«Металлург»даги ўйинлари билан бекободлик мухлислар меҳрини қозонган косонсойлик Шаҳзод Убайдуллаев мавсум сўнгига саноқли кунлар қолганида жамоа билан келишмовчилик туфайли клуб лагерини тарк этганди.
Келаси мавсумни Наманган шаҳри бош жамоасида ўтказиши маълум бўлган футболчи биз билан суҳбатда «Металлург»да юзага келган вазият, «Навбаҳор»да ўйнаш орзуси ва келгуси ражалари ҳақида сўзлаб берди.
- Суҳбатимизни ортда қолган мавсум таассуротлари ҳамда «Металлург»нинг Суперлигадаги иштирокига оид фикрларингиз билан бошласак...
- Ўтган мавсум «Металлург» учун энг аянчлиси, мен учун эса фаолиятимдаги энг омадсиз йил бўлганлигини айта оламан холос.
- «Металлург»да аввалги мавсум ҳам кўнгилдагидек натижа қайд эта олмаган хорижлик мураббийлар штабига яна ишонч билдирилганига қандай муносабатдасиз? Эҳтимол бошқарув пости бошқа мутахассисларга топширилганда вазият бу даражада чигаллашиб кетмасмиди...
- Испаниялик мураббийлар жамоада яхши фаолият олиб боришди, деб ўйлайман. Улар ўтган йилги оғир кечган мавсумда ҳам «Металлург»ни Суперлигада олиб қолишнинг уддасидан чиқишганди. Жорий йил бошидаги салбий натижаларда эса фақатгина маълум шахслар эмас, балки бутун бир клубнинг айби бор.
- Бундай олиб қараганда жамоани тарк этган футболчилар яхши клублар билан шартнома имзолашмоқда. Уларга Бекободда ўзларини кўрсатишлари учун нима тўсқинлик қилди, деб ўйлайсиз?
- «Металлург»да ҳамиша яхши футболчилар тўп суриб келган. Улар жамоа манфаатлари учун қўлларидан келганича ҳаракат қилишганига шубҳам йўқ. Нима учун ўзларини кўрсата олмаганликлари ҳақидаги саволингизни эса очиқ қолдирганим маъқул.
- Мавсум якунига етишига саноқли кунлар қолганида «Металлург»ни келишмовчилик туфайли тарк этганингиз ойдинлашди. Аслида бунга нима сабаб бўлганди?
- Аввалига барчаси яхши кетаётганди, бироқ мавсум якунига келиб мураббийлар менга ишонмай қўйишди. Шунингдек, машғулотларда захирадаги ўйинчиларга умуман бошқача муносабатда бўлинди. Имкон бериш ҳақида эса ўйлаб ҳам кўришмади. Ўзини кўрсатиш, нималарга қодирлигини исботлаш учун астойдил тер тўкаётган ижрочилар эътибордан четда қолди. Шу боис, машғулотларда нималар қилаётгани қизиқ бўлмай қолган футболчи расмий ўйинларда ҳам керак бўлмайди деган фикрда «Металлург» раҳбарлари билан гаплашиб, жамоадан кетдим. Оддий айтганда, клубда қадрим қолмаган эди. Бунинг ортидан руҳий нуқтаи назардан ўзимга бўлган ишончимни йўқотаётгандим. Майли, ўтган ишга саловот. Насиб қилса ҳали ҳаммаси олдинда. Ишонаманки, ўзимни кўрсатадиган пайтлар ҳам келади!
- Келаси йилдан «Металлург» Суперлигада иштирок этмаслигини эшитгач, хаёлингиздан нималар ўтди?
- Бу каби маълумотларни мен ҳам матбуотда ўқидим. Нима учун бундай қарорга келинганидан мутлақо хабарим йўқ. Бошқа ҳеч нима дея олмайман.
- Футболчи сифатида қайси жамоадаги фаолиятингиз нотўғри қарор бўлган, деб ўйлайсиз. Агар шундай бўлса тафсилотларга тўхтала оласизми?
- Нима бўлган бўлса ўтди-кетди. Вақтни орқага қайтаришнинг эса иложиси йўқ. Шундай экан, ҳеч қачон бирор жамоадаги фаолиятимдан афсусланмайман.
- Айтганча, ўзбек футболчилари ўзини ҳар томонлама кўрсата оладиган Беларусь чемпионатида ҳам тўп сургансиз. Айтингчи, у ерда футболга бўлган муносабат қай даражада ва ўрнак олишга арзигулик қандай устунлик томонлари бор?
- Беларусь жамоаларида жисмоний тайёргарликка катта эътибор қаратилади. Шунингдек, ҳар бир позиция бў-йича алоҳида мураббийлар иш олиб боришади. Уларнинг ўзбек жамоалари билан фарқи мана шунда, деб ўйлайман.
- Энди «Навбаҳор» ҳақида гаплашсак. Она шаҳрингиз бош жамоаси сафига келиб қўшилишингиз қандай рўй берди? Наманганга келишдан олдин кимлар билан маслаҳатлашдингиз?
- Жамоадан тушган таклифни ортиқча ўйлаб ўтирганим йўқ. Отамга маслаҳат солганимда «Навбаҳор»га ўтишимга хайрихоҳ эканликларини англадим. Уйда, оиламнинг ёнида бўлишим уларни хурсанд қилиши табиий эди. Шу боис, клуб томонидан берилган таклифга дарҳол рози бўлдим.
- «Лочинлар» либосида Наманган шарафини ҳимоя қилиш сиз учун нимани англатади? Умуман олганда авваллари «Навбаҳор»да тўп суриш имкония-ти бўлганми?
- Ёшлигимдан Наманган футбол мактабида катта бўлдим (ҳозирги академия) . Ўқувчилик пайтимиз «Навбаҳор»нинг бирорта учрашувини қолдирмасдан стадиондан томоша қилардик. Ўша кезларда вақти келиб, мен ҳам шу жамоа либосини кийган ҳолда, минглаб мухлислар қаршисида тўп сурармиканман, деб орзу қилардим, шукурки мақсадимга етдим. Насиб қилса келаси йил она шаҳрим бош жамоаси шарафини ҳимоя қиламан. Аслида олдинлари ҳам «Навбаҳор»дан таклиф бўлган. Бироқ маълум сабабларга кўра Наманганга келишим бироз кечикди.
- Жамоа раҳбарияти билан музокара ўтказаётган чоғингизда келгуси режалар ҳақида сўз боргани табиий. Айтингчи, «Навбаҳор» келгуси мавсум қандай мақсадлар учун курашмоқчи?
- Доим таъкидлаб келинганидек «Навбаҳор» ўз анъаналари ва амбициаларига эга жамоа. Олдиндан катта гапирмайман. Насиб қилса келаси йил чемпионат давомида кўплаб саволларингизга жавоб топасиз.
МАЪЛУМОТ ЎРНИДА
Футболнинг илк сир асрорларини ўзи туғилиб ўсган Косонсойда ўргана бошлаган Шаҳзод Убайдуллаев кейинчалик «Навбаҳор» футбол мактаби (ҳозирги академия), «Косонсой» (1-лига) ҳамда Муборакнинг «Машъал» клуби академиясида таҳсил олди. Суперлига (Олий лига) даги дебют голини 2019 йилнинг 18 апрель куни «Насаф»га қарши учрашувда киритди. 2019 йилнинг 2 октябрь куни «Сурхон» дарвозасини икки бор ишғол қилиб, фаолиятидаги дастлабки дублини расмийлаштирди. 2020 йилнинг сентябрь ойида Ўзбекистон терма жамоасига чақирув олган ҳужумчи 3 сентябрь куни Тожикистонга қарши ўртоқлик ўйинида миллий терма жамоадаги дебютини ўтказди ва гол киритишга эришди.
Тўлиқ исми - Шаҳзодбек Умид ўғли Убайдуллаев;
Туғилган санаси - 1998 йил 2 март;
Туғилган жойи - Наманган вилояти, Косонсой тумани;
Бўйи - 177 см.;
Ўйнаган клублари:
2016-2017 2018 - «Косонсой» (Косонсой, 1-лига)
2018 - «Машъал» (Муборак, 1та ўйин|0та гол)
2018-2019 - «Андижон» (Андижон, 24|9)
2021-2023 - «Шахтёр» (Беларусь, 5|0)
2021 - Энергетик-БГУ (Беларусь, 11|3)
2022 - «Нефтчи» (Фарғона, 21|4)
2020, 2023-2024 - «Металлург» (Бекобод, 43|13)
Миллий терма жамоада:
2020—2021 йиллар - 3|1
Хуршид ЮСУПОВ суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
