17 ёшли Пау Кубарсининг «Барселона»даги ишлари шунчаки, супер!
Ўсмир йигитча бир уринишда жамоанинг асосий футболчилари қаторига кириб олди. Пау айниқса, «Наполи» ва «Атлетико»га қарши кечган ўйинларда ортиқ келажак умиди эмаслиги, балки аллақачон ҳақиқий «блауграна»га айланиб улгурганини исботлади.
- 17 ёшли йигит кенг умум-эътирофдан эсанкираб қолмайдими? Атрофингда юз бераётган воқеалар «оғир»-лигини қандай кўтаряпсан?
- Ишонинг, ҳозир мутлақо хотиржамман. Зеро, оиламиз аъзолари ва дўстларим ҳамиша ёнимдалар, улар оёғим ердан узилишига йўл қўймайдилар. Табиийки, бу жуда муҳим. Умуман, табиатан анча босиқман ва ҳозир мен билан содир бўлаётган ишларга ҳам оддий жараёндек қараяпман.
- Ташқи кўринишингга қараб ҳам, маълум даражада қандай сифатларга эгалигингни билиб олиш мумкин. Хўш, қандайдир босимни ҳис қиласанми ўзи...?
- Босимдан имкон қадар қочаман. Аммо «Барселона»дек клубда ўйнар экансан, қўшимча босимни ҳис қилмаслигинг мумкин эмас. Ахир жамоа либосини кийишнинг ўзи кўп нарсани англатади. Оддий айтганда, «Барселона» футболчилари ҳамиша катта босим остида ўйнашади. Энг муҳими, бунинг ижобий таъсири кучлироқ. Яъни биз айнан босим ортидан ҳам энг яхши футболчиларга айланамиз.
- Бутун ҳаётингни «Барса»га бағишлаганингни айтган эдинг. Хўш, шундай қадрли клуб сафидаги эрта дебют ёш футболчига қандай таъсир қилар экан?
- Албатта, бундан фахрланаман, ахир ақлимни танибманки, «Барселона» тизимидаман. Аммо майдонга тушганимда, ёшим ҳақида ўйламайман. Оддий айтганда, ўзимни жамоага ёрдам берадиган одатий футболчилардан биридек тутишга ҳаракат қиламан. Яна фикримни тўлиқ ўйинга қаратиб, бор кучимни ишга соламан.
- ЧЛда «Наполи»га қарши кечган жавоб баҳсининг энг яхши футболчиси сифатида тан олиндинг. Бундай бўлишини кутганмидинг? Умуман, энг яхши футболчига аталган совринни қўлга олгач, хаёлингдан аввало, нималар ўтди?
- Тўғрисини айтаман, аввалига ишонмадим, кимдир устимдан кулаётгандек туюлди. Кейин ҳаммаси жиддий эканлигига иқрор бўлгач, жамоа манфаати йўлида бажарган ишимдан бағоят мамнун бўлдим. Бинобарин, индивидуал мукофотлар ҳар қандай футболчига кўтаринкилик бағишлайди. Яна қўшимча қилишим керак, бундай совринлар муайян бир футболчига топширилгани билан бутун жамоаники ҳисобланади.
- Одатда унча-мунча ҳолатда тўпни йўқотмайсан, ўта тартибли ҳаракатланасан. Ваҳоланки, марказий ҳимоя чизиғида хатога йўл қўймаслик жуда қийин. Асабийлик ҳолатини енгиш масаласида қандайдир алоҳида формуланг борми?
- Очиғи, нима дейишни ҳам билмайман. Йўқ, бирор-бир формула ҳақида гапириш ортиқча. Шунчаки, болалигимдан хотиржам ўйнашга ўрганганман. Эҳтимол, мураккаб вазиятларда ҳам жазавага тушмаслик табиатимга хос қирралардан биридир.
- Хави ошкора тан олди: «Агар тўп Пауда бўлса, ўзимни эркин ҳис қиламан, чунки унинг тўғри иш тутишини яхши биламан». «Барселона» ҳаётида ёрқин из қолдирган ва муҳим ўрин тутадиган шахсдан шундай ёқимли мақтов эшитиш дуч келган иқтидорга ҳам насиб этавермайди...
- Буни ўзига хос аванс сифатида қабул қилишим керак. Ахир Хави нафақат жамоа бош мураббийи, балки барча даврларнинг энг яхши футболчиларидан бири саналади. Умид қиламанки, у менга баҳо беришда ошириб юбормаган. Хавининг мақтови зиммамга масъулият ҳам юклайди. Чунончи, мураббийни уялтириб қўймаслик учун ҳам икки ҳисса кўп ҳаракат қилишим керак. Умуман, Хавининг «Барселона»да мен каби ёш футболчиларга катта ишонч билан қараётгани қувонарли ҳол. Гап тақдим этилаётган шу имкониятдан қай тариқа фойдаланишда.
- Ўзи ҳозирги ютуқла-рингда Хавининг роли нечоғли катта?
- У ҳар нафасда «Ла Масия»га ишонч билдиради. Қолаверса, бизга ички салоҳиятимиздан максимал даражада фойдаланишда бевосита ёрдам беради. Асосий хислати - ёш йигитчаларга ҳам, жамоанинг фахрий аъзоларига ҳам тенг муносабатда бўлади. Бундай мувозанат ўз навбатида, жамоада ички муҳит янада яхшиланишига хизмат қилади.
- Қизиқ, айнан қайси футболчилар асосий таркибда ўз ўрнингни топишингда ҳаммадан кўпроқ ёрдам беришди?
- Бу борада кимнидир ажратиб кўрсатишим қийин. Чунки барча футболчилар ёрдам қўлини чўзишмоқда. Умуман, «Барселона» - бир бутун, яхлит жамоа. Тўғри, айниқса, тактика масаласи ва шахсий ишлар юзасидан катта ёрдам кўрсатган Роналд Араухони алоҳида тилга олишим керак. Шунингдек, Жоау Канселуни ҳам - гап «Барселона»даги энг қувноқ йигитлардан бири ҳақида кетмоқда. Жоау ҳамиша атрофидагиларга яхши кайфият улашади, унинг ёнида ўзингни жуда қулай ҳис этасан беихтиёр.
- Кийиниш хонасида ҳазил-мутойибага вақт борми?
- Топилади. Гоҳида ҳаттоки, ҳаддан ортиқ кўп ҳазиллашамиз.
- Унда айтчи, сенга қандай лақаб берилди?
- Ҳозирча лақабим йўқ. Йигитлар кийиниш хонасида баъзан оддийгина хиргойи қилишлари мумкин: «Ку-Ку-Кубарси». Диққатга сазовор ҳолат - мухлислар ҳам буни трибуналарда тобора кўп ва жаранглироқ такрорламоқдалар. Асосийси, «Ку-Ку-Кубарси» ўзимга ҳам жуда маъқул.
- Фахрий футболчилар сенга айнан нималарни ўргатишди ёки ўргатишмоқда?
- Кўпинча айнан «Барса» юлдузларидан тақлид олишга уринаман - бу янада яхши ўйнаш салоҳиятини ўзлаштиришнинг энг тўғри йўли. Бинобарин, фахрий клубдошларим дунё футболида энг зўрлар қаторидалар. Табиийки, айниқса, ўз позициямда тўп сурадиган футболчилар ҳаракатини обдон кузатишга мойилман. Чунки ривожланиш учун энг кучлиларнинг энг кучли жиҳатларини «ўғирлаш» кераклигини яхши биламан.
- Умуман, ўзингни қандай футболчи сифатида тавсифлайсан?
- Асосий сифатларим - хотиржамлик ва ҳаракатчанлик. Ҳар ҳолда, тўпни жамоам дарвозаси сари яқинлаштирмаслик ва ҳамиша назорат остида ушлаб туришга зўр берадиган ҳимоячилар тоифасиданман. Яна узатмалар учун яхши вазият топишга жиддий эътибор қаратаман.
- Асосий кумирларингни айта оласанми?
- Болалигимдан Пуйолга чин қаҳрамоним сифатида қараганман, яна Пикега ҳам. Пуйоль нафақат майдон, балки унинг ташқарисида ҳам ишончлилиги, кучли амбицияси ва характери билан ажралиб турарди. Ҳақиқий намуна. Пике эса сал бошқача. Унинг ҳаракатларини илк марта телевизор орқали кузатганимдаёқ услуби ёқиб қолганди.
- «Ла Масия» спортчи ва шахс сифатида ривожланишингда қандай ўрин тутди?
- Бу ерда «Барселона» ДНКси ҳақида кўп гапиришади. Ўзи ҳар доим тўп назоратига асосланган футболни қадрлаб келганман. «Ла Масия»нинг шаклланишимдаги ўрни? Тўғриси, буни тўлиқ ифодалаб беролмайман.
- Ламин Ямал ҳам «Ла Масия» тарбияланувчисидир. Уни қандай таърифлардинг?
- Ламин ҳали жуда ёш бўлса-да, жамоанинг асосий футболчиларидан биридир. Унинг голлари хотиржамликни оширади. Академияда Ламин билан кўп йиллар бирга шуғулландим ва унинг қандай йигит эканлигини яхши биламан - очиқкўнгил, самимий, ҳазилкаш. Ҳозирги композицияда Ламиннинг борлиги ҳам ўзимни янада қулайроқ ҳис этишимга хизмат қилади.
- Мавсумнинг қолган қисмидан нималар кутяпсан?
- Асосий мақсад - ЧЛда имкон қадар узоқроққа бориш ва Ла Лигада муддатидан олдин таслим бўлмаслик. Ҳали олдинда ўйинлар етарли ва «Барса» доимгидек охиригача курашади. Бунга заррача шубҳам йўқ.
- Сизларни ЧЛда «ПСЖ» тўсиғи кутмоқда...
- Биринчи ўйинни интиқлик билан кутяпмиз. Ахир анчадан буён чорак финалга чиқолмагандик. Энди майдонда боримизни беришимиз аниқ. Ўйлайманки, мухлисларни жуда сифатли футбол ва катта рақобат кутмоқда.
- Сенга дунёнинг энг яхши футболчиларидан бири - Килиан Мбаппе қарши туради.
- Бу ҳақда ҳали ўйламадим, ҳар қандай вазиятда ўзлигимни йўқотмаслик ва донгдор рақибга имкон қадар жиддий қаршилик кўрсатишга уринаман. Аслида энг асосийси - жамоавий ўйин. Демоқчиманки, «ПСЖ» билан баҳсда аввало, жамоавий уйғунликка эътибор қаратиб, юқори интенсивлик билан баланслашган ўйин намойиш этишимиз керак. Агар ҳамжиҳат тўп сурсак, нафақат Мбаппе, балки «ПСЖ»нинг бошқа ҳужумчиларини ҳам тўхтата оламиз.
- Охирида «миллион долларлик» савол: Кубарси яна 10 йилдан кейин ўзини қайси даражада кўради?
- Ҳаммаси яхши бўлиши йўлида изчил ишлашда давом этаман. Умид қиламанки, 10 йил давомида ҳаётим мазмуни саналган «Барселона»нинг муҳим қисмига айланаман.
М.ПЎЛАТОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
