Хосеп Гвардиола ва «Барселона» йўллари айро тушганига анча бўлганига қарамай, журналистлар ҳали-ҳануз «Манчестер Сити» устозини «блауграна»га боғлиқ саволлар билан безовта қилишади.
ОАВ вакиллари бу сафар испаниялик мураббийни ўз жамғармаси томонидан ташкиллаштирилган гольф турнирида «тутишди».
- «Барселона» раҳбарияти Хавини ишдан бўшатди ва ўрнига Ханс-Дитер Фликни тайинлади. Бу ҳақда нима дея оласиз?
- Тушунинг, Барселонадан йироқдаман ва клуб ичидаги ҳолатни яқиндан билмайман. Шундай экан, бу борада айтадиган гапим йўқ, ахир у ерда нималар содир бўлаётганидан бехабарман. Шунчаки, Фликка янги иш жойида омад тилашим мумкин, албатта, Хавига ҳам.
- Сизнингча, Гвардиола билан таққослашлар Хавига нечоғли халақит берди?
- Аниқ айтаман, охирги воқеликларда заррача айбим йўқ, ахир «Барселона»дан кетганимга анча бўлди. Қисқаси, клубнинг орқага кетишида дахлсизман, оддийроқ айтганда, «гумонланувчи» эмасман.
- Хўш, қачондир «Барселона»га мураббий сифатида қайтишингиз мумкинми?
- Бу эшик ёпиқ! «Барселона»ни мураббий ролида бошқа шуғуллантирмаслигим аниқ.
- Ханс-Дитер Фликни яхши биласиз, у жамоани равон йўлга олиб чиқишга қодирми?
- Йўқ, Ханси билан яқиндан таниш эмасман, Манчестерда бир неча марта учрашганмиз, холос. Унинг «Бавария»да ақлга сиғмас ишларни бажаргани эса - айни ҳақиқат. Флик имкони бор барча совринларни ютди, қолаверса, терма жамоада ишлаш тажрибасига эга. «Барселона»да мураббийга яқиндан ёрдам беришса, ғояларини қўллаб-қувватлашса, аста-секин олға боришига имкон яратишса, бас. Футболда мураббийнинг қандай услуб ва тактика танлаши футболчилар гуруҳига бевосита боғлиқ. «Барса» ихтиёрида эса турли чизмаларда ўйнайдиган йигитлар бор. Асосийси, клуб кўплаб ёрқин ёш истеъдодларга эга. Қисқаси, ҳозирги таркиби ҳам ҳавас уйғотади. Демак, Фликка вақт бериш керак, зеро, чемпионат октябрь ойида ютилмайди. Умуман, «Барса»да бош мураббий бўлишнинг ўзига хос мушкул жиҳатлари бор. Дейлик, ҳар бир қарорингиз кенг муҳокама қилинади. Мураббий эса футболдан ташқаридаги гап-сўзларга чалғиб қолмаслиги керак.
- Кантерада нима гаплар?
- Ла Масия ҳеч қачон муваффақиятсизликка учрамайди, чунки аниқ тизим аллақачон йўлга қўйилган. Ҳозир ҳам маҳаллий тарбияланувчилар гуруҳининг жамоага таъсири жуда кучли. Очиғи, кантера қачон бундай даражада самара берганини эслолмайман, ҳатто. Фақат клуб ўз иқтидорларига вақт тақдим этиши, сабр билан уларни ҳимоялаши зарур.
- Айтингчи, «Жирона»нинг иштирокидан ҳайратландингизми?
- О, ЧЛда айнан шу клуб билан тўқнаш келишни истардим. Эҳтимол, жамоа ичида қандай катта жасорат кўрсатишганини ҳали тўлиқ англамагандирлар... Ахир камтарона бюджет билан Ла Лигада 3-ўринни эгаллаш - фантастика. «Жирона» ўйинига ҳам шундай таъриф бериш мумкин. Қисқаси, Мичель ақлга сиғмас даража иш олиб борди. Ишончим комил, жамоада барқарорликни таъминлаш йўлида тўғри қадам ташланади. Коуто ва Савио? Ҳозирча уларни қайтариш мавзусини чуқур ўрганмадик. Мичель ҳар икки футболчига катта ёрдам берди. Коуто ҳужумда вазият яратиш бобида яққол ўсишга эришди, Савио эса Ла Лигадаги энг хавфли ижрочилардан бирига айланди. Ҳар иккиси City Football Group гуруҳига тегишли экан, уларнинг келажагини бемалол, биргаликда ҳал қилишимиз мумкин.
- «Реал» Килиан Мбаппе билан янада кучайдими?
- «Реал» Килиансиз ҳам кучли, барибир. Лекин дейлик, ЧЛда бу жамоани енгиш имконсиз эмас. Мадридликлар тез-тез финалга чиқишади ва ғалаба қозонишади. Бу эса рақобатчиларни турнирда «Реал» билан ўйнаш ва уни чиқариб юборишга ундайди. Жамоа Мбаппе мисолида ўта хавфли ҳужумчига эга бўлгани ҳам ўз-ўзидан тушунарли, албатта.
М.ПЎЛАТОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
