Футболда такрорланадиган нарсалар жуда кўп. Шулардан бири мавсумолди баҳслари ҳисобланади. Бу ўйинлар тез-тез ва дунёнинг ҳар қайси бурчагида ўтказилади. 2023 йилнинг ёзида жамоалар кўплаб учрашувларда иштирок этди. Бироқ, «Реал»га нисбатан бундай дея олмаган бўлардик. Клуб икки марта ўйин ўтказди ва ўша икки баҳс ҳам ўта жиддий рақибларга қарши эди. Шунга қарамай, ғалабага эришилди. «Милан» ва «МЮ»га қарши ўйнаш ҳеч қачон осон бўлмаган. Аммо мадридликлар ҳар икки рақибдан ҳақли равишда устун келди. Қуйида ушбу ўйинларнинг энг ёрқин вакилларини билиб оласиз.
Жуд Беллингем
Футбол дунёси ҳозир Беллингемни жиддий кузатмоқда. Мухлислар унинг «Реал»да қандай ҳаракат қилишини кузатишмоқчи. Негаки, «Боруссия Дортмунд» ва «Реал» ўртасида анча-мунча фарқ бор. Беллингемдан кутилмалар катта ва бу футболчига босим юклайди. Қолаверса, 20 ёшли инглиз йирик суммада харид қилинди. Агарда Беллингемнинг икки ўртоқлик учрашувида қилган ҳаракатига қараб баҳо берадиган бўлсак, у ўзидаги босимни назорат қила олмоқда.
Беллингем бўйдор ва Анчелотти жамоасининг майдон марказида эркин ҳаракат қилади. Бу эса, ўз навбатида футболчига бўшлиқлардан фойдаланишда катта имкон тақдим этади. «МЮ»га қарши кечган баҳсда у ўзига берилган имкониятдан моҳирона фойдаланди ва тўпни икки тегинишда Андре Онана устидан ошириб, дарвозага жойлади.
Федерико Вальверде
Федерико Вальверде ўзининг ярим ҳимоядаги ишлари билан машҳур эмас. Бироқ, жамоада доимо самарали ҳаракат қиладиган вакиллардан бири саналади. Уругвайлик иқтидор буни «Милан» билан ўйинда яна бир бор намойиш этди. Жамоаси 2 та гол фарқи билан ортда қолиб турганида, Вальверденинг иккита узоқдан берган зарбаси ҳисобни тенглаштирди. У жамоага голлар ҳадя қилади, рақибдан тўпни олиб қўйишда фаол ва кўплаб позицияларда ўйнашга қодир. Агарда «Реал» тўғри харидларни амалга оширса, Вальверде ўзига қулай бўлган ҳудудда ўйнаш имконига эга бўларди.
Хоселу
Гапни очиғи, ушбу танлов Хоселунинг «МЮ»га қарши урилган қайчи услубидаги голи сабаб юз берди. Умуман олиб қараганда, «Реал»дек жамоада Хоселунинг порлаш имконияти жуда паст. Унинг ўша ажойиб голи эса, ҳужумчи бунга ҳаракат қилаётганини англатади. Хоселу «Милан» билан баҳсда бир тайм ўйнади. «МЮ» билан эса захирадан майдонга тушди ва ўзини кўрсатди. Афсуски, ҳали ҳам «Реал» Карим Бензема ўрнини эгаллай оладиган харидни амалга оширганича йўқ. Шу сабабдан Хоселуга имкониятлар тақдим этилмоқда. Ҳужумчи эса янги мавсумда, катта эҳтимол билан Карло Анчелоттининг, таъбир жоиз бўлса, «марҳамат»идан умидвор бўлиб яшайди. Воқеалар бошқа йўсинда кетишини ҳам инкор этиб бўлмайди, албатта.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Пахтакор
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
