Моуриньо ўзининг "Челси"даги иккинчи даврида клуб академиясидан учта футболчини алоҳида таъкидлаб кўрсатади ва уларни юлдуз бўлади деб башорат қилади. У бу борада 2014 йилнинг ёзги мавсумолди баҳсларида шундай дейди: "Менинг юрагим сезиб турибдики, Бейкер, Браун ва Соланке келаётган бир неча йил ичида фантастик футболчилар бўлиб етишади. Агар шундай бўлмаса, ўзимни айблаган бўлардим. Улар нафақат "Челси"да, балки Англияда ҳам порлайди". Қуйида уларнинг асл тақдирини билиб оласиз.
Льюис Бейкер
Бейкер "Челси"даги дебютини Жозе Моуриньо қўл-остида, 2014 йилнинг январида ўтказади. У ўша йили академияда йил ўйинчиси деб топилади. Қолаверса, футболчи йилнинг энг чиройли голига муаллифлик қилганди. Ярим ҳимоячи 2015 йилнинг февралида "МК Донс" клубига ижарага берилади. Кейинчалик Бейкернинг тақдири Нидерландия билан боғланди. Ёш футболчи икки мавсум "Витесс"да ҳаракат қилди. Англияга қайтган Бейкер, яна ижарага кетди. Бу давр у учун "Мидлсбро", "Лидс" ва "Рединг" сафида кечди. Бейкер 2020-21 йилги мавсумда "Трабзонспор" клубига ижарага берилади. 2022 йилнинг январь ойида, ваниҳоят, 26 ёшли Бейкер "Сток Сити" билан доимий шартномага эришади. Футболчи шундан буён Чемпионшип клубида жами 69 та ўйинда майдонга тушиб, 16 та гол ва 7 та ассистга муаллифлик қилди.
Айзая Браун
Браун 16 ёшидаёқ "Вест Бром"га қарши АПЛ баҳсида майдонга туширилади. У 2013 йилнинг ёзида академияга олиб келинган. Моуриньо эса уни 2015 йилда асосий таркибда майдонга туширганди. Гарчанд 1 та ўйинда майдонга тушган бўлса ҳам, 2015 йилги чемпионликда Браунга ҳам олтин медал насиб этади. Ярим ҳимоячи 2015-16 йилги мавсумда "Витесс"га ижарага берилади. Браун 2016-17 йилги мавсумда "Хаддерсфилд Таун"ни АПЛга қайтишида катта ҳисса қўшади. Кейинги мавсумда Англия ёшлар терма жамоаси аъзоси, "Брайтон" сафида ҳаракат қила бошлади. Бироқ, тиззасидан жиддий жароҳат олгани сабабли, Брауннинг фаолияти орқага кетди. Кейинги мавсумлар футболчи учун яна Чемпионшипда, "Лутон Таун" ва "Лидс Юнайтед"да кечди. 2020-21 йилги мавсумда Браун сўнгги бор ижарага юборилади. У ўша даврни "Шеффилд Уэнсдей"да ўтказди. 2021 йилнинг ёзида Браун "Престон"га сотиб юборилади. Афсуски, апрель ойида 26 ёшли Браун футболдан кетганини маълум қилди. Футболчи тизза ва тўпиғидан олган жароҳатларидан қайта тиклана олмаганди.
Доминик Соланке
2014-15 йилги мавсумда Соланке "Челси"нинг ёшлар жамоасида 31 та голга муаллифлик қилади. Ҳужумчи ўшанда академиянинг энг яхши футболчиси деб топилганди. Моуриньо 2015 йилда унга ЕЧЛда дебют қилиш имконини беради. 2015-16 йилги мавсумда Соланке "Витесс"да ижарада ҳаракат қилиб, 7 та голга муаллифлик қилади. 2016-17 йилги мавсумда футболчи ва "Челси" раҳбарияти ўртасида келишмовчилик келиб чиқади ва у жамоадан кетади. Уни "Ливерпуль" таклиф қилади. 2017 йилги 20 ёшлилар ўртасидаги мундиал Англия чемпионлиги билан тугайди. Ўша турнирнинг энг яхши футболчиси ва тўпурари айнан Соланке бўлганди. Бейкер ва Браундан фарқли равишда, Соланке 2017 йилнинг ноябрида Англия терма жамоасида Бразилияга қарши баҳсда дебют қилади. Афсуски, ҳужумчининг "Ливерпул"даги даври яхши ўтмади ва 2019 йилда "Борнмут"га 19 миллион фунт эвазига сотиб юборилади. Чемпионшипда Соланке фантастик даражага чиқди. Ўзининг жамоадаги иккинчи мавсумида, Соланке 29 та гол билан "Борнмут"ни АПЛга олиб чиқади. У ўтган масвумда АПЛда 6 та гол уришга эришганди.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
