Мавсум якунига яқинлашгани сари ҳар йилгидек АПЛ турнир жадвалининг пастки қисмида кураш авжига чиқа бошлади. Элитада жон сақлаб қолишга ҳаракат қилаётган клублар сўнгги чоралар кўришга интилмоқда. Хусусан, бу йўлда "Бёрнли" клуби яқин бир ҳафта ичида икки бор ғалабага эришди ва ўз ҳолатини анча яхшилаб олди. Шунингдек, кеча "Эвертон" ҳам ўта муҳим ғалабани тантана қилди. Лэмпард жамоаси "Челси"ни битта тўп фарқи билан таслим этиб, хавфсиз зона билан фарқни икки очкогача қисқартириб олишга муваффақ бўлди. Яна бир хавф остида қолган жамоа, "Лидс" эса, 4-0 ҳисобида ўз майдонида "Манчестер Сити"га мағлуб бўлиб, аҳволини анча оғирлаштириб қўйди. Юқоридаги натижалар сабаб "Бёрнли" ҳамда "Лидс" 34 очкога эга бўлди. "Эвертон"да 32 очко бор. Аммо Лэмпард қўлида битта ортиқча ўйин ҳам мавжуд. Айни пайтга қадар "Норвич" ва "Уофорд"нинг АПЛдан кетиши аниқ бўлиб улгурган. Қолган жамоалар эса улар сафига қўшилиб қолмаслик учун ҳаракат қилишлари талаб этилади.
"Лидс"нинг ҳолати ҳақида
Албатта, ҳаммага аён бўлиб улгурган нарса бор – "Бёрнли"нинг муваффақиятлари – "Лидс" учун бош оғриғи. Лига етакчиси бўлган "Манчестер Сити"га мағлубиятдан кейин Жесси Марш жамоасига "Бёрнли" очколар борасида етиб олди (34). "Эвертон"дан эса атиги икки очко олдинда бормоқда. Мавсум якунланишига 4 та тур қолган бир пайтда бундай хавфли ҳолатга тушиб қолиш ҳеч бир жамоага маъқул келмайди. "Лидс"нинг қолган ўйинлари қуйидагича:
"Арсенал" (меҳмонда)
"Челси (уйда)
"Брайтон" (уйда)
"Брентфорд" (меҳмонда)
Албатта, тўртта баҳснинг дастлабки иккитаси ўта оғир кечади. Бошқа томондан эса тўғридан-тўғри рақобатчилар, "Эвертон" ҳамда "Бёрнли" натижалар қайд эта бошлади. Бу эса йоркширликларга катта босим юклайди. Агарда улар 4 та учрашувдан максимал фойдалана олса, ўзини сақлаб қолишни кафолатлайди. Акс ҳолда, икки йиллик ёрқин ўйинларидан кейин "Лидс" билан яна хайрлашишга мажбур бўламиз.
"Эвертон"нинг ҳолати ҳақида
Жамоага Чемпионшип чангали таҳдид қилаётган бир пайтда, "Эвертон" ўз уйида "Челси"ни мағлуб эта олди. Бу билан Лэмпард йигитлари керак бўлганида ўзида куч топа олишини исботлади. Кечаги ғалаба ҳаммасини жамоанинг қўлида қолдирди. Бу дегани, келаётган учрашувларнинг осон бўлишини англатмайди, албатта. Аммо жамоага бир қадар қулай рақиблар рўбаро келади. Мерсисайдликларнинг қолган ўйинлари қуйидаги рақибларга қарши кечади:
"Лестер" (меҳмонда)
"Уотфорд" (меҳмонда)
"Брентфорд" (уйда)
"Кристал Пэлас" (уйда)
"Арсенал" (меҳмонда)
Ўтган ойда йўқотилган зарур очколарга қарамай, "Эвертон" АПЛда қолиш учун кураш ичида бўлади. "Челси" устидан ғалаба бу умидни янада оловлантириб юборади. "Гудисон Парк" эса ўз жамоасига қайтадан ишонишни бошлади.
"Бёрнли"нинг ҳолати ҳақида
Бир сўз билан айтганда – тубдан ўзгарган жамоа. Сўнгги турлардаги "Саутгемптон", "Вулверхэмптон" ҳамда "Уотфорд" устидан қозонилган ғалаба клубни анчайин хавфсиз зонага, ҳатто "Лидс"дан юқори позицияга олиб чиқди. Яна нима дейиш мумкин, жамоа олдидан чиққан рақибни аяб ўтирмаяпти ва бу Майк Жексоннинг яхши даражага эга эканини кўрсатади. Шунингдек, "Бёрнли"нинг ғалабалари, уларнинг голлар нисбатига ҳам ижобий таъсир қилди. Шу сабаб "Лидс" ортда қолдирилди. Эндиликда Жексон шогирдларини тўртта осон бўлмаган учрашувлар кутади:
"Астон Вилла" (уйда)
"Тоттенхэм" (меҳмонда)
"Астон Вилла" (меҳмонда)
"Ньюкасл" (уйда)
Шубҳасиз, "Бёрнли"нинг айни пайтдаги АПЛда қолиш учун қулай имкониятларини ҳеч ким инкор эта олмайди. Шон Дайчнинг истеъфога чиқарилиши эса барчани ҳайратга солган эди. Бугун кўринмоқдаки, бу иш – тўғри қилинган. Учта кетма-кет ғалаба клубнинг имижини бутунлай ўзгартирди. Боз устига, АПЛда қолиш учун асосий даъвогар номи ҳам "Бёрнли"га тегишли бўлиб турибди. Ҳа, жамоа "Астон Вилла"га қарши иккита ўйин ўтказиши керак. Бу эса жуда катта синовдир. Агарда шу босқичдан муваффақиятли ўтилса, у ҳолда, вазифа бажарилади!
Жалолиддин ИСМАТОВ таржимаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
