Transfermarkt портали ЧЛ тарихига назар солиб, турнирнинг бош соврини - «шалпангқулоқ» кубокни қайта-қайта бошлари узра баланд кўтаришган энг совриндор мураббийларни яна бир бора алоҳида эътироф этди. Сиёсат айвонида катта саккизлик саммитига қайси мамлакатлар кириши кўпчиликка маълум. Шунингдек, ЧЛга доир бундай саммит ҳам ўта ёрқин иштирокчилардан таркиб топган, албатта.
4-8-ўринлар: Оттмар Хитц-фельд - 2та кубок. Германиялик мутахассис «Боруссия» Д. ва «Бавария» бошқарувида ЧЛ тахтига 1 мартадан кўтарилди. Тўғри, жаноб Хитцфельд охирги марта «шалпангқулоқ» ютганида (2001 йил), ҳозирги айрим юлдузлар ҳали туғилишмаганди ҳам.
4-8-ўринлар: Висенте дель Боске - 2та кубок. «Реал» ҳаётида чуқур из қолдирган испаниялик мутахассис. «Жаноб картошка» лақаби билан танилган Висенте бобо ЧЛдаги ҳар икки ғалабасини «Мадрид» билан нишонлади. У охирги зафарини Хитцфельдга нисбатан 1 йил кейин (2002) расмийлаштирган эди.
4-8-ўринлар: Алекс Фергюсон - 2та кубок. «МЮ»нинг афсонавий мураббийи бисотида ҳам 2та нуфузли кубок бор. Шотландиялик мутахассис «қизил иблислар»ни охирги марта 2008 йили ЧЛ шоҳсупасига бошлаганди. Жамоа шундан буён «шалпангқулоқ»дан узоқда...
4-8-ўринлар: Жозе Моу-риньо - 2та кубок. Португалиялик мутахассис «Челси» ва «Интер» каби мега-клубларни бошқарди, лекин ЧЛда нисбатан камтар саналган «Порту» ҳамда «Интер» билан бир мартадан ғалаба куйини чалди. «Беназир»нинг охирги соврини 2010 йилга тўғри келганди.
4-8-ўринлар: Юпп Хайнкес - 2та кубок. Германиялик яна бир мутахассис. Лекин Юпп бобо Хитцфельддан фарқли равишда хориж клуби билан ҳам чўққига чиқди. Аниқроқ айтсак, дастлаб «Реал»да «шалпанқулоқ» кубокка етишган Хайнкес кейинчалик «Бавария» бошқарувида ушбу зафарли йўлини яна бир бора такрорлади 2013 йили.
2-3-ўринлар: Зайниддин Зидан - 3та кубок. Футболчи ролида «Реал» тарихидан жой олган буюк Зизу кейинчалик мураббий сифатида ҳам «Қироллик клуби» ҳаётида катта иш бажарди. Яъни ўз шогирдларини нақ 3 марта ЧЛ тахти сари етаклади. Зиданнинг охирги ғалабаси 2018 йили қайд этилди.
2-3-ўринлар: Хосеп Гвардиола - 3та кубок. 3та жамоа билан ЧЛ кубогини ўзига бўйсиндирган мураббий. Пеп бу ишни аввалига «Барселона», кейин «Бавария» билан амалга оширди. Ўтган йили эса «Манчестер Сити»ни ҳам ахийри биринчи рақамли еврокубокда ғалаба сари етаклади.
1-ўрин: Карло Анчелотти - 5та кубок. Италиялик мэтр «Милан» ва «Реал»да ЧЛнинг икки каррадан ғолибига айланди. Турнирда охирги марта 2022 йили зафар қучган дон Карло ҳозир «Мадрид» билан ўзига хос «хет-трик»ни кўзлаётгани аниқ. Аммо осон эмас, ахир чорак финалда Анчелоттидан энг яқин таъқибчиси - Хосеп Гвардиоланинг даҳшатли «Манчестер Сити»сини йўлдан четга чиқариб ташлаш талаб этилади.
А.АБДУВАЛИХЎЖАЕВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
