Ёзги трансфер дарчаси ёпилиши арафасида бўлсада, «Ньюкасл» ҳужумчи топишга эришди - энди Ник Вольтемаде Александер Исак ўрнига «қарғалар»га етакчи бўлади. Клуб германиялик футболчи учун рекорд маблағ - 85}5 млн. евродан воз кечди, Никнинг ўзи эса шу ёзнинг ўзида бошқа трансфер достонининг бош қаҳрамони бўлганди.
Вольтемаденинг Германиядаги саргузашти
Вольтемаде - сўнгги йилларда ўз ўйинини топа олмаётган «Вердер»нинг тарбияланувчиси. Бременликлар жамоасида ўзини кўрсата олмади: 17 ёшда дебютини нишонлаган ҳужумчини мураббийлар бир неча йил ичида асосий жамоага олиб чиқа олмадилар. Ник «Вердер» либосида 51 марта майдонга тушди, лекин атиги 1481 дақиқа тўп сурди. Яъни, барча ўйинларнинг сўнгги дақиқаларини майдонда ўтказди ва атиги 2та гол урди.
Шиддатли парвозни эса, ҳужумчи «Эльверсберг»даги бир йиллик ижара даврида ўтказиб, 35та ўйинда 17та гол ва 10та ассистни расмийлаштирди. Кейин яна Бременга қайтиб, аввалгидек омадсиз тўп сурди.
Ўтган йил охирида Никнинг шартномаси ниҳоясига етгач, Вольтемаде клубнинг янги таклифини рад этиб, «Штутгарт»га йўл олди. Тез орада раддиянинг бежиз эмаслиги аён бўлди. Ник Уго Экитике билан биргаликда ўтган мавсумни Бундеслиганинг асосий кашфиётлари сафида якунлади. Ҳужумчи 33та учрашувда 17та гол ва 3та ассистга эришиб, жамоанинг Германия Кубоги соҳибига айланишига муносиб ҳисса қўшди. Эътиборли жиҳати - Вольтемаде турнирнинг чорак финалидан ташқари барча ўйинларида биттадан гол урганди.
Лекин Никни ЕЧЛ мусобақаларига жалб этишмади: таркибда яна 3 нафар ҳужумчи бўлгани сабабли, Вольтемаде заявкадан четда қолди. «Ювентус», «Реал», «ПСЖ» ва бошқа грандлар дарвозасини забт этиш имкониятини Никка раво кўришмади. Фақат 2024 йилнинг кузида «Айнтрахт» дарвозасига урган голидан кейин 10-15 дақиқалик ўйин амалиёти 45 дақиқага айланди. Тез орада Вольтемадега бошланғич таркибда майдонга тушадиган сафидан жой берадиган бўлишди. Никнинг футбол йилини Германия ёшлар терма жамоаси сафидаги Евро турнири янада ширин қилиб юборди. Вольтемаде немисларнинг етакчи ўйинчисига айланиб, ўз гуруҳида Словенияга хет-трик совға қилди, Италияга қарши чорак финалда гол ва ассистни расмийлаштирди, ярим финалда Франция дарвозасини ишғол этди. Фақат финалда Ник негадир сусайиб қолди, соврин эса Англия терма жамоасига насиб этди. Лекин бошқа томондан, Вольтемаде турнирнинг энг яхши тўпурари ва ёзги трансфер дарчасидаги энг ёқимтой ўйинчи унвонларига сазовор бўлди.
Ҳужумчи харидини «Бавария» бошқа жамоалардан кўпроқ истаганди. Мюнхенликларга Гарри Кейн ўрнини дўлдира оладиган ҳужумчи жуда зарур эди: Матис Тель «Тоттенхэм»га ўтиб кетган, доимий иккинчи Эрик Шупо-Мотинг аллақачон АҚШда тўп суришни бошлаганди. Никнинг ўзи «Бавария» билан келишувга эришиб, «Штутгарт»нинг муносабатини кута бошлади. У ердагилар баҳони арзонлатишни истамай, 80 млн. евро талаб қилишди. Гегемон баҳони пасайтиришга уринган бўлсада, «Штутгарт» ён бермади. Параллел равишда Лотар Маттеусдек экспертлар оловга мой қуя бошладилар. У Вольтемаде камида 80-100 миллионга сотилишини таъкидлаганди. Ҳанузгача клубга трансфер жараёнларида кўмак бераётган «Бавария» фахрий президенти Ули Хёнесс эса шундай деди: «Лотар Маттеус эсини еб қўйибди. Бу экспертлар анчадан бери жонимга тегиб кетишган».
Мюнхен грандининг сўнгги таклифи 50}5 млн. евро бўлди. «Штутгарт» эса мулойимлик билан таклифни рад этди. Шундан кейин «Бавария» эътиборини Луис Диаснинг трансферига қаратди. Вольтемаде эса жанжал кўтариб ўтирмай, дарчанинг сўнгги кунларида «Ньюкасл» келгунига қадар клубдаги машғулотини давом эттирди.
Вольтемаде қайси жиҳатлари билан шу қадар кучли?
Биринчи навбатда 2 метрли Ник (майли, деярли 2 метрли бўла қолсин - унинг бўйи 198 см.) «Ньюкасл» футболига жуда мос тушади. Вольтемаде бош билан тез-тез гол уравермайди (Бундеслигада атиги 2та, у ҳам 2025 йилнинг майида урилганди), лекин тўпни жуда ажойиб тарзда гавдаси билан тўсиб, рақибларини суриб юборади. Ник бу ишни иккинчи қаватдаги устунликка эришиш учун эмас, жамоадошлари билан комбинацияларни амалга ошириш ниятида бажаради. Вольтемаде - типик «симёғоч» эмас, балки ўйиннинг устаси. Кўпинча у чекинган ҳужумчи ролида плеймейкер малакасини намойиш этади. Ўтган мавсумда Ник ҳар бир ўйинда ўртача 4та голли вазият 2та самарали узатмани амалга ошириб, бошқа ҳужумчиларнинг 95 фоизидан устун эканлигини исботлаганди. Унинг бошқа фазилатларига нисбатан кўпроқ ҳайрон қолдирадиган жиҳати - дриблинг. Ник ўзининг габаритидан аъло даражада фойдаланиб, ихчам ўйинчилардек енгил ҳаракатланади. Шу сабабли Вольтемадени Питер Крауч ва Лионель Мессининг қоришмаси дейишади.
Ник сермулоҳаза футболчи, ҳар қандай вазиятларда ёрдам бериши лозим. Бироқ трансфер масаласида саволлар ҳам йўқ эмас. Биринчидан, келишув қиймати. Битта муваффақиятли мавсумда 80 млн. евро тўлашга тайёр эканликларига ишониш қийин. Иккинчидан, Бундеслига фактори. У ҳатто Лука Йовичдек персонажлар ҳам ўзларини қиролдек ҳис этадиган ўта очиқ чемпионат. АПЛда гол уриш анча қийин.
Ҳозирча, Уго Экитикенинг «Ливерпул»га трансфери хусусида фикр билдириш мумкин. Аввалига француз учун жуда кўп сарфлаб юборишгандек туюлган ва у иккинчи Дарвин Нуньесга айланиши тахмин қилинганди. Бироқ Уго ҳозирча қувонтирмоқда. Истардикки, Вольтемаде ҳам шу йўлдан боради ва бир мавсум футболчиси бўлиб қолмайди.
«Ньюкасл» очиқчасига ортиқча пул сарфлади - талаб қилинган маблағ «Штутгарт»нинг ҳужумчини сотиш ниятида эмаслигини англатарди. Бироқ «қарғалар» аввалдан ютқизиқ ҳолатига тушиб қолган эдилар - умуман топ-ҳужумчисиз қолиш бунданда ёмонроқ ҳолатга олиб келарди.
Содиқ СОБИР тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
