Ўзбекистон Суперлигасининг 17-туридан ўрин олган “Навбаҳор” – “Пахтакор” (1:1) учрашувидан кейинги матбуот анжуманида мезбонлар бош мураббийи Самвел Бабаян иштирок этиб, ОАВ ходимларининг саволларига жавоб берди. Одатдагидек, Самвел Вячеславович ўз сўзини бўлиб ўтган ўйин ҳақидаги фикрлари билан бошлади.
- Тахмин қилинганидек, мазкур беллашув ҳеч кимни эътиборсиз қолдирмади. Чемпионатнинг икки етакчиси ўртасидаги баҳс бўлди. Менимча, бугунги баҳс даражаси Осиё Чемпионлар Лигаси билан баравар бўлди. Бугун ғалабага яқинроқ эдик, учрашувнинг 2-бўлимида қулай имкониятлардан фойдалана олганимизда, 3 очкони қўлга киритардик. Умуман олганда, йигитларнинг шижоати ва шогирдларимнинг ўйин сифати қониқтирди. Кийиниш хонасида айтган гапларимизнинг барчасини майдонда амалга оширишди.
- Яхшибоев бугун нега қайдномага киритилмади?
- Жасурнинг бувиси айни пайтда оғир касал. Айнан бувиси Жасурнинг футбол билан шуғулланишига сабабчи бўлган. Бувиси ёшлигида қўлидан ушлаб, футболга олиб борган. Жасур ҳозир оиласи даврасида. Бундай ҳолатда уни тушундик ва жавоб бердик.
- Ўзбекистон кубоги доирасидаги баҳсдан олдин қандайдир тактик ўзгаришлар қиласизми?
- Ўзбекистон кубоги ўйини борасида гапиришга ҳали эрта. Сабаби, бугунги ўйинни таҳлил қилишимиз керак. Ўз майдонимизда, мухлисларимиз билан бирга “Пахтакор”га қарши ўйнаймиз, барибир кубок доирасида қайсидир босқичда тўқнаш келишимиз мумкин эди. Демак, бу чорак финалда содир бўлар экан. Мавсумни безаб берадиган яна битта қизиқарли ўйин бўлади. Шундай экан, Ўзбекистон кубоги учрашувига максимал тарзда тайёргарлик кўрамиз.
- Бугун айнан қандай сабаблар туфайли ғалаба қозона олмадингиз?
- Сабаби, “Пахтакор” футболчиларининг ўйин сифати юқорилиги. Бугунги кунда бу клуб терма жамоанинг ўзагини ташкил этади. Биз кўрсатган ўйин эса йигитларимиз юқори даражада ўйнай олишлари ва натижага эриша олишларини кўрсатди.
- “Навбаҳор” ҳисобни очгач, дарҳол ҳимояга ётиб олгандек кўринди. Шу боис рақиб гол урди...
- Ўз дарвозамиздан тўп ўтказилган вазиятда рақиб позицион ҳужумда эди, чап қанот ҳимоясида бир-бирларини ўрнини тўлдира олмади. Шу боис, рақиб футболчиси эркин ҳаракат қилди. Биз юқори прессинг намойиш этдик, рақиб ҳимоячиларига босим қилдик. Эртами-кечми бундай юқори савиядаги футболчилар ташаббусни ўз қўлига олишлари шубҳасиз. Фақат ўз дарвозамиздан тўп ўтказган вазиятни ҳисобга олмаганда, позицион ҳимояланишни яхши амалга оширдик.
- Шацких бугун “Пахтакор” икки очко йўқотди, деб айтди, бунга сизнинг муносабатингиз қандай?
- Бошида айтдимку, иккинчи бўлимда биз гол уришга яқин эдик. Энди “ўлдирилмаган айиқнинг териси бўлиш”нинг фойдаси йўқ. Статистика бор, турли фактлар бор. Шу боис, шахсан менинг фикримча, биз ғалабага яқин эдик. Рақиб бош мураббийининг фикри эса менга умуман қизиқ эмас. Барча майдондаги футболни кўрди.
Кўпчиликка "Навбаҳор"нинг ўйини қизиқ эди. Менимча ўйин сифати бўйича рақобатбардош жамоага айландик. Балки қайсидир жойларда хато қилгандирмиз, аммо яратган барча нарса ўзимизники. Қиладиган ишларимиз бор, кубок ўйинигача кўп хатоларимизни тўғрилашга ҳаракат қиламиз.
- “Пахтакор” дарвозасига гол урилганида ҳиссиёт билан нишонламадингиз. Бу “Пахтакор”га бўлган ҳурмат туфайлими?
- Сабаби ҳали ўйин тугашига анча вақт бор эди. Ҳали иш охирига етмаганди. Ҳурмат қилишга келсак, барча билади менинг ДНКим бу “Пахтакор”
Унинг тарихига ҳурматим доим баланд, сабаби, ўзим унинг бир қисми бўлганман. Менимча доим ҳиссиётларни ушлаб туриш керак.
-“Пахтакор” бугун 3 нафар марказий ҳимоячи билан бошлади. Сиз бундай сюрпризни кутганмидингиз?
- Агар рақиб схемани алмаштирса ва ҳимояни кучайтирса, ким ғалабага яқинроқ экани ҳақида гапиришга ҳожат борми? Албатта биз учун кутилмаган ҳол бўлди, аммо қанотлардаги ўйинда бизга ёрдам берди. Кубок баҳсида кучли жамоа ғолиб бўлсин!
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
