"Сурхон" клубининг иқтидорли ярим ҳимоячиси Ҳумоюн Шербутаев жароҳати сабабли мавсумнинг биринчи ярмидаги кўп ўйинларни ўтказиб юборди. Бироқ, қайтгач, у юқори савияда ўйнай олди ва қайтганидан кейинги иккинчи ўйинидаёқ гол уришга муваффақ бўлди. "Сурхон" матбуот хизмати Ҳумоюндан интервью олиб, унинг тикланиш жараёни ва клубимиз келажаги ҳақида сўз юритди
— Ҳумоюн, ассалому алайкум! Аввало, сизни узоқ кутилган қайтишингиз билан табриклаймиз. Тикланиш жараёни узоқ давом этганидан сўнг сизда қандай кутганлар бўлган эди?
— Ассалому алайкум! Жамоа таркибига қайтганимдан жуда хурсандман. Жамоадошларим билан бирга тўп тепиш, машғулот ва ўйинларда иштирок этиш — бу бутунлай бошқа бир туйғу. Қайтганимдан бахтиёрман, чунки ҳаётимни футболсиз тасаввур қила олмайман
— Тикланиш жараёни қандай кечди? Ахир сиз деярли ярим йил майдонда йўқ эдингиз
— Тикланиш жараёни осон кечди деб айтолмайман. Ўзинг билан курашиш, оғриқ ва қийинчиликлар бор эди, лекин айнан шу ҳолатлар мени кучлироқ қилди, деб ўйлайман. Нима бўлса ҳам — яхшиликка. Тикланишимда ёрдам берган инсонларга, оиламга, яқинларимга, дўстларимга раҳмат айтаман — улар доим ёнимда бўлишди
— Сиз сафга қайтганингиздаги илк ўйинда майдон марказида яхши ўйин кўрсатганингиз кўзга ташланди. Иккинчи — "Шўртан"га қарши баҳсда эса гол муаллифига айландингиз. "Нефтчи" ва "Шўртан"га қарши илк ўйинларингиз ҳақида нима дея оласиз?
— Танаффусдан сўнг яна майдонга қайтиш — бу менга таърифлаб бўлмас даражада ёқимли туйғу бўлди. Футболчи учун энг катта бахт — бу майдонда бўлиш. Албатта, дастлабки ўйинлар осон кечмади: ҳали оптимал формада эмас эдим, айрим хатолар ҳам бўлди. Лекин мен бу жараёнга жиддий ёндашдим, ҳар бир дақиқани қадрладим ва энг муҳими — ўзимга бўлган ишончни йўқотмадим. Шўртанга қарши гол урганим эса — бу меҳнатимнинг биринчи меваси деб биламан
— Ҳозирда "Сурхон" Суперлигада 8-ўринни эгаллаб турибди. Сизнингча, биздан илгарилаб кетган етти жамоани қувиб етиш имконияти борми?
— Албатта! Агар меҳнат қилсак, ўз устимизда тинимсиз ишласак ва хатолар устида жиддий ишлашда давом этсак — биз етакчи жамоаларни қувиб етишимиз, ҳаттоки ортда қолдиришимиз мумкин. Энг муҳими — ишонч ва жамоавий бирлик
— Бу мавсумдан бошлаб Ўзбекистон чемпионати яна 16 клуб форматига қайтди. Бу ўзгариш чемпионатни кучлироқ ва рақобатбардошроқ қилишга ёрдам берадими?
— Менимча, бу чемпионат янада кучлироқ бўлади. Қанча кўп рақобат ва ўйин бўлса, шунча кўп ўсиш бўлади. Айнан шундай шароитларда футболчи сифатида шаклланиш ва ривожланиш мумкин. Эътибор берган бўлсангиз, охирги йилларда Суперлигада рақобат кучайди. Кўплаб жамоалар чемпионлик ва медаллар учун курашмоқдалар
— Маълумки, сиз Достон Турсунов билан жуда яқин дўстсиз ва кўпинча футбол адабиётини ўқиётган ҳолатингизни кўриш мумкин. Қайси китобларни афзал кўрасиз?
— Достон Турсунов билан спортчилар автобиографияси ҳақидаги китобларни ўқишни ёқтирамиз. Аммо ростини айтсам, сўнгги пайтларда ҳали китоб ўқишга улгурмадим. Ҳозирги кунда кўпроқ у билан шахмат ва ПлайСтатион ўйнаймиз
— Мураббийлар тандеми — Давлетов ва Кудряшов ҳақида нима дея оласиз? Уларнинг футбол фалсафаси сизда қандай таассурот қолдирган?
— Давлетов ва Кудряшов мураббийлар тандеми - профессионал ишидан иборат. Уларнинг футболга бўлган ёндашуви аниқ, тартибли ва замонавий. Ҳар бир машғулот пухта режалаштирилган, жамоа ичида интизом ва соғлом рақобат муҳитини яратишган. Энг муҳими — улар ҳар бир футболчининг салоҳиятига ишонишади ва уни очишга ҳаракат қилишади. Улар билан ишлаш – бу барча футболчилар учун катта тажриба ва ўсиш имконияти
— 2025 йил "Сурхон" учун тарихий йил бўлди. Жамоа яна “Сурхон Арена”га қайтди ва ўз мухлислари қаршисида ўйнай бошлади. Стадион ҳақида илк таассуротингиз қандай бўлди?
— "Сурхон Арена"да ўйнаш нафақат футболчилар, балки мухлислар учун ҳам ёқимли бўлса керак. Биз ўз стадионимизга қайтишни анча кутган эдик. Энди эса бу ерда барча шароитлар яратилган — майдон сифати, муҳит, мухлисларнинг қўллаб-қувватлаши бизга алоҳида мотивация беради
— Сизнинг позициянгизда тўп сурадиган қайси футболчилар сизнинг севимли ўйинчиларингиз?
— Ҳозирги кунда менга Педри ва Родри каби футболчиларнинг ўйини жуда ёқмоқда. Уларнинг футбол маҳорати бутунлай бошқа даражада. Ҳар икки футболчи ҳам ўйинни ақл билан бошқаради, тўпни назорат қилиш, позицион ўйин, тўғри қарор қабул қилиш борасида жуда кучли. Уларнинг ўйин услуби менга илҳом беради ва ўзимни ҳам шу йўналишда ривожлантиришга интиламан
— "Сурхон"ни 3та сўз билан тарифлаб беринг.
— Бирлик, тиришқоқлик, ғалаба.
БЛИЦ-САВОЛЛАР:
— Ўзбекистон терма жамоасининг ТОП-3 футболчиси?
— Терма жамоамиздаги барча футболчилар кучли ва ўз ўрнига эга. Шунга қарамай, кучли учликни айтадиган бўлсам — бу Элдор Шомуродов, Ўткир Юсупов ва Отабек Шукуров.
— "Сурхон" жамоасининг ТОП-3 ўйинчиси?
— Жамоамизда ҳам савияси юқори футболчилар жуда кўп. Уч нафарини ажратиб кўрсатиш қийин, лекин барибир Достон Турсунов, Азизбек Жумаев ва Улуғбек Шамсиев алоҳида эътиборга лойиқ, деб ўйлайман
— Сиз "Сурхон" таркибида 3 та гол урдингиз. Қайси бири энг эсда қоларли бўлган?
— Энг эсда қоларли лаҳза Суперлигадаги биринчи голим (Суперлига-2023, 4-тур, "Сурхон" - "Бухоро" 2:0. Шербўтаев жамоамизнинг 2-голини урган эди) Бу мен учун унутилмас туйғу бўлган, чунки у нафақат шахсий ютуқ, балки меҳнатнинг самарасини билдирарди
— Мухлисларга тилакларингиз.
— Мухлисларга катта раҳмат — улар ҳар бир ўйинимизга узоқ йўл босиб келишади. Ғалаба ёки мағлубият, яхши ёки ёмон кунларда ҳам бизни қўллаб-қувватлашади. Биз биргамиз — ва биргаликда кучлироқмиз!
Матнда хатолик топсангиз, ўша хатони белгилаб, бизга жўнатинг (Ctrl + Enter).
Қўқон-1912
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
