Италиянинг «Милан» клуби янги бош мураббий излаш жараёнини давом эттирмоқда ва «Манчестер Юнайтед»нинг собиқ устози Рубен Аморим билан музокаралар олиб борди. Бу ҳақда Football Italia нашри хабар бермоқда.
Якунланган мавсумдан сўнг клубни Массимилиано Аллегри, Игли Таре, Жоффруа Монкада ва Джорджо Фурлани каби мутахассислар тарк этган эди. Шу сабабли «россонери» раҳбарияти айни пайтда янги бошқарув тузилмасини ва мураббийлар штабини шакллантириш билан банд.
Ҳозирда «Милан» учун асосий вариант Ральф Рангникни клуб техник директори лавозимига тайинлаш бўлиб турибди. Агар немис мутахассиси таклифни қабул қилса, унинг ғоявий издошларидан бири ҳисобланган Оливер Гласнер жамоа бош мураббийига айланиши мумкин. Гласнер яқиндагина «Кристал Пэлас»ни тарк этган ва айни дамда эркин агент мақомида. Бироқ миланликлар мураббий масаласини ҳал қилишдан аввал, техник директор номзодини аниқлаштириб олмоқчи.
Вазиятни мураккаблаштириб турган жиҳат шундаки, Рангникнинг Австрия терма жамоаси билан амалдаги шартномаси мавжуд ва Австрия футбол ассоциацияси у билан келишувни узайтириш ниятида.
«Милан» раҳбарияти Рангник ва Гласнер атрофидаги вазият ойдинлашишини кутиш билан бир вақтда, бошқа номзодлар билан ҳам алоқани узмаяпти. Аввалроқ АҚШ терма жамоаси бош мураббийи Маурисио Почеттино билан алоқага чиқилгани маълум бўлган эди, эндиликда даъвогарлар қаторига Рубен Аморим ҳам қўшилди.
Қайд этилишича, ҳозирча на Аморим ва на Почеттино миланликлар учун бош даъвогар ҳисобланади. Оливер Гласнер ҳали ҳам асосий фаворит бўлиб турибди, бироқ австриялик мутахассис «Милан» таклифини рад этса, вазият тубдан ўзгариши мумкин.
Матнда хатолик топсангиз, ўша хатони белгилаб, бизга жўнатинг (Ctrl + Enter).