Senegal milliy jamoasi tarixda birinchi marta Afrika kubogini qo‘lga kiritdi. Jumladan, Sadio Mane ham bo‘yniga qit’a chempionati oltin medalini taqdi. To‘g‘ri, «Liverpul» vakili o‘z vatani terma jamoasining ayrim muhim o‘yinlarida qatnasholmadi. Chunonchi, Sadio Kabo-Verde termasiga qarshi kechgan 1|8 final bahsida raqib darvozaboni bilan to‘qnashib ketib, miya chayqalishiga uchradi. O‘sha vaziyatda har ikki futbolchi to‘pga bosh qo‘yishga intilgan va senegallik hujumchi birinchi bo‘lib yetgandi. Biroq yoqimsiz to‘qnashuvdan so‘ng Mane ma’lum muddat nokaut holatida yotdi. Faqat jamoa shifokorlari boshiga katta muz qopini qo‘yish asnosida uni o‘ziga keltirishdi. Sadio keyinchalik o‘sha o‘yinda gol ham urdi va shundan so‘ng uni darhol almashtirib, shifoxonaga yuborishdi.
Shifoxonada esa ta’sirli voqelik yuz berdi. Ayni o‘sha vaqt xuddi shu muassasaga motosikl urib yuborgan bolakay keltirildi. Uning bir necha suyagi singan va hayoti xavf ostida edi. Chunki ota-onasi tezkor operasiyaga pul to‘lolmasliklarini bildirishdi. Bundan xabar topgan Mane o‘ylab o‘tirmay, muolaja uchun so‘ralgan 400 ming Afrika franki (chamasi 600 yevro)ni o‘z hisobidan to‘ladi. Hozircha bolakayning keyingi taqdiri haqida ma’lumot yo‘q, lekin Sadioning zarur payt bir begona oila qayg‘usiga befarq qaramagani tahsinga sazovor, albatta.
Umuman, kamerunliklar oilasiga yordam qo‘lini cho‘zish Sadioning birinchi xayrli ish emas. U 2016 yili vaqtida otasi ishlagan masjidni qayta tiklashga mablag‘ ajratgandi. «Yoshligimdan o‘z hududimga menga berganlari evaziga tashakkur sifatida nimadir qilishga qiziqaman. Bu - kuchli motivasiya. Hozir ham senegallik hamkasblarim bilan ba’zi ishlarni muhokama qilyapmiz. Ha, hali yoshman, lekin tez orada vatanim uchun nimalardir berishni boshlayman», - degandi futbolchi.
Sadio o‘sha so‘zida turib, 2018 yili jonajon qishlog‘i - Bambalida maktab qurilishini to‘liq moliyalashtirdi: «Bu loyiha qalbimga juda yaqin. Bilasizmi, Afrikada hukumat ko‘pincha qishloqlarni nazardan chetda qoldiradi. Bambalida yashaganimda, professional futbolchi bo‘lish uchun Dakarga borishni orzu qilardim. Endi bambalilik o‘smirlarning o‘sha yerda tahsil olishlarini istayman».
Ikki yil o‘tgach, Bambali shahrida shifoxona paydo bo‘ldi - yana Mane tufayli. Shundan yana 2 yil o‘tgach, qishloqda barcha sharoitlarga ega shifoxona ham qad rostladi - yana Mane sharofati bilan. Xullas, Sadio nafaqat ajoyib futbolchi, balki ajoyib inson ham.
Darvoqe... Senegalda Sadio Mane nomi ostida stadion...
Daily Mail nashri xabariga qaraganda, Senegalda qurilayotgan yangi stadion Sadio Mane sharafiga nomlanadi. Hozircha loyihasi to‘liq tasdiqlanmagan arena 2023 yil yakunigacha foydalanishga topshirilishi kerak. Aytish o‘rinli, «Liverpul» vakili AMK-2022 finalida o‘yindan keyingi penaltilar seriyasida oxirgi zarbani amalga oshirib, Senegal termasining ilk marta Afrika chempioni bo‘lishini ta’minladi.
Sadio Manening mehri daryo yigit ekanligiga bir necha dalil
- Sadio Mane bir safar masjid hojatxonasini yuvib, tozalab chiqqan va xodimdan bu haqda gapirmasligini so‘ragan.
- Troy Diniga alohida sovg‘a yuborib, undan klubdoshi Ismoila Sarr (u ham Senegaldan)ga mehribonlik bilan qarashni iltimos qilgan.
- Jamoa ma’muriga avtobusdagi buyumlarni tushirishda ko‘maklashgan va o‘ziga o‘xshash yigit bilan samimiy tarzda suratga tushgan.
- Daun sindromiga chalingan muxlis orzusini ro‘yobga chiqargan: undan golni qanday nishonlashi kerakligini ko‘rsatib berishini so‘ragan va barchasini xuddi shunday takrorlagan.
R.IBROHIMOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
