«Metallurg»dagi o‘yinlari bilan bekobodlik muxlislar mehrini qozongan kosonsoylik Shahzod Ubaydullayev mavsum so‘ngiga sanoqli kunlar qolganida jamoa bilan kelishmovchilik tufayli klub lagerini tark etgandi.
Kelasi mavsumni Namangan shahri bosh jamoasida o‘tkazishi ma’lum bo‘lgan futbolchi biz bilan suhbatda «Metallurg»da yuzaga kelgan vaziyat, «Navbahor»da o‘ynash orzusi va kelgusi rajalari haqida so‘zlab berdi.
- Suhbatimizni ortda qolgan mavsum taassurotlari hamda «Metallurg»ning Superligadagi ishtirokiga oid fikrlaringiz bilan boshlasak...
- O‘tgan mavsum «Metallurg» uchun eng ayanchlisi, men uchun esa faoliyatimdagi eng omadsiz yil bo‘lganligini ayta olaman xolos.
- «Metallurg»da avvalgi mavsum ham ko‘ngildagidek natija qayd eta olmagan xorijlik murabbiylar shtabiga yana ishonch bildirilganiga qanday munosabatdasiz? Ehtimol boshqaruv posti boshqa mutaxassislarga topshirilganda vaziyat bu darajada chigallashib ketmasmidi...
- Ispaniyalik murabbiylar jamoada yaxshi faoliyat olib borishdi, deb o‘ylayman. Ular o‘tgan yilgi og‘ir kechgan mavsumda ham «Metallurg»ni Superligada olib qolishning uddasidan chiqishgandi. Joriy yil boshidagi salbiy natijalarda esa faqatgina ma’lum shaxslar emas, balki butun bir klubning aybi bor.
- Bunday olib qaraganda jamoani tark etgan futbolchilar yaxshi klublar bilan shartnoma imzolashmoqda. Ularga Bekobodda o‘zlarini ko‘rsatishlari uchun nima to‘sqinlik qildi, deb o‘ylaysiz?
- «Metallurg»da hamisha yaxshi futbolchilar to‘p surib kelgan. Ular jamoa manfaatlari uchun qo‘llaridan kelganicha harakat qilishganiga shubham yo‘q. Nima uchun o‘zlarini ko‘rsata olmaganliklari haqidagi savolingizni esa ochiq qoldirganim ma’qul.
- Mavsum yakuniga yetishiga sanoqli kunlar qolganida «Metallurg»ni kelishmovchilik tufayli tark etganingiz oydinlashdi. Aslida bunga nima sabab bo‘lgandi?
- Avvaliga barchasi yaxshi ketayotgandi, biroq mavsum yakuniga kelib murabbiylar menga ishonmay qo‘yishdi. Shuningdek, mashg‘ulotlarda zaxiradagi o‘yinchilarga umuman boshqacha munosabatda bo‘lindi. Imkon berish haqida esa o‘ylab ham ko‘rishmadi. O‘zini ko‘rsatish, nimalarga qodirligini isbotlash uchun astoydil ter to‘kayotgan ijrochilar e’tibordan chetda qoldi. Shu bois, mashg‘ulotlarda nimalar qilayotgani qiziq bo‘lmay qolgan futbolchi rasmiy o‘yinlarda ham kerak bo‘lmaydi degan fikrda «Metallurg» rahbarlari bilan gaplashib, jamoadan ketdim. Oddiy aytganda, klubda qadrim qolmagan edi. Buning ortidan ruhiy nuqtai nazardan o‘zimga bo‘lgan ishonchimni yo‘qotayotgandim. Mayli, o‘tgan ishga salovot. Nasib qilsa hali hammasi oldinda. Ishonamanki, o‘zimni ko‘rsatadigan paytlar ham keladi!
- Kelasi yildan «Metallurg» Superligada ishtirok etmasligini eshitgach, xayolingizdan nimalar o‘tdi?
- Bu kabi ma’lumotlarni men ham matbuotda o‘qidim. Nima uchun bunday qarorga kelinganidan mutlaqo xabarim yo‘q. Boshqa hech nima deya olmayman.
- Futbolchi sifatida qaysi jamoadagi faoliyatingiz noto‘g‘ri qaror bo‘lgan, deb o‘ylaysiz. Agar shunday bo‘lsa tafsilotlarga to‘xtala olasizmi?
- Nima bo‘lgan bo‘lsa o‘tdi-ketdi. Vaqtni orqaga qaytarishning esa ilojisi yo‘q. Shunday ekan, hech qachon biror jamoadagi faoliyatimdan afsuslanmayman.
- Aytgancha, o‘zbek futbolchilari o‘zini har tomonlama ko‘rsata oladigan Belarus chempionatida ham to‘p surgansiz. Aytingchi, u yerda futbolga bo‘lgan munosabat qay darajada va o‘rnak olishga arzigulik qanday ustunlik tomonlari bor?
- Belarus jamoalarida jismoniy tayyorgarlikka katta e’tibor qaratiladi. Shuningdek, har bir pozisiya bo‘-yicha alohida murabbiylar ish olib borishadi. Ularning o‘zbek jamoalari bilan farqi mana shunda, deb o‘ylayman.
- Endi «Navbahor» haqida gaplashsak. Ona shahringiz bosh jamoasi safiga kelib qo‘shilishingiz qanday ro‘y berdi? Namanganga kelishdan oldin kimlar bilan maslahatlashdingiz?
- Jamoadan tushgan taklifni ortiqcha o‘ylab o‘tirganim yo‘q. Otamga maslahat solganimda «Navbahor»ga o‘tishimga xayrixoh ekanliklarini angladim. Uyda, oilamning yonida bo‘lishim ularni xursand qilishi tabiiy edi. Shu bois, klub tomonidan berilgan taklifga darhol rozi bo‘ldim.
- «Lochinlar» libosida Namangan sharafini himoya qilish siz uchun nimani anglatadi? Umuman olganda avvallari «Navbahor»da to‘p surish imkoniya-ti bo‘lganmi?
- Yoshligimdan Namangan futbol maktabida katta bo‘ldim (hozirgi akademiya) . O‘quvchilik paytimiz «Navbahor»ning birorta uchrashuvini qoldirmasdan stadiondan tomosha qilardik. O‘sha kezlarda vaqti kelib, men ham shu jamoa libosini kiygan holda, minglab muxlislar qarshisida to‘p surarmikanman, deb orzu qilardim, shukurki maqsadimga yetdim. Nasib qilsa kelasi yil ona shahrim bosh jamoasi sharafini himoya qilaman. Aslida oldinlari ham «Navbahor»dan taklif bo‘lgan. Biroq ma’lum sabablarga ko‘ra Namanganga kelishim biroz kechikdi.
- Jamoa rahbariyati bilan muzokara o‘tkazayotgan chog‘ingizda kelgusi rejalar haqida so‘z borgani tabiiy. Aytingchi, «Navbahor» kelgusi mavsum qanday maqsadlar uchun kurashmoqchi?
- Doim ta’kidlab kelinganidek «Navbahor» o‘z an’analari va ambisialariga ega jamoa. Oldindan katta gapirmayman. Nasib qilsa kelasi yil chempionat davomida ko‘plab savollaringizga javob topasiz.
MA’LUMOT O‘RNIDA
Futbolning ilk sir asrorlarini o‘zi tug‘ilib o‘sgan Kosonsoyda o‘rgana boshlagan Shahzod Ubaydullayev keyinchalik «Navbahor» futbol maktabi (hozirgi akademiya), «Kosonsoy» (1-liga) hamda Muborakning «Mash’al» klubi akademiyasida tahsil oldi. Superliga (Oliy liga) dagi debyut golini 2019 yilning 18 aprel kuni «Nasaf»ga qarshi uchrashuvda kiritdi. 2019 yilning 2 oktyabr kuni «Surxon» darvozasini ikki bor ishg‘ol qilib, faoliyatidagi dastlabki dublini rasmiylashtirdi. 2020 yilning sentyabr oyida O‘zbekiston terma jamoasiga chaqiruv olgan hujumchi 3 sentyabr kuni Tojikistonga qarshi o‘rtoqlik o‘yinida milliy terma jamoadagi debyutini o‘tkazdi va gol kiritishga erishdi.
To‘liq ismi - Shahzodbek Umid o‘g‘li Ubaydullayev;
Tug‘ilgan sanasi - 1998 yil 2 mart;
Tug‘ilgan joyi - Namangan viloyati, Kosonsoy tumani;
Bo‘yi - 177 sm.;
O‘ynagan klublari:
2016-2017 2018 - «Kosonsoy» (Kosonsoy, 1-liga)
2018 - «Mash’al» (Muborak, 1ta o‘yin|0ta gol)
2018-2019 - «Andijon» (Andijon, 24|9)
2021-2023 - «Shaxtyor» (Belarus, 5|0)
2021 - Energetik-BGU (Belarus, 11|3)
2022 - «Neftchi» (Farg‘ona, 21|4)
2020, 2023-2024 - «Metallurg» (Bekobod, 43|13)
Milliy terma jamoada:
2020—2021 yillar - 3|1
Xurshid YUSUPOV suhbatlashdi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
