Сўнгги хабарларга кўра, Лионель Мессига Саудия Арабистони клуби йилига 1 миллиард фунтлик шартнома таклиф қилган. Foot Mercato'нинг ёзишича, агарда Месси бу таклифни қабул қилса, у ҳолда арентиналик Роналдудан кўра, икки баробар кўп маошга эга бўлиши мумкин. Шунингдек, Мессининг Ўрта шарққа ташрифи, унинг Роналду билан рақобатини қайтадан тиклайди. Яъни, бир чемпионатда бу афсоналар ўзаро рақиб бўлган клублар шарафини ҳимоя қилади.
Юқоридаги эҳтимолга қарамасдан, Месси олдида Ла-лигага қайтиш варианти ҳам мавжуд. У яна "Барселона" сафида тўп тепиши мумкин. Каталония клубига бу борада Дэвид Бекхэм клуби ёрдам беради. Француз матбуотида тарқалган хабарларга кўра, "Интер Майами" жамоаси Месси билан битим тузади ва янги мавсум олдидан уни "Барселона"га ижара асосида беради. Унинг ижара даври олти ойдан 18 ойга қадар давом этади ва якунда у МЛСга доимий равишда қайтиб кетади.
Мессининг "ПСЖ"дан кетиши аниқ бўлиб улгурган. Шу сабабдан у парижликларнинг чемпионлик парадида ҳам қатнашмаган. "Барселона" бош мураббийи Хави Мессининг қайтишига қаттиқ ишонмоқда.
У бу ҳақида шундай дейди: "Мухлисларимиз жамоанинг ҳар бир ўйинида Месси номини айтиб, куйлашмоқда. Бу менга ёқади. Аммо Леонинг қайтиши фақат унинг ўзига боғлиқ. Мен қайтишни 99 фоизи Мессига боғлиқ деб биламан. Футбол нуқтайи назаридан шундай. Лекин бу ерда бошқа омиллар ҳам бўлади".
Лионель Месси ўз севимли жамоасида ҳаракат қилиши учун текинга ўйнашга ҳам рози бўлиши айтилган. Бу ҳақида журналист Бен Якобс шундай ёзади: "Месси ҳеч бир иккиланишларсиз "Барса"да текинга ўйнай олади. Ҳеч бўлмаса, у моашининг катта қисмидан воз кечиши керак. "Барселона"нинг молиявий муаммолари Мессининг қайтишини қийинлаштиради. Бунинг учун футболчи сотишга ҳам тўғри келиши мумкин".
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).