Бу мавсумда мерсисайдликлар учун ҳаммаси қийин ва мураккаб кечди. Жамоа ҳозирда 10 ўринга тушиб қолган, кубок баҳсларини тарк этган ва ЕЧЛда "Реал"га дуч келадиган бўлиб турибди. Бу ҳам етмаганидек, "Вулверхэмптон" каби жамоалар "Ливерпул"ни йирик ҳисобда мағлуб этмоқда. Аммо умидсизликка тушмаслик керак. Ҳаммаси жойида бўлади. Агарда қуйидаги ижобий жиҳатлар тўлиқ бўй кўрсатса, албатта.
1. Жамоа мураббийи ҳали ҳам Юрген Клопп
"Вулверхэмптон"га қарши шармандали мағлубиятдан кейин Клопп кўп камчиликларни айтди. Аммо биз уни яхши биламиз. "Ливерпуль" бундан ҳам оғир вазиятлардан Клопп орқали қандай қилиб қутулиб кетганларини бир эсланг. Шундай экан, Клоппга ҳурмат сақланиши керак. Унинг тизимида нималардир бузилиб қолган бўлиши мумкиндир. Аммо тезда жойига келади. Ҳархолда, шунга умид қиламиз. Ҳозирги дамда "Ливерпул"га Клоппдан кўра керакроқ шахс йўқ (бўлса керак).
2. Асосий ҳужумчилар қайтмоқда
Диогу Жота, Луис Диас ва Роберто Фирминолар тез орада тўлиқлигича жамоага қайтади ва ўйинларда иштирок эта бошлайди. Ҳа, Фирмино 2023 йилда жамоа ҳужумидаги асосий фигура эмасдир. Аммо унинг Коди Гакподан кўра яхшироқ ҳаракат қилиши ҳаммага аён. Ҳеч бўлмаганда, тўққинчи рақам ҳудудида. "Ливерпуль" мавсум давомида рақиб дарвозаси олдида голли вазият яратишга қийналди. Бу ҳам аслида ҳужумчиларнинг жароҳати ва формасизлиги оқибатлари эди. Демак, яқин орада Клопп жамоаси ҳужумига ҳақиқий куч қўшилишини кўришимиз мумкин бўлади.
3. ЕЧЛдан чиқиб кетиш, аммо босимдан қутулиш
Февраль ойи ЕЧЛ плей-офф ўйинлари бошланадиган даврдир. Шу ердан бошлаб "ПСЖ" ва "Бавария" каби клублар қаттиқ ишга киришади. Омадсизликни қарангки, нимчорак финалда "Ливерпул"нинг рақиби амалдаги чемпионлар бўлмиш "Реал" бўлди. Бу жамоага ЕЧЛда қаршилик кўрсатиш ўта мураккаб иш, гарчанд ўйин иккига бўлинса ҳам. Бу сафар "Барселона" ва "Ювентус" каби жамоалар ҳам ЕЧЛда қатнашмаяпти. Ҳеч бўлмаса, чиқиб кетиши мумкин бўлган Клоппга шу ҳам таскин беради. Бу турнирдан кетилгани билан, катта босимдан ҳалос бўлинади. Кейин эса ҳамма эътиборни АПЛга қаратиш мумкин.
4. Кейинги йилги ЕЧЛ йўлланмасини ҳали ҳам қўлга киритиш мумкин
Ҳозирги аҳволига қарамасдан, биз "Ливерпул"ни кучли тўртлик учун курашдан бутунлай чиқариб ташлай олмаймиз. Негаки, ҳали лигада 18 та ўйин кутиб турибди. Тўртинчи ўрин билан фарқ эса атиги 11 очкони ташкил этади. Натижа кела бошласа, тўртинчи ўринга чиқиб олиш ҳеч гап эмас. Қолаверса, "Ливерпул"дан тепада нисбатан мўрт бўлган "Брентфорд", "Брайтон", "Фулхэм" каби клублар бор. Уларни доғда қолдириш унчалик ҳам мураккаб эмас. Хуллас, ҳаммаси "Ливерпул"нинг ўз қўлида.
5. Келаётган ёзда топ ярим ҳимоячи хариди
Бу нарса аниқ! Ҳа, эндиликда амалга ошириладиган трансфер балки Жуд Беллингем бўлмас (ҳеч бўлмаса, юқоридаги фаразлар амалга ошмагунга қадар), бироқ барибир яхши даражага эга ярим ҳимоячи харид қилинади. Жоржиньо Вийналдум кетганидан бери Юрген Клопп ярим ҳимоядаги кемтикларни тўлдира олмади. Келаётган ёзда бунинг айни пайти бўлади. Харҳолда, Артур Мело каби ХАТОларга йўл қўйилмайди деган умидимиз бор. Буёғини эса вақт кўрсатади...
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Навбаҳор
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
