Кўпгина клубларга ҳужумларни якунлаб бера оладиган форвардлар етишмаяпти. Transfermarkt талқини бўйича дунёнинг энг қиммат ҳужумчилари ҳақида таништириб ўтамиз.
Габриель Жезус ("Арсенал", 75 миллион евро)
"Манчестер Сити"да Жезус ҳар доим ҳам етарлича ўйин ўтказа олмади. "Арсенал"да эса Габриель дарҳол асосий таркиб футболчисига айланди, чунки Артета у билан бирга ишлашни хоҳлади. 25 ёшли ҳужумчи ўтган мавсумда АПЛда 26 та ўйинда майдонга тушиб, 11 та гол урди ва 6 та голли узатмани амалга оширди. Шубҳасиз, бразилиялик футболчи тиззасидан жароҳат олмаганида бунданда самаралироқ натижа қайд этарди. Жезуснинг иқтидорига ҳеч қандай шубҳа йўқ, шунинг учун у юқори баҳоланади.
Кристофер Нкунку ("Челси", 80 миллион евро)
Нкунку дастлаб ҳужумкор ярим ҳимоячи сифитида ўйнади. Аммо сўнгги пайитларда футболчи аста-секин ҳужумчига айланиб бормоқда ва бу борада анча самарали натижа қайд этмоқда. 2021/22 йилги мавсумда Кристофер Бундеслгада мавсумнинг энг яхши футболчиси деб топилди. Ўтган мавсум якунида у "Вердер" ҳужумчиси Никлас Фюлькруг билан бирга Германия чемпионатининг энг яхши тўпурари бўлди. Нкунку якунига етган мавсумда Бундеслигада 25 та ўйинда майдонга тушиб, 16 та гол урди ва 4 та голли узатмани амалга оширди. Ёзги трансферлар ойнасида у "Челси" футболчисига айланди. Шубҳасиз, "аристократлар" сифатли ҳужумчи харид қилди.
Рандаль Коло-Муани ("Айнтрахт", 80 млн евро)
Рандалга топ клубларнинг қизиқиши аста-секин орти бормоқда. Франциялик футболчи аллақачон 2 мавсумни юқори савияда ва турли жамоаларда ўтказган. 2021/22 йилги мавсумда у "Нант" сафида 12 та гол урди ва жамоанинг энг яхши тўпурарига айланган. Сўнгра у "Айнтрахт"га ўтди. 24 ёшли ҳужумчи якунига етган мавсумда Бундеслигада 32 та ўйинда майдонга тушиб, 15 та гол урди ва 11 та голга ассистентлик қилган. Коло-Муани юқори даражадаги ўйинларни ўтказди, гол+пас тизимида 26 очко, гапимиз исботи. Ҳужумчига "Бавария" асосий даъвогар.
Лаутаро Мартинес ("Интер", 85 млн евро)
Лаутаро Жаҳон чемпионатида ўзини деярли кўрсата олмади, ҳаттоки гол уришга ҳам муваффақ бўлмади. Шу сабабли кўпчилик Лаутаронинг иқтидорига шубҳа қилди. 25 ёшли форвард якунига етган мавсум А Серияда 38 та ўйинда майдонга тушиб, 21 та гол урди ва 6 та голли узатмани амалга оширди. Аргентиналик футболчи кетма-кет 2 йил давомида Италияда ҳар мавсум 20 дан ортиқ гол уриб келмоқда. Шунингдек, у "Барселона", "Бенфика" ва "Милан"га қарши ўйинларда муҳим голларни уриб, "Интер"нинг Чемпионлар лигаси финалига чиқишига катта ҳисса қўшди. "Нерадзуррилар" футболчини қадрлайди ва миш-мишларга қармай, у билан хайрлашишни режалаштирмаяпти.
Харри Кейн ("Тоттенхэм", 90 млн евро)
"Тоттенхэм" сардори номини сифат, барқарорлик ва юқори даража каби сўзларининг синонимлари билан боғлаш мумкин. Ҳар бир мавсум "шпорлар" учун омадли келавермайди, лекин Кейн ҳамиша ўз жамоасида энг яхшиси бўлиб қолади. Лондонликлар мавсум давомида мураббийларни алмаштириб, сўнгги турларда муваффақиятсизликка учради. Аммо 29 ёшли ҳужумчи АПЛда 38 та ўйинда майдонга тушиб, 30 та гол уришга эришди. Бу натижа Харррининг ўтган мавсумдагилардан анча яхши кўрсаткичи эди. Кейн "Тоттенхем"ни тарк этиши мумкинлиги ҳақидаги хабарлар тарқалди. Лекин у қолишни ўйламоқда. Сон ва Мэддисон каби шериклар билан янада ёрқин ўйинлар намойиш этиши мумкин.
Виктор Осимхен ("Наполи", 120 млн евро)
Осимхен фаолиятидаги энг ёрқин мавсумни ўтказди, шу туфайли у трансфер нархини 2 баравар оширди. 24 ёшли ҳужумчи якунига етган мавсум А Серияда 32 та ўйинда 26 та гол урди ва 4 та голли узатмани амалга оширди. Нигериялик футболчи лиганинг энг яхши тўпурарига айланди ва Скудетто учун курашда жамоасига катта ёрдам берди. Осимхенга Европанинг бир қанча клублари қизиқиш билдирмоқда. Аммо неаполликлар футболчини олиб қолмоқчи. Ҳозирча шартнома борасида келишувлар йўқ.
Килиан Мбаппе (ПСЖ, 180 млн евро)
Ҳар мавсум охирида Мбаппенинг трансфери борасида янги саҳифалар очилади. "Реал"га ўтиш, ёки Парижда қолиш борасида бир қарорга келганича йўқ. Бундай вазиятларга қарамай, Килиан сифатли футболчи бўлиб қолмоқда ва Лига1 тўпурари унвонини муносиб ҳимоя қилиб келяпти. 24 ёшли ҳужумчи якунига етган мавсумда 34 та ўйинда майдонга тушиб, 29 та гол урди ва 5 та голли узатмани амалга оширди. Мбаппе 2018/19 йилги мавсумда 33 та гол уришга муваффақ бўлганди.
Эрлинг Холанд ("Манчестер Сити", 180 млн евро)
"Манчестер Сити" Холанд билан шартнома имзолаши биланоқ "шаҳарликлар" омадли харид амалга оширгани дарҳол маълум бўлди. Дортмунднинг "Боруссия" клубидан келган ҳужумчи янги жамоасида ҳам ўзини кўрсатишга киришди. Премьер Лигадаги илк мавсумдаёқ 35 та ўйинда 36 та гол урди ва 8 та голли узатма амалга оширди. Энг яхши тўрупурар, требл ва "Олтин бутса". Холанд ажойиб мавсум ўтказди. Унинг кейинги мавсумлардаги натижаларини кузатиш қизиқ бўлади.
Ёзги трансферлар ойнаси ҳали ёпилмади ва буларнинг орасида кимнингдир нархи кўтарилиши эҳтимоли бор. Чунки ҳужумчига эҳтиёжи бор клублар маблағни аяшмайди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Навбаҳор
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
