Сўнгги тур натижалари шуни кўрсатдики, АПЛда ЕЧЛ йўлланмаси учун кураш ҳали узоқ давом этади. Аммо туманли Албиондаги жанглар фақатгина бу билан чекланиб қолмайди. Буни жуда ҳам яхши биласиз. чемпионлик учун, қолаверса, турнирда жон сақлаб қолиш мақсадидаги курашлар ҳам сўнгги тургача ўз актуаллигини йўқотмаслиги аниқ.
"Манчестер Юнайтед"нинг ўз майдонида "Саутгемптон" билан дуранг ўйнаши, ҳали бу жамоанинг руҳияти "Ливерпул"га қарши қақшатқич мағлубиятни ҳазм қила олмаганини кўрсатди. Эрик тен Хаг жамоаси бу кетишда, ўз 3 ўринни ҳам бой бериб қўйиши ҳеч гап эмас. Негаки, кейинги поғонадаги "Тоттенхэм" жорий турда "Ноттингем"ни мағлуб қилиб, "қизил иблислар"га икки очколик масофада яқинлашиб олди. Шунингдек, кучли тўртликка даъвогар саналган "Ньюкасл" ҳам "Вулвз"ни таслим этиб, олтинчи ўриндан бешинчига кўтарилиб олди. Кейинги поғоналарда кетаётган "Брайтон", "Брентфорд" ҳамда "Фулхэм"лар очко йўқотди. Хўш, мана шундай натижалардан кейин, жамоаларнинг тақдири не кечади. Суперкомпютер энг сўнгги натижаларга қараб мавсумнинг якуний турнир жадвалини тахмин қилди.
Демак, "Тоттенхэм" ҳафта охиридаги ғалабасига қарамай, кучли тўртликни забт эта олмайди. "МЮ"нинг жорий позицияси ўзгармайди ва мавсум охирида ҳам ўз жойида қолади. ЕЧЛ учун охирги йўлланмани "Ньюкасл" қўлга киритиши айтилган. Айни дамда "қарғалар"га кучли тўртталикка қайтиш учун 4 очко зарур. Аммо улар "Тоттенхэм"дан иккита кам ўйин ўтказган.
38 турдан кейин "Арсенал" "Манчестер Сити"дан олдинда қолаверади ва чемпионликни узил-кесил ҳал қилади. Лондонликлар 27 турдан кейин беш очколик фарқ билан етакчилик қилмоқда. Ҳа, яна 10 турдан кейин Пеп Гвардиола "Арсенал"га анча яқин келади. Аммо бу чемпионликка етарли бўлмайди.
Турнир жадвалининг пастки якунида ҳам кураш кечади. Суперкомпютерга кўра, "Борнмут", "Эвертон" ва "Саутгемптон"лар Чемпионшипга йўл олади. Қизиғи шундаки, тахминда ушбу жамоалар ўзининг сўнгги, 38 тур ўйинида "Ливерпуль", "Эвертон" ва "МЮ"ни мағлуб этади. Аммо бу етарли бўлмайди.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).