Александр Лупашко: «Биринчи лигада ҳам осон ўйинлар бўлмайди»
«Олмалиқ» клубидаги фаолияти орқали мухлисларга таниш бўлган иқтидорли ҳужумчи Александр Лупашко жорий мавсум биринчи лигада «Андижон» шарафини ҳимоя қилмоқда. Ҳужумчи «Пахтакор-2» жамоасига қарши кечган биринчи турда хет-трикка эришиб мавсумни кўтаринки кайфиятда бошлади. Умуман олганда, Азамат Абдураимовнинг бу ҳужумчидан умиди катта. Шу боис Лупашкодан клубимиз сайти учун интервью олдик.
- Мавсумни хет-трик билан бошлашни ўзингиз ҳам кутмаганмидингиз?
- Албатта, мавсумдаги дастлабки учрашувда учта гол уриш ҳар қандай футболчи учун ёқимли. Бунинг устига андижонлик мухлислар қаршисида тўп суриш ва илк ўйиндаёқ хет-трик қайд этиш ажойиб. Бундай муваффақиятга эришганимдан хурсандман.
- Аввал ҳам учта гол урган ўйинларингизни эслай оласизми?
- Йўқ, фаолиятимдаги бу биринчи хет-трикдир. Илгари битта ўйинда 3та тўп киритиш имкони бўлмаганди.
- «Олмалиқ» клуби тарбияланувчиси саналасиз. Нима учун жамоадан кетишга қарор қилдингиз?
- «Олмалиқ»да ўйин амалиётига эга бўлмаётгандим. Чунки ҳужум чизиғида рақобат юқори. Шу боис ўйин амалиётига эга бўлишим учун жамоа мени «Андижон»га ижарага берди.
- Демак, кейин яна «Олмалиқ»қа қайтиб кетасиз?
- Келишувга кўра «Андижон»да бир йил ижара асосида ўйнайман. Балки ҳаммаси яхши кечса кейинги йили ҳам шу ерда қолишим мумкин. Буни вақт кўрсатади.
- Нима учун биринчи лигада ўйнашга қарор қилдингиз? Олий лига жамоаларига ҳам ўтишингиз мумкинмиди?
- «Андижон» жамоаси бош мураббийи менга ишонч билдирди. Қолаверса, жамоанинг ажойиб мухлислари борлиги ҳам мени ўзига жалб этди. Тўғри, олий ва биринчи лига ўртасида фарқ бор. Лекин биринчи лигада ҳам осон ўйинлар бўлмайди. Кураш қизғин кечади.
-Илгари «Олмалиқ»дан бошқа клубларда ўйнамагансиз. Янги жамоага мослашиш қийин бўлмаяптими?
-Аллақачон мослашиб олганман. Уч ой давомида «Андижон» сафида мавсумга тайёргарлик кўрдим. Бундан ташқари раҳбарият ва мураббийларнинг муносабати яхши. Шунингдек, «Андижон»да ҳам ўз жойим ҳужумчилар ортида ҳаракат қиляпман.
- «Олмалиқ»да Игорь Шквириннинг қўл остида ўйнаган бўлсангиз «Андижон»да Азамат Абдураимов билан ишлаяпсиз.
- Азамат Биродарович билан ёшлар терма жамоасида ҳам бирга ишлаганман. Шу боис бу мураббий мен учун бегона эмас.
- «Локомотив-БФК» билан баҳсда жароҳат олиб майдонни тарк этдингиз. Жароҳатингиз жиддий эмасми?
- У қадар жиддий дея олмайман. Аммо машғулотларда тўлиқ куч билан шуғулланаётганим йўқ. Умид қиламанки, кубок доирасида «Локомотив» билан ўйинга қадар ҳаммаси яхши бўлади.
- Мамлакат Кубоги доирасида «Андижон» олдида «Локомотив»га қарши жиддий ўйин турибди. Бу ўйинда ғалаба қозониш имконияти борми?
- Ишқибозларимизга ғалаба тақдим этиш учун астойдил ҳаракат қиламиз. Албатта, «Локомотив» кучли жамоа. Бироқ ҳозирдан таслим бўлмоқчи эмасмиз ва ҳар қандай жамоа билан ўйнаса бўлади.
Манба: www.andijon-pfc.uz
Киритилди: 10:48, 06.04.2013. Ўқилди: 3861 марта. Фикрлар: 6 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
