Мбаппенинг келажаги ноаниқлигича қолмоқда. Килиан Парижни тарк этиши учун нима қилиши керак?
Килиан Мбаппе ЖЧ-2022дан кейин таътилини бекор қилди ва финалдан уч кун ўтиб машғулотларга қайтди. Форвард бош мураббий Кристоф Галтье билан учрашди ва машғулотларни тезроқ давом эттириш истагини билдирди. У бунга жисмонан ва руҳий жиҳатдан тайёр эканлигини тасдиқлади. Мбаппе жаҳон чемпионати финалида учта гол урди, аммо Франция терма жамоаси Аргентинага ютқазди (3:3, пенальтилар сериясида 2:4). Килианни шундай аламли мағлубиятдан кейин тезроқ майдонга қайтиш истаги учун мақташ мумкин. Мбаппенинг ўйин-кулгилари, кутилганидек, ҳужумчининг клубдаги фаолиятига салбий таъсир кўрсатиши мумкин ва жиддий оқибатларга олиб келади. Мадриднинг «Реал» клуби яқин орада Килиан Мбаппени сотиб олишни режалаштирмаяпти. Marca нашри хабарига кўра, клуб Мбаппе ва унинг атрофидагиларнинг ғалати ҳаракатларидан чарчаган. «Реал Мадрид» раҳбариятининг ҳеч бири Килиан трансферини амалга ошириш зарур деб ҳисобламайди. Президент Флорентино Перес кийиниш хонасида Винисиус Жуниор ва Родригонинг позицияларини мустаҳкамлашга устувор аҳамият беради.
«Йўқ, Мбаппе ҳақидаги миш-мишлардан чарчамадим. Аммо мен бу ҳақда ҳеч нарса ўқимаганман! Винисиус ва Родриго билан бизни ажойиб келажак кутмоқда. Булар «Олтин тўп»ни қўлга киритиши мумкин бўлган энг яхши футболчилардир» — деди Перес жаҳон чемпионати бошланишидан олдин. «Реал Мадрид» президентининг Қатардаги турнирдан кейин ҳам позицияси ўзгармади. Ҳа, бу мавсумда Мбаппе ажойиб статистика кўрсатмоқда. У «ПСЖ» сафида барча мусобақаларда 20 та ўйинда майдонга тушиб, 19 та гол урди ва 5 та голли узатмани амалга оширди. Жаҳон чемпионатида ҳужумчи еттита ўйинда саккизта гол урди ва иккита голли узатмани амалга оширди. Килиан «Реал»га кўп нарса таклиф қила олади, аммо унинг трансфери ортидан бир қанча «ножўя таъсирлар» вужудга келиши мумкин.
Переснинг фикрича, жамоада ва унинг атрофида соғлом муҳитни сақлаб қолиш анча муҳим. Мбаппенинг шов-шувли трансфери эса клубга турли ноқулайликларни олиб келади. Бундан ташқари, молиявий омилни ҳам ҳисобга олиш керак.
«ПСЖ» билан тузилган шартномага кўра, Мбаппе уч йил давомида 636 миллион евро олиши керак. Мадрид клубининг трансфер харажатларининг умумий суммаси эса уни сотиб олишни ҳисобга олган ҳолда 1 миллиард еврони ташкил қилиши мумкин, футболчининг иш ҳақи ва турли бонуслар ҳам бор. Бундан 20 йил олдин Перес шундай пул сарфлаши мумкин эди, аммо «галактикос» даври аллақачон ўтиб кетди, ҳозир вазият бошқача.
Биринчидан, клубнинг молиявий тизими пандемиядан сўнг аввалгидек яхши ишламаяпти. Иккинчидан, энди Флорентино анча прагматик функционерга айланди ва ҳар бир тийинни санайди. Учинчидан, Мбаппе музокараларда Пересни алдаб, сўнгги лаҳзада «Реал»ни рад этди. Мадрид клуби президенти, албатта, Мбаппе ва унинг атрофидагиларнинг интригаларини унутмаган. Эҳтимол, у бу хатти-ҳаракатларини шахсий ҳақорат сифатида қабул қилган. Перес ҳужумда Карим Бенземага таянади ва Винисиус ҳамда Родригонинг аҳамияти аста-секин ўсиб боришига ишонади. Marca нашри хабарига кўра, у Мбаппени эмас, балки «Манчестер Сити»дан Эрлинг Холандни сотиб олишга ҳаракат қилади. Яқин орадаги Эндрик трансферидан сўнг Мадрид клуби «Боруссия» ярим ҳимоячиси Жуд Беллингемни ўз сафига қўшиб олмоқчи, шунинг учун агар клуб кўп пул сарф қилмоқчи бўлса, буни бир футболчи учун сарфлаш керак эмас.
Мбаппенинг «ПСЖ»даги келажаги номаълумлигича қолмоқда. Ҳужумчи «Реал»га ўтишдан бош тортган ва француз гиганти билан янги шартнома имзолаганидан кейин бир неча ой давомида хафа бўлиб юрди. Бу эса клубни парокандаликка олиб келди, дея хабар беради The Athletic. Мбаппе ҳужумдаги шериги Неймар билан келишмовчиликни ҳалигача ҳал қилмаган. Майдондаги иккала ўйинчи ҳам ҳаммаси жойида деб кўрсатишга ҳаракат қилади, аммо ҳар қандай вақтда кийиниш хонасида «портлаш» хавфи бор. Бундан ташқари, Килиан «ПСЖ»нинг трансфер сиёсатидан норозилигини билдирди. Мавсум давомида клуб президенти Носир Ал-Хелайфи ва спорт директори Луис Кампос Мбаппени тинчлантириш мақсадида бир неча бор юзма-юз учрашишди. Улар Килиан қишки трансфер ойнасида кетмаслигига келишиб олган кўринади. Бироқ бу кейинчалик вазиятга қараб кўриб чиқилади.
Мбаппе мавсумни Парижда талофатсиз якунлай оладими ёки йўқ, бу катта савол. Жаҳон чемпионати финалида Лионель Мессининг Франция устидан қозонилган ғалабасига у қандай муносабатда бўлади? Шу сабаб жамоада низо келиб чиқадими? Месси парижликлар билан янги шартнома бўйича келишиб олди - Marcaнинг таъкидлашича, бу жамоанинг ягона етакчиси бўлмоқчи бўлган Килианга тўғри келмайди. Ёки ёш ҳужумчи яна раҳбарият билан трансфер сиёсати борасида баҳслаша бошлар? Айрим нашрлар яқинда Килиан гўёки клуб раҳбариятига янги ультиматум қўйганини ёзди. 24 ёшли футболчи Париж жамоасида қолишга тайёр, агар учта шарт бажарилса: Неймарни сотиш, «Тоттенхэм»дан Харри Кейнни сотиб олиш ва Зинедин Зиданни бош мураббий этиб тайинлаш. Агар «ПСЖ» Мбаппенинг талабларини бажаришдан бош тортса, у 2023 ёки 2024 йилнинг ёзида клубни текинга тарк этади. Манба шубҳали, аммо талаблар қўйиш Килиан услубига жуда мос келади.
The Athletic 2023 йилги мавсум оралиғида Мбаппе атрофида янги трансфер эртаклари пайдо бўлганини айтмоқда. «ПСЖ» ҳужумчини текинга қўйиб юбормоқчи эмас. Парижликлар унинг учун 300-350 миллион евро олмоқчи.Музокаралар жараёнида улар албатта нархни пасайтиради, бироқ Мбаппе учун тўланадиган маблағ барибир янги трансфер рекордига айланиши мумкин. Дунёда бу ҳолатда «ПСЖ»нинг молиявий эҳтиёжларини қондира оладиган клублар кам. Агар Флорентино Перес ўз позициясини тубдан ўзгартирмаса, «Реал Мадрид» у учун даъвогарлар рўйхатидан чиқиб кетади.
«ПСЖ» Килианни унинг иродасига қарши Англияга сотиши мумкин, бу жуда ёмон сцсенарий дегани. Бундай вазиятда ҳужумчи нима қилиши керак? У фақат «ПСЖ» билан муносабатларни яхшилаш учун қолади, аммо бунинг учун ҳаддан ташқари эгоизмни ҳам камайтириш керак бўлади. Мбаппе бунга эриша оладими? Бу саволга жавоб Европа футболининг 2023 йилдаги асосий интригаларидан биридир.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
