Кеча Фарғонанинг Қиргули мавзесидаги «Нефтчи» футбол клубининг янгиланган, бутунлай мафтункор масканга айлантирилган қароргоҳи тантанали равишда фойдаланишга топширилди. Бу тантанада нафақат вилоят раҳбарлари, балки меҳнат ва спорт фахрийлари, Фарғона футболининг мамлакатда кўзга кўринган вакиллари, спорт ва футбол мактабларининг тарбияланувчилари ҳамда кўплаб футбол мухлислари иштирок этдилар. Меҳмонлар дастлаб футболчилар ётоқхонаси, дам олиш хоналари, ошхона ва спорт заллари билан яқиндан танишдилар. Сўнгра янгитдан қуриб битказилган захира майдонлари, ёш футболчилар учун яратилган алоҳида хоналар ва бошқа қулайликлар билан танишдирилар. Шундан сўнг тантана қатнашчилари олдида бу ерда амалга оширилган улуғвор ишлар ташаббускори ва бошловчиси, вилоят ҳокими, вилоят футбол ассоциацияси президенти Ҳайрулло Ҳайитбаевич Бозоров нутқ сўзлади:
— Барчангизни «Нефтчи» футбол клубининг тубдан қайта таъмирланган қароргоҳининг фойдаланишга топширилиши муносабати билан чин дилдан табриклайман.
1970 йилда бунёд этилган мазкур спорт мажмуаси замонавий талабларга мос равишда янгиланиб, самарали машғулотлар ўтказиш учун барча зарур шароитлар яратилди.
Шу тариқа, қароргоҳ ҳудудида жойлашган ётоқхоналар, захира майдонлари, сув иншоотлари, ошхона, гулзор ва боғлар тўла янгиланиб, замонавий кщринишга келтирилди.
Қувонарлиси, энди бу ерда асосий жамоа билан бирга аёллар, ёшлар – (U-19) ва (U-21) жамоалари ҳам фаолият олиб боради. Бу «Нефтчи» жамоасининг янада кенгайиши, ёш авлод орасида футболга қизиқиш ортганини кўрсатади.
«Нефтчи» нафақат вилоятимиз, балки бутун юртимиз футболининг фахри ҳисобланади. Клуб ўз тарихи давомида бир неча бор миллий чемпионат ва кубокларда муносиб иштирок этган, юксак ютуқларга эришган, кўплаб машҳур футболчиларни етиштирган. Мухлислар муҳаббати эса «Нефтчи»ни ҳақиқий кучга айлантирди.
Бугун «Нефтчи» жамоаси нафақат майдонда, балки ташкилий, инфратузилмавий ва ижтимоий жиҳатдан ҳам кучли ва жипс жамоа сифатида фаолият олиб бормоқда. Жамоанинг сўнгги йиллардаги муваффақиятли ўйинлари, таркибга жалб қилинган иқтидорли ёшлар, профессионал мураббийлар, шунингдек, мухлислар қўллаб-қуввати уни ҳақиқий куч бўлиб ҳаракат қилаётганини яққол кўрсатмоқда.
Шу боис, бугун фойдаланишга топширилаётган замонавий машғулот мажмуаси «Нефтчи» жамоасининг катта мақсад ва юксак марраларга интилишида муҳим омил бўлади.
«Нефтчи» жамоасига янги муваффақиятлар, ёрқин ғалабалар ва халқаро майдонда муносиб иштирок тилайман, — дея ўз нутқини якунлади вилоят ҳокими. Сўнгра Ўзбекистон футбол ассоциацияси висе президенти Одил Аҳмедов, Фарғона футболининг таниқли ва машҳур фахрийси Тоҳир Кападзелар сўзга чиқиб, Ўзбекистон футболини жаҳонга машҳур қилиш ва ривожлантиришда Фарғона вилояти баракали ҳисса қўшаётганлиги ва бошқаларга ибрат кўрсатаётганлигини таъкидладилар. Катта тантанага ёш спортчиларнинг қувонч ва меҳр муҳаббатлари қўшилиб кетди. Вилоят ҳокими футбол мактабларининг тарбияланувчиларига қимматбаҳо совғаларни тантанали равишда топшириб, уларнинг қувончи ва спортга бўлган иштиёқини баланд кўтарди. Тантанани вилоятимизнинг таниқли санъаткорлари томонидан ижро этилган куй қўшиқлар якунлади.
Манба: https://t.me/pfcneftchi_uz
Киритилди: 06:02, 20.07.2025. Ўқилди: 1477 марта. Фикрлар: 1 та.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
