринчи марта Африка кубогини қўлга киритди. Жумладан, Садио Мане ҳам бўйнига қитъа чемпионати олтин медалини тақди. Тўғри, «Ливерпуль» вакили ўз ватани терма жамоасининг айрим муҳим ўйинларида қатнашолмади. Чунончи, Садио Кабо-Верде термасига қарши кечган 1|8 финал баҳсида рақиб дарвозабони билан тўқнашиб кетиб, мия чайқалишига учради. Ўша вазиятда ҳар икки футболчи тўпга бош қўйишга интилган ва сенегаллик ҳужумчи биринчи бўлиб етганди. Бироқ ёқимсиз тўқнашувдан сўнг Мане маълум муддат нокаут ҳолатида ётди. Фақат жамоа шифокорлари бошига катта муз қопини қўйиш асносида уни ўзига келтиришди. Садио кейинчалик ўша ўйинда гол ҳам урди ва шундан сўнг уни дарҳол алмаштириб, шифохонага юборишди.
Шифохонада эса таъсирли воқелик юз берди. Айни ўша вақт худди шу муассасага мотоцикл уриб юборган болакай келтирилди. Унинг бир неча суяги синган ва ҳаёти хавф остида эди. Чунки ота-онаси тезкор операцияга пул тўлолмасликларини билдиришди. Бундан хабар топган Мане ўйлаб ўтирмай, муолажа учун сўралган 400 минг Африка франки (чамаси 600 евро)ни ўз ҳисобидан тўлади. Ҳозирча болакайнинг кейинги тақдири ҳақида маълумот йўқ, лекин Садионинг зарур пайт бир бегона оила қайғусига бефарқ қарамагани таҳсинга сазовор, албатта.
Умуман, камерунликлар оиласига ёрдам қўлини чўзиш Садионинг биринчи хайрли иш эмас. У 2016 йили вақтида отаси ишлаган масжидни қайта тиклашга маблағ ажратганди. «Ёшлигимдан ўз ҳудудимга менга берганлари эвазига ташаккур сифатида нимадир қилишга қизиқаман. Бу - кучли мотивация. Ҳозир ҳам сенегаллик ҳамкасбларим билан баъзи ишларни муҳокама қиляпмиз. Ҳа, ҳали ёшман, лекин тез орада ватаним учун нималардир беришни бошлайман», - деганди футболчи.
Садио ўша сўзида туриб, 2018 йили жонажон қишлоғи - Бамбалида мактаб қурилишини тўлиқ молиялаштирди: «Бу лойиҳа қалбимга жуда яқин. Биласизми, Африкада ҳукумат кўпинча қишлоқларни назардан четда қолдиради. Бамбалида яшаганимда, профессионал футболчи бўлиш учун Дакарга боришни орзу қилардим. Энди бамбалилик ўсмирларнинг ўша ерда таҳсил олишларини истайман».
Икки йил ўтгач, Бамбали шаҳрида шифохона пайдо бўлди - яна Мане туфайли. Шундан яна 2 йил ўтгач, қишлоқда барча шароитларга эга шифохона ҳам қад ростлади - яна Мане шарофати билан. Хуллас, Садио нафақат ажойиб футболчи, балки ажойиб инсон ҳам.
Дарвоқе... Сенегалда Садио Мане номи остида стадион...
Daily Mail нашри хабарига қараганда, Сенегалда қурилаётган янги стадион Садио Мане шарафига номланади. Ҳозирча лойиҳаси тўлиқ тасдиқланмаган арена 2023 йил якунигача фойдаланишга топширилиши керак. Айтиш ўринли, «Ливерпуль» вакили АМК-2022 финалида ўйиндан кейинги пенальтилар сериясида охирги зарбани амалга ошириб, Сенегал термасининг илк марта Африка чемпиони бўлишини таъминлади.
Садио Маненинг меҳри дарё йигит эканлигига бир неча далил
- Садио Мане бир сафар масжид ҳожатхонасини ювиб, тозалаб чиққан ва ходимдан бу ҳақда гапирмаслигини сўраган.
- Трой Динига алоҳида совға юбориб, ундан клубдоши Исмоила Сарр (у ҳам Сенегалдан)га меҳрибонлик билан қарашни илтимос қилган.
- Жамоа маъмурига автобусдаги буюмларни туширишда кўмаклашган ва ўзига ўхшаш йигит билан самимий тарзда суратга тушган.
- Даун синдромига чалинган мухлис орзусини рўёбга чиқарган: ундан голни қандай нишонлаши кераклигини кўрсатиб беришини сўраган ва барчасини худди шундай такрорлаган.
Р.ИБРОҲИМОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
