Футзал бўйича Ўзбекистон миллий жамоаси келаси ҳафтада Осиё чемпионатида иштирок этиш учун Кувайтга жўнаб кетади. Терма жамоамиз бош мураббийи Баҳодир Аҳмедов ва жамоамиз аъзоси Даврон Чориев Ўзбекистон футбол ассоциацияси матбуот хизматига интервью берди.
Баҳодир Аҳмедов: — Осиё чемпионатига тайёргарлик жараёни яхши кетмоқда. Йигитларда машғулотларда яхши меҳнат қилишяпти. Улардан кўнглим тўқ. Яна 2та машғулот ўтказиб, 22 сентябрь куни Кувайтга учиб кетамиз. У ерда ҳамма шуғлотларни давом эттирамиз. Биринчи ўйинимиз эса 27 сентябрь куни бўлиб ўтади. Туркманистонга қарши бўладиган илк ўйинданоқ мухлисларимизни хурсанд қилишга интиламиз.
— Даврон, жамоадаги муҳит қандай? Ўйинчиларимиз бу мусобақадан нималарни кутишяпти? Даврон Чориев: — Жамоадаги муҳит жуда яхши, кайфяитлар аъло. Жисмоний тайёргарлик бўйича ёрдамчи мураббийлар келган, уларнинг кўмагида иш олиб боряпмиз. Мақсадимиз — олий, чемпионликни қўлга киритиш. Барча йигитларнинг фикру зикри ғолибликка қаратилган. Худо хоҳласа, Ўзбекистонга ёруғ юз билан қайтамиз, деган умиддаман.
— Баҳодир ака, сиз анчадан бери Нодир Элибоев билан жуфтликда ишлаб келасиз. Ундан ташқари, жамоага испаниялик мутахассис ёрдам бермоқда. Умуман олганда, мураббийлар штаби ҳақида маълумот бериб ўтсангиз. Баҳодир Аҳмедов: — Ҳа, жамоа мураббийлар штабига испаниялик мутахассис қўшилган. Бундан ташқари, дарвозабонлар мураббийи бўлишини ҳам истагандик. Аммо бунинг уддасидан чиқа олмадик. Ушбу вазифани Рустам Умаровга юкладик. Жамоамиз жуда аҳил. Худо хоҳласа, халқимизга байрам қувончини улашишни мақсад қилганмиз.
— Терма жамоамиз сафига янги футзалчилар қўшилганини кўряпмиз. Янгилар жамоага қанчалик қўшилиб кета олишди? Қайси чизиқларни янгиладингиз? Қайси ёшлар ўзларини яхши кўрсата олишяпти? Баҳодир Аҳмедов: — Аввало тажрибали футболчиларга раҳмат айтаман. Улар ёшларнинг жамоага қўшилиб кетишида ёрдам беришмоқда. Бизда доимо шундай бўлиб келган. Ёшларнинг тезроқ жамоага қўшилиб кетишида тажрибалиларнинг ҳиссаси катта бўлади. Ёшлар ҳақида фақат илиқ фикрларни айта оламан. Шафран, Далер, Асилбек, Хайрулла каби ёшларни ажратиб кўрсатишим мумкин.
— Давронни яқингача ҳам ёш футболчи деб атаб келарди. Энди сиз тажрибали футзалчига айландингиз. Кириб келган ёшларнинг жамоага қўшилиб кетишида сизда ҳам масъулият бор. Даврон Чориев: — Ёшларга қўлдан келганча билганларимизни ўргатамиз. Баъзида улар хато қилган пайтларда қаттиқ гапириб юборамиз. Бунинг учун улардан хафа бўлмасликларини сўрардим. Асосий билимларни мураббийлар беришади. Уларда тушунмаган жиҳатлар бўлса, биз ўргатишга ҳаракат қиламиз. Мемнимча, терма жамоамиз ишончли қўлларда деб айта оламан. Улар орасида иқтидорлилари кўп. Терма жамоамизда авлодлар алмашув жараёни бошланди. Жамоамизда 2002-2003 йилларда туғилган футзалчилар бор. Буни катта ўзгариш дея оламиз.
— Уларнинг маҳоратига шубҳа қилмаймиз, аммо катта турнирларнинг ўзига хос босими бўлади. Уларни бундай мусобақаларга руҳан тайёрлаш қандай кечмоқда? Баҳодир Аҳмедов: — Уларга буни тушунтириб боряпмиз. Ҳеч нарсадан қўрқмасдан, ҳеч нарсани ўйламасдан, мураббийнинг кўрсатмасига амал қилинса, муаммо юзага келмайди.
— Тайёргарлик жараёнида кўнггингиз тўлмаган ёки амалга ошмаган режаларингиз бўлдими? Баҳодир Аҳмедов: — Ҳаммаси жойида бўлди. Фақат битта муаммо — Кувайтда ўртоқлик учрашувларини ўтказишни ният қилгандик, аммо ОФК ҳеч бир терма жамоага Кувайтда ўртоқлик ўйинини ўтказиш имконини бермади. Қолган ишларда муаммо бўлмади.
— Ироққа қарши иккинчи ўртоқлик ўйинида терма жамоамиз мағлубиятга учради. Бу эса бизни бироз хавотирга солди. Баҳодир Аҳмедов: — Хавотирга ўрин йўқ. Биз ҳар иккала ўйин куни эрталаб жисмоний тайёргарлик бўйича машғулот ўтказиб, кечаси ўртоқлик ўйинини ўтказдик. Бу баҳсларда футзалчиларимиз чарчоқ ҳолатида тўп тепишди. Мақсадимиз — Осиё чемпионатига юқори формада бориш.
— Аввалги Осиё чемпионатида 3-ўринни эгалладик. Авлодлар алмашуви бошланганига қарамай, янада юқорироқ ўринга умид қилсак бўладими? Баҳодир Аҳмедов: — Албатта, юқорироқ мақсадларни олдимизга қўйпмиз. Мақсадимиз — чемпионлик. Тайёргарлик шунга қаратилган. Йигитларга ишонаман. ЖЧдаги ўйнаганимиздек ҳаракат қилсак, энг юқори ўринни эгаллаймиз.
— ЖЧдан кейин кўп футзалчиларимиз кейинги сафар Эронни мағлуб этамиз, деган мазмунда гапиришди. Ушбу ният ҳамон сақланиб турибдими? Даврон Чориев: — Иштиёқдан ташқари, Эронга қарши реванш кайфияти бор. Бу рақибни ютиш вақти келди. Бу жамоага қарши баҳсларда кўп гол уряпмиз. Аввалги тўқнашувларимизда бундай ҳолат кузатилмасди. Демак, бу жамоани ютсак бўлади.
— Бевосита гуруҳ босқичига тўхталсак. Рақибларимиз — Баҳрайн, Туркманистон ва Тожикистон. Рақибларимиз ҳақида қанчалик маълумотга эгасиз? Гуруҳдаги асосий рақибимиз ким бўлади? Баҳодир Аҳмедов: — Гуруҳдаги ҳар бир жамоа асосий рақиб бўлади. Чунки ҳар бир жамоа ўз олдига мақсад қўяди. Бу рақибларга қарши осон ўйин кутмаяпман. Уларнинг ҳар бири кучли. Ҳар бир рақибга кучли иштиёқ билан ўйнаш керак.
— Пандемия туфайли маълум вақт мусобақалар ўтказилмади. Терма жамоамиз бу сафар ўзини Осиё чемпионатининг етакчиси сифатида ҳис этадиган турнир соғинган бўлса керак? Баҳодир Аҳмедов: — Ҳа, сўнгги марта Осиё чемпионати 2018 йилда ўтказилганди. ЖЧдан олдин Таиланддаги мусобақада иштирок этдик, аммо Осиё чемпионатининг савияси ўзгача.
— Даврон, мухлисларимиз футзалчиларимизни яхши кўришади. Ўйинчилар ҳам мухлислар билан мулоқотдан қочмайди. Кетиш олдидан ишқибозларга айтар сўзингиз борми? Даврон Чориев: — Ўзбекистонлик мухлисларга раҳмат айтаман. Шу даражага етишишимизга уларнинг ҳиссаси бор. Улар кўча кўйда бизни кўришганида доимо илиқ муносабатда бўлишади. Кувайтдаги Осиё чемпионати бизга мухлислик қилинг, деб қоламан. Сизларни уялтириб қўймасликка ҳаракат қиламиз.
— Бизнинг жамоа ҳар доим охиригача жанг қилади. Бу галги мусобақада жанг қилиб, мағлуб бўлмасдан, юртимизга ғалаба билан қайтишингизни тилаб қоламиз.
Манба: stadion.uz
Киритилди: 15:19, 20.09.2022. Ўқилди: 2231 марта. Фикрлар: 8 та.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
