Футбол бўйича Leagues Cup 1/8 финалида “Интер Майами” “Даллас” устидан ғалаба қозонди, Лионель Месси учрашувда дубль қайд этди.
Месси учрашувнинг 6-дақиқасидаёқ ҳисобни очди, унга “Барселона”нинг собиқ ҳимоячиси Жорди Альба узатмани амалга оширди.
Ундан кейин учрашувда яна голлар урилди, 85-дақиқага келиб, ҳисоб 3:4 “Даллас” фойдасига ҳал бўлаётганди. Бироқ ўша дақиқада Лео жарима зарбасини аниқ амалга ошириб, ҳисобни тенглаштирди.
Учрашув пенальтилар сериясига қадар давом этди ва унда “Интер Майами”нинг қўли баланд келди. Месси биринчи зарбани аниқ амалга оширди.
Мана бу Мессининг “Даллас”га қарши ўйиндаги ҳаракатлари акс этган видео:
Лео аллақачон “Майами” тарихидаги энг яхши тўпурарлар тўртлигига кириб улгурди. Шунингдек, у жарима зарбасидан гол уриш бўйича Бекҳэмга етай деб қолди.
Аргентиналик футболчининг “Интер Майами”даги статистикаси жуда тезлик билан ўсмоқда. Месси янги жамоасидаги 4 та ўйинда 7 та гол ва битта голли узатмани амалга ошириб, жамоа тарихидаги энг яхши тўпурарлар кучли тўртлигига кирди. Олдинда Роберт Тейлор, Леонардо Кампана ва Гонсало Игуаин бор.
Месси кетма-кет учинчи ўйинида дубль қайд этмоқда. “Даллас”дан олдин “Орландо” ва “Атланта” жамоалари дарвозасини икки мартадан ишғол қилганди. “Интер”даги дебют ўйинида эса “Крус Асул” дарвозасига сўнгги дақиқаларда жаримадан ғалаба голини урганди.
Шунингдек, Лео футбол тарихида жарима зарбасидан гол уриш статистикасини ҳам яхшилаб бормоқда. “Даллас” дарвозасига урилган гол футболчининг 64-голи эди. Бу кўрсаткич бўйича Жуниньо Пернамбукано (77 та гол), Пеле (70), Виктор Легротале, Роналдиньо (66 тадан) ва Девид Бекҳэм (65) Мессидан олдинда. Аргентиналик тез орада “Интер Майами” хўжайинини ортда қолдириши мумкин.
Месси ўзини кўрсатаётган Leagues Cup қанақа турнир ўзи?
Лео ҳали MLS’да ўйнагани йўқ. У “Интер Майами”ни Leagues Cup’да етакламоқда. Бу турнирда MLS жамоалари ва Мексиканинг олий лигасидаги клублар иштирок этади.
Leagues Cup мусобақаси илк бор 2019 йилда ўтказилганди — чемпион Мексиканинг “Крус Асул” жамоаси эди. Ўшанда турнирда 8 та жамоа иштирок этган ва ўйинлар плей-оффдан бошланган.
2020 йилда ковид сабаб, мусобақа ўтказилмаган, 2021 йилда эса яна Мексика клуби чемпион бўлган. Бу сафар “Леон” шоҳсупага чиққан. Ўша йили ҳам ташкилотчилар 2019 йилдаги форматни сақлаб қолган.
2022 йил ёзда турнир даражаси пастроққа тушган — кўп юкаламалар туфайли MLS ва Мексика клублари атиги 5 та кўргазмали ўйинлар ўтказган.
2023 йилда эса мусобақа ташкилотчилари кеч кўламли ислоҳотларга қўл урди — турнирда MLS ва Мексика олий лигасининг барча жамоалари иштирок этадиган бўлди. 21 июлдан 31 июлга қадар гуруҳ босқичи ўйинлари ўтказилди, учта жамоадан иборат 15 та гуруҳдан иккитадан клуб плей-оффга йўл олди.
Август ойи бошида 1/16 финал ўйинлар старт олди. 19 августда эса финал ўйини бўлиб ўтади. Учинчи ўрин учун баҳс ҳам ўша кунга белгиланган. Учта энг яхши натижа кўрсатган жамоа КОНКАКАФ Чемпионлар Лигасига йўлланма олади, Leagues Cup ғолиби эса тўғридан-тўғри қитъалараро турнирнинг 1/8 финалига йўл олади.
Месси тўп сураётган “Интер Майами” гуруҳдаги иккита ўйинда ғалаба қозониб, биринчи ўрин билан плей-оффга йўл олган бўлса, 1/16 финалда “Орландо” таслим этилди. 1/8 финалда эса “Даллас” тўсиғи вайрон этилди.
Лионель Месси эса 7 та гол билан турнирнинг энг яхши тўпурари бўлиб турибди.
Август ойининг охирида MLS ўйинлари бошланади. У ерда “Интер Майами”нинг ишлари яхши эмас. “Интер Майами” ўз конференциясида 15-ўринда бормоқда ва плей-офф зонасидан 11 очко ортда қолмоқда. Бошқа конференцияда “Интер Майами”дан кам очко тўплаган жамоа йўқ, шунинг учун “Интер Майами” Месси келгунига қадар бутун MLS’да энг охирги жамоа бўлиб турганди.
Доимий чемпионат август ойи охирида давом эттирилади ва октябрь ойига қадар давом этади (“Интер Майами” яна 12 та ўйин ўтказади). Лионель Мессида эса жамоасини MLS плей-оффига олиб чиқиш учун имконият бўлади.
Манба: daryo.uz
Киритилди: 19:46, 09.08.2023. Ўқилди: 5656 марта. Фикрлар: 4 та.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
