Муборакда футбол ўйнайдиган фақат битта жамоа бор. У ҳам бўлса «Машъал». Биз бир гуруҳ қашқадарёлик мухлислар жонажон жамоамиз «Машъал»нинг шу йилги чемпионатда қайд этаётган қониқарсиз натижалари сабабли ушбу мақолани ёзишга мажбур бўляпмиз.
Ҳозир олий лига жадвалининг энг пастки ўринида «Машъал»нинг жой эгаллаб турганини ҳамма яхши билади. Бу жамоа кетма-кет ўйинларда ютқазишда давом этяпти. Мураббийлар ҳам, жамоа раҳбарлари ҳам «Машъал»ни энг пастки ўриндан олиб чиқиб кетиш учун ҳеч нарса қилишмаяпти. Бу эса биз мухлисларни жуда хафа қилмоқда. Бу турда «Андижон» ғалаба қозонганидан кейин бу жамоа яна олдинга ўтиб олди. «Машъал» эса яна охирги ўринга қайтди. Ҳамма яхши билади, футболда жамоа натижа кўрсатавермаса биринчи бўлиб бош мураббий ишдан кетади.
Мана вилоятимизнинг қолган икки жамоси билан шундай бўлди. Аввалига «Насаф», кейин «Шўртан» жамоалари бош мураббийлари ишдан кетди. Лекин «Машъал»да ҳалиям Фомичевнинг миқ этмай ишлаб юргани ҳаммани ҳайрон қолдирмоқда. Бу мураббий на ўз хоҳишига кўра ишдан кетяпти, на клуб раҳбарлари уни ишдан бўшатишди. Худди ҳеч нарса бўлмагандек Фомичев ишлаб юрибди. Лекин унинг натижаларини сира мақтаб бўлмайди. Жамоа иккинчи даврада тўртта ўйин ўтказиб бирорта ҳам ғалаба қозона олмади. Энг ачинарлиси, ўз майдонидаги иккита ўйинда ҳам ютқазиб қўйди. Айниқса жамоамизнинг «Локомотив»га ютқазиб қўйгани жуда алам қилди. Чунки бир амаллаб «Локомотив»ни ютса бўларди. Лекин Фомичев бор экан «Машъал» ҳали-бери ютмайди. Чунки унин тайинли тактикаси ҳам, ўйин услуби ҳам йўқ. Футболчилар 90 дақиқа шунчаки югуриб беришяпти. Мухлислар бу мураббий билан жамоа аниқ биринчи лигага тушиб кетишини жуда яхши ҳис қилиб туришибди. Аммо шу оддийгина нарсани «Машъал» раҳбарияти умуман тушунаётгани йўқ. Биз ҳайронмиз нега клуб президенти Фомичевни ҳалигача ишдан олмаяпти? Жамоа раҳбари Фомичевдан қўрқадими ёки унинг олдида тили қисиқ жойи борми? Очиғи жамоа ичида нима бўлаётганини билмаймиз.
Мана «Андижон»да бош мураббий ўзгарганди, Азамат Абдураимов келганидан кейин улар «Қизилқум»ни 5:1 ҳисобида ютиб қўйишди. Энди кейинги турда улар Муборакка келиб «Машъал» билан камида дуранг ўйнаб кетишади. Бунга ҳозирданоқ кўникиб бўлдик, чунки «Машъал»да ўйиннинг ўзи қолмади. Жамоа ҳадеб ютқазавериб руҳан синиб бўлди. Футболчиларни руҳан Фомичев синдирди. Лекин шунда ҳам кетмасдан ишлаб юрибди. Аслида унинг ўзи ҳам, ўғли ҳам «Машъал» учун жон куйдираётгани йўқ. Улар чет эллик бўлгани учун «Машъал» биринчи лигага тушиб кетса ҳам уларга буни қизиғи йўқ. Тушиб кетганидан кейин гўёки ҳеч нарса кўрмагандай индамай кетаверишади. Агар «Машъал» кейинги йил биринчи лигада ўйнайдиган бўлса, Муборакда футбол аниқ ўлади, лекин ҳозир ҳам ўлиб бўлган, чунки «Машъал»нинг олий лигада қолишига кучи қолмади. Биз мухлислар эса доим хавотирдамиз.
«Машъал»ни жарликдан ким олиб чиқиб кетишини билолмай ҳайронмиз. Тўғриси, клуб раҳбарларидан ҳам кўнглимиз совиб кетди. Айниқса улар Фомичевни бир ишдан олиб кейин яна жойига қайтариб қўйишганидан сўнг раҳбарлар Фомичевдан қўрқар экан деган хаёлга бордик. Бўлмаса бошқаларага ўхшаб шартта ишдан олиб уйига кетказишарди. Фомичев қайтиб келганидан кейин ўғли ҳам қайтиб келди. Чунки уни бошқа ҳеч қайси жамоа олмайди. Ўғлининг ўйини умуман йўқ, у ҳар ўйинда ўз дарвозасига голлар олиб келишни билади холос. Лекин шунда ҳам Фомичев ўғлини қайтариб олди. Нега клуб раҳбарлари бунга бефарқ қарашяпти? Нима учун Ўзбекистон футбол федерацияси Тошкентдан одам жўнатиб «Машъал»нинг тақдири билан қизиқмаяпти? Шундай жамоа энди ўз-ўзидан йўқ бўлиб кетаверадими?
Бу Фомичев деганлари «Машъал»ни ўлдиргани етмагандек бирйўла кўмиб кейин кетса керак. Биз мухлислар эса ҳар доимгидек жабр чекиб қолаверамиз. «Машъал» раҳбарларининг лоқайдлиги, ўз сўзида турмаслиги туфайли бугун жамоамиз мана шундай аҳволга тушиб қолди. Бўлмаса «Машъал»дек шароит унча-бунча жамоада йўқ. Бу ердан етишиб чиқаётган ўйинчиларга кўпчилик ҳавас қилади. Энди бирорта яхши футболчини етишиб чиқиши ҳам қийин бўлиб қолди. Ахир Муборакда футбол ўлганидан кейин ҳеч ким етишиб чиқмайди-да. Биз мухлислар Фомичевни биронта стадионда кўрсак очиғи унга қарагимиз ҳам келмайди. Муҳтарам Президентимиз Ўзбекистонда футболни ривожлантириш керак деб доим айтаётган бир паллада Муборакда баъзи кимсалар футболни фақат орқага тортишяпти. Шундай чиройли стадиони бўла туриб «Машъал»нинг ҳеч ўйини чиқмаяпти. Бўлмаса Муборакдагидек майдонда футбол ўйнашни ҳамма орзу қилади. Фомичев эса шундай чиройли майдонда футболчиларга тўп тепишни ўргата олмаяпти.
Энди биз мухлисларни қийнаётган бир савол қолди, яъни Фомичев деганлари қачон жамоадан кетади? Агар шу мураббий кетадиган бўлса «Машъал» яна олдинги обрўсини тиклаши мумкин, бўлмаса чемпионат тугаганидан кейин тўғри биринчи лигага қараб кетади. Агар жамоа раҳбарларида салгина бўлса ҳам орият бўлса тезда мураббийни ишдан олиб ўрнига бошқа кучли мураббийни олиб келишсин. Шундагина биз «Машъал»нинг қайта уйғонишига ишонамиз. Агар катталарнинг Фомичев олдида тили қисиқ жойи бўлса, унда бизни кўп қийнашмасин. Муборакда футболни биратўла йиғиштириб қўя қолишсин. Чунки ҳадеб футболчиларнинг ўйин тугаганидан кейин бошни эгиб стадиондан чиқиб кетаверишини кўриш жонга тегди.
Биз мухлисларнинг «Машъал» раҳбарларига айтадиган бундан бошқа сўзимиз қолмади. Агар сизлар ҳақиқий раҳбар бўлсангиз ҳозирги вазиятга тезда ўзгартириш кераклигини кутиб қоламиз.
Бир гуруҳ қашқадарёлик футболнинг жонкуяр мухлислари.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
